Kema tiitstokej ininuaya toikniuaj, tijyolmatij kej tlanauatijketl David. Ya kiijtok: “Xikitakaj, nelia kuali uan yejyektsi nesi para iknimej ma mokauakaj sansejko ika san se ininyolo” (Salmo 133:1). Tiitstokej sansejko ininuaya toikniuaj pampa nochi tijchiuaj kampeka kuali timouikasej.

1. ¿Tlake tlamantli tlen kichiuaj Jehová itekipanojkauaj tlauel pankisa?

Tlaj ta tiaskia ipan se tlanechikoli tlen eltok ipan seyok altepetl, uelis amo tijkuamachiliskia nopa tlajtoli tlen nopaya kamanaltij. Maske amo tijkuamachiliskia, kuali tijyolmatiskia tiitstos nopaya. ¿Kenke? Pampa tikitas kampa ueli nochi Jehová itlajtoltemakauaj timomachtiaj Biblia ika sanse amatlajkuiloli. Nojkia tijchiuaj kampeka tijnextisej timoikneliaj. Maske amo tiitstokej ipan sanse altepetl, nochi tijnekij tijnojnotsasej “Jehová ika itoka uan sansejko” tijueyichiuasej (Sofonías 3:9, TNM).

2. ¿Tlake uelis tijchiuas uan kiampa ipan tlanechikoli nochi sansejko itstosej?

“Ximoiknelikaj se ika seyok ika inmoyolo” (1 Pedro 1:22). ¿Kenijkatsa uelis tijchiuas tlen kiijtoua ni texto? Xijchiua kampeka tikitas nopa kuajkuali tlamantli tlen kichiuaj sekinok uan amo san xikita tlen amo kuali kichiuaj. Amo san ximouika ininuaya katli kichiuaj sanse tlamantli kej ta. Nojkia xijchiua kampeka tikinixmatis toikniuaj katli euaj sejkanok uan katli momajtokej kichiuaj sekinok tlamantli. Uan tlaj tikita se kentsi titechikoita, xijchiua kampeka ayokmo kiampa tijchiuas (xijpoua 1 Pedro 2:17). a

3. ¿Tlake uelis tijchiuas kema timoyolkokos iuaya se toikni?

Maske sansejko tijtekipanouaj Jehová, nochi titlajtlakolejkej, uan yeka kemantika techyolkokouaj toikniuaj o tojuantij tikinyolkokouaj. Biblia kiijtoua nochipa ximotlapojpoljuikaj. Uan nojkia kiijtoua Jehová nochipa kineki techtlapojpoljuis, yeka nojkia moneki kiampa tijchiuasej (xijpoua Colosenses 3:13). Maske miakpa tijyolkokouaj Jehová, ya techtlapojpoljuia. Yeka kineki nojkia ma titetlapojpoljuikaj. Tlaj timoiljuia tijyolkokojtok se akajya, xijchiua kampeka tikamanaltis iuaya uan kiampa inmotlapojpoljuisej (xijpoua Mateo 5:23, 24). b

 KUALI XIMOMACHTI

4. Amo xitechikoita

Tijnekij tijnextisej tikinikneliaj nochi toikniuaj. Maske kiampa tijnekij, kemantika uelis ouij tijmatisej tikiniknelisej katli amo elij sanse kej tojuantij. ¿Tlake uelis techpaleuis? Xijpouakaj Hechos 10:34, 35 uan xijnankilikaj ni tlajtlanili:

• Jehová kinselia nochi maseualmej katli kinekij kitekipanosej. Uajka, ¿kenijkatsa kinamiki tikinitas katli amo elij sanse kej ta?

• Kampa ta tiitstok, ¿kenijkatsa maseualmej kinextiaj techikoitaj? ¿Kenke amo kinamiki tijchiuas kej inijuantij?

Xijpouakaj 2 Corintios 6:11-13 uan xijnankilikaj ni tlajtlanili:

• ¿Tlake uelis tijchiuas uan kiampa tlauel tikiniknelis nochi toikniuaj?

5. Nochipa xitetlapojpoljui uan xijsenkaua se kuesoli

Maske tojuantij amo kema monekis tijtlapojpoljuisej Jehová, ya nochipa techtlapojpoljuia. Xijpouakaj Salmo 86:5 uan xijnankilikaj ni tlajtlanili:

• ¿Kenijkatsa ni texto kinextia Jehová kineki techtlapojpoljuis?

• ¿Tijtlaskamatilia Jehová pampa mitstlapojpoljuia? ¿Kenke kiampa tikijtoua?

• ¿Tlake tlamantli uelis kichiuas ouij ma tijmatikaj kuali timouikasej ininuaya sekinok?

¿Kenijkatsa uelis tijchiuasej kej Jehová uan kiampa kuali timouikasej ininuaya toikniuaj? Xijpouakaj Proverbios 19:11 uan xijnankilikaj ni tlajtlanili:

• Kema se akajya kichiua tlen mitskualankamaka o mitsyolkokoua, ¿tlake ueliskia tijchiuas?

 Kemantika tojuantij tikinyolkokouaj sekinok. Yeka, ¿tlake ueliskia tijchiuas tlaj titeyolkokos? Xikitakaj nopa VIDEO uan xijnankilikaj ni tlajtlanili:

• ¿Tlake kichijki nopa tosiuaikni tlen nesi ipan nopa video uan kiampa sampa kuali mouikak iuaya nopa seyok tosiuaikni?

 TLEN TIMOMACHTIJKEJ

Kema tikintlapojpoljuia uan tikiniknelia nochi toikniuaj, titlapaleuia ipan tlanechikoli nochi ma itstokaj sansejko.

¿Tlake tijyekok?

• ¿Tlake mitspaleuis amo xitechikoita?

• ¿Tlake tijchiuas kema tijpias se kuesoli iuaya se toikni?

• ¿Tijneki tikintlapojpoljuis sekinok kej Jehová kichiua? ¿Kenke kiampa tijneki tijchiuas?