Nochi techpaktia toselti tijtlapejpenisej kenijkatsa timoyoyontisej uan kenijkatsa timoyejyekchiuasej. Tlaj tijchiuasej tlen kiijtoua se keski textos, amo san techpaleuis ma timoyoyontikaj kej tojuantij techpaktia, nojkia techpaleuis ma tijyolpakiltikaj Jehová. Ma tikitakaj se keski textos tlen uelis techpaleuis.

1. ¿Tlake textos techpaleuis ma tijtlapejpenikaj kenijkatsa timoyoyontisej uan timoyejyekchiuasej?

Cristo itokilijkauaj “moneki ma moyoyontikaj kej kinamiki, ma moyejyektlalikaj kej kinamiki uan ma kinextikaj tlalnamikij”. Nojkia amo kinamiki nemisej sokiyojkej, kiampa kinextisej nelnelia “kitlepanitaj toTeotsij” (1 Timoteo 2:9, 10, TNM). Xikita ni naui tlamantli tlen uelis mitspaleuis. 1) Toyoyo moneki elis kej kinamiki. Uelis ta tikitstok ipan tlanechikoli maske amo sanse kej timoyoyontiaj, nochipa tijnextiaj tijtlepanitaj toTeotsij kej timoyoyontiaj uan kej timoxiljuiaj. 2) Timoyoyontisej kej kinamiki kiijtosneki amo timokentisej yoyomitl tlen kichiuas sekinok ma moiljuikaj tlamantli tlen amo kuali, uan tlen kichiuas san ma techtlachilikaj. 3) Tijnextiaj titlalnamikij kema amo timoyoyontiaj yon timoyejyekchiuaj kej maseualmej kichiuaj kema kisa yajyankuik tlamantli. 4) Kej tinesij moneki kinextis tijtlepanitaj toTeotsij uan kiampa sekinok kiitasej nelnelia tijueyichiuaj Jehová (1 Corintios 10:31).

2. ¿Kenke moneki timoiljuisej ipan toikniuaj kema tijtlapejpenisej kenijkatsa timoyoyontisej?

Maske tojuantij uelis tijtlapejpenisej tlake timokentisej, moneki kuali timoiljuisej tlaj nopa ueliskia kichiuas sekinok amo kuali ma techitakaj. Amo aka tijnekij tijyolkokosej, yeka tijneltokaj tlen kiijtoua ni texto: “Ma tijchiuakaj tlen kinpaktia sekinok tlaneltokanij uan tlen kinpaleuis para más kipiasej chikaualistli para kineltokasej toTeko” (xijpoua Romanos 15:1, 2).

3. ¿Kenijkatsa kej timoyoyontiaj uelis kinpaleuis sekinok ma kinekikaj kiixmatisej Jehová?

Nochipa tijchiuaj kampeka timoyoyontisej kej kinamiki. Uan nojua kuali tijtlapejpeniaj kenijkatsa timoyoyontisej kema tiauij tlanechikoli uan kema titlajtolmoyauaj. Nojkia tijnekij maseualmej ma mosentlalikaj ipan nopa kuali tlamachtili tlen tijmoyauaj uan amo kej tinesij. Yeka, kej timoyoyontiaj tijnekij ma kinpaleui sekinok nojua ma kinekikaj kiixmatisej Jehová uan nojkia ma kiitakaj toTeotsij itlajtol tlauel techpaleuia (Tito 2:10).

 KUALI XIMOMACHTI

4. Tlaj kuali tinesisej tijnextisej tijtlepanitaj Jehová

¿Kenke moneki tijchiuasej kampeka kuali tinesisej? Xijpouakaj Salmo 47:2 uan xijnankilikaj ni tlajtlanili:

• Kej timoyoyontiaj uelis kichiuas sekinok ma kitlepanitakaj Jehová. Yeka, ¿kenijkatsa nopa techpaleuia kuali ma tijtlapejpenikaj tlen timokentisej?

• ¿Timoiljuia moneki kuali timoiljuisej kenijkatsa timoyoyontisej uan timoyejyekchiuasej kema tiasej tlanechikoli uan kema titlajtolmoyauaj? ¿Kenke kiampa timoiljuia?

 5. ¿Tlake techpaleuis kuali ma tijtlapejpenikaj tlen timokentisej uan kej timoyejyekchiuasej?

Xikitakaj nopa VIDEO.

Maske uelis toyoyo amo tlauel patiyo, moneki amo sokiyojtos, kuali nesis uan timokentisej tlen kinamiki. Xijpouakaj 1 Corintios 10:24 uan 1 Timoteo 2:9, 10. Teipa xikijtokaj kenke amo...

• ... san kej ueli timoyoyontiskiaj o kenke amo timokentiskiaj yoyomitl tlen amo kinamiki.

• ... timokentiskiaj yoyomitl tlen tatakatstik, kototsi o tlauel kechkoyauak uan tlen ueliskia kichiuas sekinok ma moiljuikaj tlen amo kuali.

Maske Cristo itokilijkauaj ayokmo moneki tijchiuasej tlen kiijtoua nopa Tlanauatili tlen Jehová kimakak Moisés, ni tlanauatili techpaleuia ma tijmatikaj tlake moiljuia Jehová. Xijpouakaj Deuteronomio 22:5 uan xijnankilikaj ni tlajtlanili:

• ¿Kenke se tlakatl amo kinamiki moyejyekchiuas uan moyoyontis kej se siuatl, uan se siuatl kej se tlakatl?

Xijpouakaj 1 Corintios 10:32, 33 uan 1 Juan 2:15, 16 uan xijnankilikaj ni tlajtlanili:

• Tlaj nikaj kampa tiitstok maseualmej o toikniuaj amo kuali kiitaj kej timoyejyekchiua uan kej timoyoyontia, ¿tlake moneki tijchiuas? ¿Kenke kiampa timoiljuia?

• ¿Kenijkatsa momajtokej moyoyontiaj uan moyejyekchiuaj maseualmej kampa ta tiitstok?

• ¿Timoiljuia Cristo itokilijkauaj kinamiki kiampa moyejyekchiuasej uan moyoyontisej? ¿Kenke kiampa timoiljuia?

 TLEN TIMOMACHTIJKEJ

Tlaj kuali tijtlapejpenis tlen timokentis uan kej timoyejyekchiuas, tijnextis tijtlepanita Jehová uan nojkia sekinok.

¿Tlake tijyekok?

• ¿Kenke Jehová kineki kuali ma tijtlapejpenikaj kenijkatsa timoyoyontisej uan timoyejyekchiuasej?

• ¿Tlake textos techpaleuis kuali ma tikitakaj kenijkatsa timoyoyontisej uan timoyejyekchiuasej?

• ¿Kenijkatsa kej timoyoyontiaj uan timoyejyekchiuaj uelis kichiuas sekinok kuali ma kiitakaj Jehová?