TLAMACHTILI 01
¿Kenijkatsa uelis mitspaleuis Biblia?
Nochi tijnekij tijmatisej kenke tiitstokej, kenke titlaijiyouiaj, kenke timikij uan tlake panos teipa. Nojkia tijnekij tijmatisej kenijkatsa uelis tikinpanoltisej tochampoyouaj uan kenijkatsa uelis tiyolpakisej ininuaya. Biblia kinpaleuijtok miakej maseualmej ma kimatikaj ni tlamantli uan kuali ma monejnemiltikaj. ¿Timoiljuia Biblia nojkia uelis mitspaleuis?
1. ¿Tlake tlajtlanili kinankilia Biblia?
Biblia kinankilia ni tlajtlanili tlen tlauel ipati: ¿Toselti tiyolkej o techchijchijkej? ¿Kenke tiitstokej? ¿Kenke titlaijiyouiaj? ¿Tlake kinpano katli mikij? ¿Kenke onka miak tlauilankayotl tlaj nochi tijnekij kuali tiitstosej? ¿Poliuis Tlaltipaktli o amo? Amo kenijki tlaj timotlatsintokia ni tlamantli. Miakej maseualmej tlauel kinpaleuijtok tlen kiijtoua Biblia uan ta nojkia uelis mitspaleuis.
2. ¿Kenijkatsa Biblia techpaleuia ma tiyolpakikaj ipan ni tonali?
Biblia techpaleuia kuali ma tiitstokaj pampa kiijtoua kenijkatsa uelis tiyolpakisej ininuaya tochampoyouaj, tlake uelis tijchiuasej kema tlauel techtekipachoua se tlamantli uan kenijkatsa uelis tiyolpakisej ika toteki. Kema timomachtijtias Biblia, tijyekos ni uan sekinok tlamachtili. Tikitas kenijkatsa tlauel techpaleuia “nochi nopa tlatsejtseloltik tlajkuiloli” o nochi tlen kiijtoua Biblia (2 Timoteo 3:16).
Ni amatlajkuiloli amo eli Biblia, san mitspaleuis kuali tijkuamachilis tlen nopaya kiijtoua. Yeka xijpoua nochi textos tlen uala ipan sejse tlamachtili uan xikita kenijkatsa tlen tijyekojtias eli tlen Biblia tlamachtia.
KUALI XIMOMACHTI
Ma tikitakaj kenijkatsa Biblia kinpaleuijtok miakej maseualmej, tlake uelis techpaleuis ma techpakti tijpouasej Biblia uan kenijkatsa mitspaleuis tlaj se akajya mitsmachtis.
3. Biblia techyakana
Biblia kejuak kitlauilia toojui pampa techpaleuia kuali ma tijtlapejpenikaj tlake tijchiuasej ipan tonemilis uan nojkia techiljuia tlake panos teipa.
Xijpouakaj Salmo 119:105 uan xijnankilikaj ni tlajtlanili:
-
Katli kiijkuilok ni salmo, ¿tlake kiijtok tlen Biblia?
-
Uan ta, ¿tlake timoiljuia tlen Biblia?
4. Biblia kinankilia tlen timotlatsintokiaj
Biblia kipaleuik se siuatl ma kimati kenijkatsa monankilia tlen miak xiuitl kinektoya kimatis. Xikitakaj nopa VIDEO uan xijnankilikaj ni tlajtlanili:
-
¿Tlake kinekiyaya kimatis nopa siuatl katli nesi ipan video?
-
¿Kenijkatsa kipaleuik kema momachtik Biblia?
Biblia kiijtoua ma tijtemokaj tlen tijnekij tijmatisej. Xijpouakaj Mateo 7:7 uan xijnankilikaj ni tlajtlanili:
-
¿Timoiljuia Biblia mitspaleuis tijmatis tlen timotlatsintokia? ¿Ta tlake tijneki tijmatis?
5. ¿Tlake techpaleuis ma techpakti tijpouasej Biblia?
Miakej maseualmej kinpaktia kipouasej Biblia uan nelia tlauel kinpaleuia. Xikitakaj nopa VIDEO uan xijnankilikaj ni tlajtlanili:
-
¿Kinpaktia tlapouasej nopa telpokamej katli nesij ipan video?
-
Maske amo kinpaktia tlapouasej, ¿kenke kinpaktia kipouasej Biblia?
Tlen kiijtoua Biblia techyolchikaua uan techpaleuia ma timotemachikaj teipa kuali tiitstosej. Xijpouakaj Romanos 15:4 uan xijnankilikaj ni tlajtlanili:
-
¿Mitspaktiskia tijmatis tlake uelis mitsyolchikauas uan tlake mitspaleuis ximotemachi teipa kuali tiitstos?
6. Sekinok uelis techpaleuisej ma tijkuamachilikaj Biblia
Maske sekij kipouaj Biblia ininselti, kiitstokej tlauel kinpaleuia kema se akajya kinixtomilia. Xijpouakaj Hechos 8:26-31 uan xijnankilikaj ni tlajtlanili:
-
¿Tlake techpaleuis ma tijkuamachilikaj Biblia? (Xikitakaj versículos 30 uan 31).
Nopa tlakatl katli euayaya Etiopía monekiyaya ma kiixtomilikaj tlen kipouayaya. Ipan ni tonali miakej maseualmej nojkia tlauel kinpaleuia kema se akajya kinixtomilia tlen kiijtoua Biblia.
TLEN SEKINOK KIIJTOUAJ: “San timotonalpolos tlaj timomachtis Biblia”.
-
¿Ta tlake tikijtoskia? ¿Kenke kiampa timoiljuia?
TLEN TIMOMACHTIJKEJ
Biblia techiljuia kenijkatsa kuali tiitstosej, techpaleuia ma tijmatikaj tlen tijnekij tijmatisej, techyolchikaua uan techpaleuia ma timotemachikaj teipa kuali tiitstosej.
¿Tlake tijyekok?
-
¿Ipan tlake tlamantli techpaleuia Biblia?
-
¿Tlake tlajtlanili kinankilia Biblia?
-
¿Tlake tlamachtili mitspaktiskia tijmatis tlen Biblia?
NOJKIA XIKITA NI
Xikita kenke tlen Biblia kiijtoua nojua techpaleuia ipan ni tonali.
“Tlen Biblia tetlajtolmaka nochipa techpaleuijtos” (Tlen Tematiltia, pilamochtsi 1, 2018)
Xikita kenijkatsa Biblia kipaleuik se tlakatl kuali ma kiyolmati.
Xikita kenijkatsa Biblia mitspaleuis xiyolpaki ininuaya mochampoyouaj.
Xikita kenijkatsa Biblia techpaleuia ma tijmatikaj ajkia nelnelia kinauatia Tlaltipaktli.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
