Kema se tlakatl uan se siuatl mosenkauaj, tlauel yolpakij uan kinekiskiaj nochipa kiampa yolpaktosej. Uan kena uelis kiampa itstosej. ToTeotsij itekipanojkauaj katli uejkajkia mosenkajkej uan kichijtokej kampeka kichiuasej tlen Biblia kiijtoua, kiitstokej kena uelis nochipa yolpaktosej.

1. ¿Tlake kiijtoua Biblia moneki kichiuas se tlakatl?

Jehová kineki se tlakatl ma kinyakana ichampoyouaj (xijpoua Efesios 5:23). Uan yeka tlen kitlapejpenis kichiuas, moneki kinpaleuis nochi ichampoyouaj. Biblia kiiljuia se tlakatl tlen moneki kichiuas: “Xikikneli mosiua” (Efesios 5:25). ¿Kenijkatsa uelis kichiuas nopa? Moneki kinextis kiiknelia isiua kema itstokej ininselti uan nojkia kema itstokej ininuaya sekinok. Nojkia moneki kuali kimokuitlauis, kipaleuis kuali ma kiyolmati uan kiitas tlake kipoloua (1 Timoteo 5:8). Nojkia kipaleuia nojua kuali ma mouampojchiua iuaya Jehová (Mateo 4:4). Yeka, kichiua kampeka momaijtos iuaya uan sansejko kipouasej Biblia. Tlaj kiiknelia isiua, nopa tlakatl nojua kuali mouampojchijtos iuaya toTeotsij (xijpoua 1 Pedro 3:7).

2. ¿Tlake kiijtoua Biblia moneki kichiuas se siuatl?

Biblia kiijtoua se siuatl “moneki kitlepanitas iueue” (Efesios 5:33). ¿Kenijkatsa uelis kichiuas nopa? Uelis moiljuis tlake kuajkuali tlamantli kinextia iueue uan kenijkatsa kichiua kampeka kuali kimokuitlauis ya uan nojkia ikoneuaj. Nojkia uelis kinextis kitlepanita tlaj kichiuas tlen kitlapejpenia ma mochiua, kikamanaljuis ika tlaiknelili uan kiijtos tlake kuali tlamantli kichiua iueue, maske amo kitekipanoua Jehová.

3. ¿Tlake kinpaleuis katli mosenkajtokej kuali ma itstokaj?

Biblia kiijtoua katli mosenkajtokej elij “keja san se inintlakayo” (Mateo 19:5). Ni kiijtosneki amo ma kikauakaj yon se tlamantli ma kichiua ayokmo ma moiknelikaj. Yeka, kichiuaj kampeka itstosej sansejko, kiijtosej tlen moiljuiaj, tlen nelia kiyolmatij uan kinextisej moikneliaj. Nojkia, inijuantij achtoui Jehová tlauel kiikneliaj uan teipa ininnamik, uan amo seyok maseuali yon seyok tlamantli. Uajka, katli mosenkajtokej amo kinamiki tlauel mouikasej iuaya se akajya katli amo eli ininnamik.

 KUALI XIMOMACHTI

4. Se tlakatl moneki kiiknelis uan kimokuitlauis isiua

5. Se siuatl moneki kiiknelis uan kitlepanitas iueue

Biblia kiijtoua se siuatl moneki nochipa kitlepanitas iueue maske amo kitekipanoua Jehová. Xijpouakaj 1 Pedro 3:1, 2 uan xijnankilikaj ni tlajtlanili:

• Tlaj moueue amo kitekipanoua toTeotsij, uelis tijneki nojkia ma kitekipano. ¿Timoiljuia tijpaleuis tlaj nochipa tijkamanaljuis tlen Biblia o tlaj tijnextis tikiknelia uan tijtlepanita? ¿Kenke kiampa timoiljuia?

Se tlakatl uan se siuatl sansejko uelis kuali kitlapejpenisej tlen kichiuasej, uan uelis kemantika nopa siuatl amo moiljuis sanse kej iueue.  Kema kiampa panos, nopa siuatl kena uelis kiiljuis iueue tlake moiljuia, uan moneki kichiuas ika tlatlepanitakayotl uan ika yamanik tlajtoli. Nojkia moneki kiilnamikis Jehová kitlapejpenijtok iueue ma kinyakana ichampoyouaj. Yeka, moneki kichiuas kampeka kitlepanitas uan kichiuas tlen iueue kitlapejpenis ma mochiua. Tlaj kiampa kichiuas, itstosej ika pakilistli. Xijpouakaj 1 Pedro 3:3-5 uan xijnankilikaj ni tlajtlanili:

• ¿Kenijkatsa kiyolmati Jehová kema kiita se siuatl kitlepanita iueue?

6. Katli mosenkajtokej uelis kuali itstosej maske kipiasej kuesoli

 TLEN TIMOMACHTIJKEJ

Katli mosenkajtokej uelis yolpakisej tlaj moiknelisej, motlepanitasej uan tlaj kichiuasej tlen Biblia kiijtoua.

¿Tlake tijyekok?

• ¿Tlake uelis kichiuas se tlakatl uan kiampa kuali itstos iuaya isiua?

• ¿Tlake uelis kichiuas se siuatl uan kiampa kuali itstos iuaya iueue?

• Tlaj tijpia monamik, ¿tlake texto uelis mitspaleuis kuali xiitsto iuaya?