TLAMACHTILI 14
¿Kenijkatsa uelis tijyolpakiltisej toTeotsij kema tijueyichiuaj?
Ipan seyok tlamachtili tikitakej toTeotsij amo kuali kinita religiones tlen amo melauak. Maske amo kuali kinita, kena uelis tijueyichiuasej kej ya kipaktia. ¿Tlake religión kuali kiita Jehová? (Santiago 1:27). Ma tikitakaj tlake tlamachtia Biblia.
1. ¿Kanke kiijtoua kenijkatsa moneki tijueyichiuasej toTeotsij?
Biblia kiijtoua kenijkatsa kineki toTeotsij ma tijueyichiuakaj. Jesús kiiljuik toTeotsij: “Motlajtol tlen nelia melauak” (Juan 17:17). Sekij religiones amo kipatiitaj tlen Biblia tlamachtia pampa inijuantij san tlamachtiaj tlen maseualmej moiljuiaj uan tlen momajtokej kichiuaj. Jehová amo kuali kiita tlen kichiuaj pampa amo kineltokaj itlanauatiljuaj (xijpoua Marcos 7:9). Yeka, Jehová tlauel yolpaki kema kiita tijueyichiuaj kej Biblia kiijtoua uan kema tijneltokaj tlen technauatia.
2. ¿Kenijkatsa moneki tijueyichiuasej Jehová?
ToTeotsij techchijchijki, yeka kinamiki san ya ma tijueyichiuakaj (Apocalipsis 4:11). Nopa kiijtosneki moneki san ya tikiknelisej uan kema tijueyichiuasej moneki amo tijtekiuisej tlaixkopinkayomej, teteyomej o sekinok tlamantli (xijpoua Isaías 42:8).
Kej tijueyichiuaj Jehová moneki elis “tlatsejtseloltik, pampa keja nopa kipaktia” (Romanos 12:1). Nopa kiijtosneki moneki timonejnemiltisej kej toTeotsij kineki. Katli kiikneliaj Jehová, kichiuaj tlen kinnauatia ma kichiuakaj katli kinekij mosenkauasej o katli ya mosenkajtokej. Nojkia, itekipanojkauaj amo tlachichinaj, moiuintiaj yon kitekiuiaj drogas pampa nopa tekokolismaka. a
3. ¿Kenke moneki tijueyichiuasej Jehová ininuaya katli nojkia kinekij kineltokasej?
Kema timosentiliaj ueli tijueyichiuaj Jehová ininuaya sekinok (Salmo 111:1, 2). Kiampa tijchiuaj kema tijuikatiaj (xijpoua Salmo 104:33). Jehová techiljuia ma timosentilikaj pampa techiknelia uan kimati tlaj timosentilisej, techpaleuis nochipa ma tiitstokaj ika pakilistli. Kema timosentiliaj, tikinyolchikauaj sekinok uan inijuantij nojkia techyolchikauaj.
KUALI XIMOMACHTI
Ma tikitakaj kenke Jehová amo kineki ma tijtekiuikaj tlaixkopinkayomej kema tijueyichiuaj. Nojkia tikitasej kenijkatsa uelis tijueyichiuasej.
4. Amo kinamiki tijtekiuisej tlaixkopinkayomej kema titlaueyichiuaj
¿Kenke tijmatij toTeotsij amo kipaktia ma tijtekiuikaj tlaixkopinkayomej? Xikitakaj nopa VIDEO uan xijnankilikaj ni tlajtlanili:
-
¿Tlake panok uejkajkia kema se keskij toTeotsij itekipanojkauaj kitekiuijkej se teteyotl kema kiueyichijkej?
Se keskij maseualmej moiljuiaj kinechkauiaj toTeotsij kema kitekiuiaj tlaixkopinkayomej. Maske kiampa moiljuiaj, ¿nelia kinpaleuia ma kinechkauikaj? Xijpouakaj Éxodo 20:4-6 uan Salmo 106:35, 36 uan xijnankilikaj ni tlajtlanili:
-
¿Tlake tlamantli tikitstok kitekiuiaj maseualmej kema kiueyichiuaj toTeotsij?
