Nochi uelis tijtlapejpenisej tlaj tijtekipanosej Jehová o Satanás uan iajakauaj. Amo uelis tijchiuasej nopa ome tlamantli. ¡Tlauel kuali tlaj tijtlapejpenisej tijtekipanosej Jehová!

Kej ya tikitakej, nopa amo kuali ajakamej tlauel kinpaktia kintlaijiyouiltisej uan kinkajkayauasej maseualmej. Jehová amo kiampa kichiua uan kiniknelia nochi maseualmej kej se tetaj kiniknelia ikoneuaj. Ya techmaka “nochi tlen yejyektsi uan tlen kuali” (Santiago 1:17). Jehová nochipa kinmaka maseualmej tlen kuali, maske kemantika eli ouij (Efesios 2:​4-7).

Ximoiljui ipan nochi nopa tlamantli tlen kichijki Jesús kema itstoya ipan Tlaltipaktli. Kichijki ma kamanaltikaj katli amo ueliyaya kamanaltij uan ma tlachiakaj katli amo ueliyayaj tlachiaj. Kinchikajki katli amo ueliyayaj nejnemij uan katli kipixtoyaj lepra. Kinkixtik amo kuali ajakamej uan kinchikajki katli kipiayayaj tlen ueli kokolistli. Uan ika ichikaualis toTeotsij, Jesús kinyolkuik katli miktoyaj (Mateo 9:​32-35; 15:​30, 31; Lucas 7:​11-15).

Jehová amo kema istlakati uan nochipa kiijtoua tlen melauak. Ya amo aka kikajkayaua (Números 23:⁠19).

Sanse kej se sayoli amo ueli momajkaua tlen se tokatsauali, tlauel miakej maseualmej nojua kineltokaj tlen amo melauak uan tlen sekinok momajtokej kineltokaj. Kinmakasij katli miktokej, uan nojkia amo kuali ajakamej. Motekipachouaj pampa moiljuiaj kintlajchiuisej, kinpanos tlen amo kuali, kinekij kimatisej tlen panos teipa uan kitekiuiaj se keski tlamantli tlen ika moiljuiaj momanauisej. Kiampa kichiuaj pampa Satanás kejuak kinilpia ika nopa istlakatili tlen kimoyaua. ToTeotsij itekipanojkauaj amo kikauaj Satanás ma kinkajkayaua ika ni tlamantli.

Jehová kipia miak chikaualistli uan Satanás amo. Tlaj tijtekipanos Jehová, amo kikauas amo kuali ajakamej ma mitschiuilikaj tlen amo kuali (Santiago 4:⁠7). Uan maske kinekisej mitstlajchiuisej amo tleno mitspanos. Ma timoiljuikaj tlen panok ipan Nigeria, se Jehová itlajtoltemajka amo kinejki kisas tlen ialtepe, yeka eyij tetlajchiuianij kitlajchiuijkej pampa kinekiyayaj ma miki. Maske kiampa kichijkej, amo tleno kipanok nopa toikni, uan se tlen nopa tetlajchiuianij momajmatik uan yajki kiitato uan kiiljuik ma kitlapojpoljui.

Tlaj amo kuali ajakamej mitschiuiliaj tlen amo kuali, ta uelis tikiljuis Jehová ma mitspaleui, uan ya mitspaleuis (Proverbios 18:10). Tlaj tijneki toTeotsij ma mitspaleui, moneki ayokmo tijpixtos yon se tlamantli tlen kitekiuiaj tetlajchiuianij uan tlen ika kinueyichiuaj amo kuali ajakamej. Se keskij toTeotsij itekipanojkauaj katli itstoyaj Éfeso, kiampa kichijkej. Kisentilijkej nochi amochtli tlen ika tetlajchiuiyayaj uan kitlatijkej (Hechos 19:​19, 20). Nama toTeotsij itekipanojkauaj nojkia kiampa moneki kichiuasej. Ayokmo xijpia amuletos, tlen motlaliliaj ipan ininkechtla, teteyomej, amochtli tlen kitekiuiaj tetlajchiuianij o sekinok tlamantli tlen nojkia kitekiuiaj.

Tlaj tijneki tijyolpakiltis Jehová, amo san moneki ayokmo tijpaleuis religión tlen amo melauak uan ayokmo tijchiuas tlen amo kuali. Moneki tijueyichiuas toTeotsij kej ya kipaktia. Biblia techiljuia kenijkatsa uelis tijchiuasej:

Satanás uan amo kuali ajakamej kintekiuiaj maseualmej katli tlamachtiaj uan kichiuaj tlen amo kuali. Jehová nojkia kinpia maseualmej katli kichiuaj tlen ya kipaktia, inijuantij kiniljuiaj Jehová itlajtoltemakauaj (Isaías 43:10). Ipan nochi Tlaltipaktli itstokej kipano ocho millones Jehová itlajtoltemakauaj. Nochi inijuantij kichiuaj kampeka kichiuasej tlen kuali uan kinmachtisej sekinok tlen melauak tlamachtia Biblia. Ipan miak altepemej, uelis tikinitas ipan Kali kampa mosentiliaj Jehová itlajtoltemakauaj, nopaya kuali mitsselisej.

Jehová itlajtoltemakauaj kinpaleuiaj maseualmej nojkia ma kitekipanokaj toTeotsij. Inijuantij uelis mitsmachtisej mochaj, uan mitspaleuisej xijueyichiua Jehová kej kinamiki. Amo moneki titlaxtlauas. Jehová itlajtoltemakauaj kinpaktia kinmachtisej sekinok pampa kinikneliaj maseualmej uan nojkia kiikneliaj Jehová.