Jehová kitlamiltis nochi tlen amo kuali tlen Satanás kichijtok. Jehová kitekimakatok Jesús kej Tlanauatijketl ipan nochi Tlaltipaktli. Kema ya tlanauatis, ni Tlaltipaktli mochiuas se xochimili (Daniel 7:13, 14; Lucas 23:43).

Tlen namantsi tikitasej kinextia tlen Jehová kiijtojtok kichiuas.

• ONKAS MIAK TLAKUALISTLI: “Ni tlali temakatok miak pixkistli, pampa ta, toTeko Dios, tlen titoDios tojuantij, tlauel titechteochijtok”. “Ma onkas miak trigo ipan nochi nopa tlali, uan hasta nopa kuatinij tlen onka ipan tepetinij ma temakasej inintlajka” (Salmo 67:6; 72:⁠16).

• AYOKMO ONKAS TLAUILANKAYOTL: “Xiualakaj xikitakij nochi nopa uejueyi tlamantli tlen toTeko kichijtok [...]. Yajaya kiketsa nochi tlateuijkayotl hasta kampa ontlantok nochi Tlaltipaktli” (Salmo 46:​8, 9).

• AYOKMO ITSTOSEJ MASEUALMEJ KATLI AMO KUALMEJ: “ToTeko kintsontlamiltis tlen mosisiniaj [...]. Ayok uejkauas noja itstosej axkuajkualmej, teipa yonke titlachias kampa itstoyaj, axkema sampa tikinpantis” (Salmo 37:9, 10).

• AYOKMO ONKAS KOKOLISTLI, TLAIJIYOUILISTLI YON MIKILISTLI: Ipan nopa tonali “nopa popoyotsitsij tlachiasej, uan tlen axtlakakij, kinchiuas ma tlakakikaj. Tlen metskuachotikej uitonisej keja masamej, uan tlen nonotsitsij tsajtsisej uan uikasej” (Isaías 35:5, 6).

  “Uan toTeko iselti itstos ininuaya keja ininTeko. Uan toTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya” (Apocalipsis 21:3, 4).

Jehová amo kema istlakati. Ya amo eli kej Satanás uan amo kuali ajakamej. Nochi tlen ya kitenkajtok kichiuas, nelia moaxitis (Lucas 1:36, 37). Jehová mitsiknelia uan kineki xiitsto ipan nopa xochimili tlen ya kichiuas. Yeka, xikamanalti ininuaya Jehová itlajtoltemakauaj, kiampa nojua tijyekos sekinok kuali tlamachtili tlen uala ipan toTeotsij iTlajtol. Tlaj tijchiuas ipan monemilis tlen timomachtis, ayokmo tijneltokas istlakatili tlen maseualmej kineltokaj o tlaj se tlamantli tlatetsauia uan ayokmo mitskajkayauasej. Teipa kejuak timajkajtos tlen tlajtlakoli uan mikilistli. Kej kiijtok Jesús: “Inkimatisej tlen melauak, uan nopa tlen melauak inmechtojtomas para uelis innemisej inmajkajtokej” (Juan 8:32).