-
¿Tlake moiljuia Jehová kema kiita maseualmej kinueyichiuaj tlaixkopinkayomej?
-
¿Uan ta tlake timoiljuia kema tikita maseualmej kitekiuiaj tlaixkopinkayomej?
5. Tlaj san Jehová tijueyichiuasej, ayokmo tijneltokasej tlamachtili tlen amo melauak
Ma tikitakaj kenke kema tijueyichiuaj Jehová kej ya kineki, techpaleuia ayokmo ma tijneltokakaj tlamachtili tlen amo melauak. Xikitakaj nopa VIDEO.
Xijpouakaj Salmo 91:14 uan xijnankilikaj ni tlajtlanili:
-
¿Tlake kiijtojtok kichiuas Jehová tlaj san ya tikiknelisej uan tijueyichiuasej?
6. Tijueyichiuaj Jehová ipan tlanechikoli
Kema tiuikaj uan titlanankiliaj ipan tlanechikoli, tijueyichiuaj Jehová uan timoyolchikauaj. Xijpouakaj Salmo 22:22 uan xijnankilikaj ni tlajtlanili:
-
¿Mitspaktia kema sekinok tlanankiliaj ipan tlanechikoli?
-
¿Mitspaktiskia timokualchijchiuas uan kiampa titlanankilis ipan tlanechikoli?
7. Jehová tlauel yolpaki kema tikiniljuiaj sekinok tlen timomachtiaj
Ta nojkia uelis tikiniljuis sekinok tlen Biblia tlamachtia. Xijpouakaj Salmo 9:1 uan 34:1 uan xijnankilikaj ni tlajtlanili:
-
¿Tlake tlamachtili tlen tijyekojtok ipan Biblia mitspaktiskia tikiniljuis sekinok?
TLEN SEKINOK KIIJTOUAJ: “ToTeotsij kuali kinita nochi religiones, yeka uelis tijueyichiuasej kej tojuantij tijnekisej”.
-
¿Ta tlake timoiljuia?
TLEN TIMOMACHTIJKEJ
ToTeotsij tlauel yolpaki kema san ya tijueyichiuaj, kema tiauij tlanechikoli uan kema tikiniljuiaj sekinok tlen timomachtijtokej ipan Biblia.
¿Tlake tijyekok?
-
¿Kanke kiijtoua kenijkatsa kineki toTeotsij ma tijueyichiuakaj?
-
¿Kenke moneki san Jehová tijueyichiuasej?
-
¿Kenke moneki tijueyichiuasej Jehová ininuaya katli nojkia kinekij kiyolpakiltisej?
NOJKIA XIKITA NI
Xikita kenke se siuatl pejki tlauel yolpaki kema ayokmo kinueyichijki teteyomej, ipan nopa tlamachtili “Nama ayokmo nikinueyichiua teteyomej”.
“Biblia kinpaleuik kuali ma monejnemiltikaj” (Tlen Tematiltia, julio 1, 2011)
Xikita tlake mitspaleuis xitlanankili ipan tlanechikoli.
“Ma tijueyichiuakaj Jehová ipan tlanechikoli” (Tlen Tematiltia, enero 2019)
Xikita kenijkatsa kipaleuik se telpokatl kema pejki yaui tlanechikoli maske achtouia ouij kimatiyaya monechikos.
Maske miakej maseualmej moiljuiaj Cristo itokilijkauaj moneki kitekiuisej cruz, ¿kinamiki tijtekiuisej kema titlaueyichiuaj?
“¿Kenke Jehová itlajtoltemakauaj amo kitekiuiaj kuamapeli o cruz?” (Tlamachtili ipan jw.org)
a Ni tikitasej ipan sekinok tlamachtili.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
