TLAMACHTILI 15
¿Ajkia eli Jesús?
Maske miakej maseualmej kimatij Jesús itoka, amo nelnelia kuali kiixmatij uan amo sanse tlamantli moiljuiaj tlen ya. ¿Tlake tlamachtia Biblia tlen Jesús?
1. ¿Ajkia eli Jesús?
Jesús itstok iluikak uan kipia miak chikaualistli. Jehová achtoui Jesús kichijchijki uan teipa nochi tlen onka, yeka Biblia kiijtoua ya eli toTeotsij iachtouiKone (Colosenses 1:15). Nojkia Biblia kiijtoua Jesús eli “iKone iyojtsi” toTeotsij, pampa kema Jehová kichijchijki amo aka kipaleuik (Juan 3:16). Jesús kipaleuik iTata kema kichijchijki nochi tlen onka (xijpoua Proverbios 8:30). Uan tlauel kuali mouika iuaya. Jesús nojkia kiixmatij kej “iTlajtol toTeko” pampa kiniljuia sekinok tlen iTata kinauatia (Apocalipsis 19:13).
2. ¿Kenke ualajki Jesús ipan Tlaltipaktli?
Kipia se 2,000 xiuitl Jehová kitekiuik itonal o ichikaualis uan kiampa kichijki se ueyi tlamantli: kipanoltik Jesús inemilis ipan María itlakayo, se ichpokatl katli ayamo monamiktiyaya. Kiampa Jesús tlakatki kej se maseuali (xijpoua Lucas 1:34, 35). Jesús ualajki ipan Tlaltipaktli pampa eliskia nopa Mesías, katli kinmanauiskia maseualmej. a Nochi tlen Jehová kiijtojtoya ipan Biblia tlen Mesías, moaxitik ipan Jesús. Nopa kinpaleuik maseualmej ma kimatikaj ya eliyaya Cristo, iKone “toTeko Dios, yajaya tlen nelia itstok” (Mateo 16:16).
3. ¿Kanke itstok Jesús ipan ni tonali?
Teipa kema Jesús mijki, toTeotsij kiyolkuik kej se iluikaejketl uan tlakuepilik iluikak. Nopaya toTeotsij “kichijki más ueyi que nochi sekinok” (Filipenses 2:9). Maske ipan ni tonali Jesús kipia miak tlanauatili, san Jehová kipia nochi chikaualistli.
KUALI XIMOMACHTI
Ma tikitakaj ajkia nelnelia eli Jesús uan kenke tlauel ipati tikixmatisej.
4. Jesús amo eli toTeotsij katli kipia nochi chikaualistli
Maske Jesús eli se iluikaejketl katli kipia miak chikaualistli, Biblia kiijtoua kichiua tlen Jehová kinauatia pampa ya eli iTeotsij uan iTata. ¿Kenke kiampa tikijtouaj? Xikitakaj nopa VIDEO uan kiampa tijkuamachilis kenke Biblia kiijtoua Jesús amo eli sanse kej toTeotsij.
Ni textos techpaleuis ma tijkuamachilikaj kenke Jehová uan Jesús amo elij sanse. Xijpouakaj nopa textos uan xijnankilikaj ni tlajtlanili:
Xijpouakaj Lucas 1:30-32.
-
Kej kiijtok nopa iluikaejketl, ¿ajkia eli Jesús uan ajkia eli Jehová “Tlen Más Kipia Tlanauatili”?
Xijpouakaj Marcos 1:10, 11.
-
Kema Jesús moatsonpoliuiltik, ¿tlake kiiljuijkej tlen iluikak?
-
¿Ajkia timoiljuia kinojnotski?
Xijpouakaj Juan 14:28.
-
¿Ajkia kipia miak tlanauatili uan eli “más ueyi”: se tetaj o ikone?
-
¿Tlake kinejki kiijtos Jesús kema kiiljuik Jehová “noTata”?
Xijpouakaj Juan 12:49.
-
¿Moiljuiyaya Jesús ya uan iTata eliyayaj sanse? ¿Ta tlake timoiljuia?
5. Jesús elki nopa Mesías
Biblia kipia miak tlajtolpanextili tlen kinpaleuik maseualmej ma kimatikaj ajkia eliyaya Mesías o katli toTeotsij kitlapejpenik ma kinmakixti nochi maseualmej. Xikitakaj nopa VIDEO kampa kiijtoua kenijkatsa kema Jesús itstoya ipan Tlaltipaktli moaxitik se keski tlajtolpanextili ipan ya.
Xijpouakaj ni tlajtolpanextili ipan Biblia uan xijnankilikaj ni tlajtlanili:
Xijpouakaj Miqueas 5:2 uan xikitakaj kanke tlakatiskia Mesías. b
-
¿Moaxitik ni tlajtolpanextili kema Jesús tlakatki? (Mateo 2:1).
Xijpouakaj Salmo 34:20 uan Zacarías 12:10 uan xikitakaj se keski tlamantli tlen panoskia kema Mesías mikiskia.
-
¿Moaxitik nopa tlajtolpanextili? (Juan 19:33-37).
-
¿Kenke Jesús amo ueltoskia kichiuas ma moaxiti nopa tlajtolpanextili?
-
Ika nochi tlen namantsi tikitakej, ¿ajkia timoiljuia elki Jesús?
6. Tlauel techpaleuis tlaj tikixmatisej Jesús
Biblia kiijtoua kenke moneki kuali tikixmatisej Jesús uan tlake tekitl kineki toTeotsij ma kichiua. Xijpouakaj Juan 14:6, TNM uan 17:3 uan xijnankilikaj ni tlajtlanili:
-
¿Kenke moneki kuali tikixmatisej Jesús?
Jesús eli nopa ojtli pampa techpaleuia ma timouampojchiuakaj iuaya toTeotsij. Nojkia tlamachtik tlen melauak tlen Jehová, uan ika tlen kichijki, uelis tijpiasej nemilistli tlen axkema tlamis.
TLEN SEKINOK KIIJTOUAJ: “Jehová itlajtoltemakauaj amo tlaneltokaj ipan Jesús”.
-
¿Ta tlake titlanankiliskia?
TLEN TIMOMACHTIJKEJ
Jesús eli se iluikaejketl katli kipia miak chikaualistli, eli iKone toTeotsij uan nopa Mesías.
¿Tlake tijyekok?
-
¿Kenke Jesús kiiljuiaj toTeotsij iachtouiKone?
-
¿Tlake kichiuayaya Jesús kema ayamo ualayaya ipan Tlaltipaktli?
-
¿Kenke tijmatij Jesús eli nopa Mesías?
NOJKIA XIKITA NI
Xikita sekinok tlamantli tlen kinextia Jesús eli nopa Mesías.
Xikita tlaj Biblia kiijtoua toTeotsij kiyoliti Jesús sanse kej kema se tlakatl uan se siuatl kipiaj se ininkone.
“¿Kenke Jesús kiiljuiaj iKone toTeotsij?” (Tlamachtili ipan jw.org)
Xikita kenke nopa tlamachtili tlen trinidad amo mokixtijtok ipan Biblia.
Xikita kenijkatsa se siuatl kipatlak inemilis kema kimatki tlake tlamachtia Biblia tlen Jesús.
“Se siuatl judía kipatlak tlen kineltokayaya” (¡Xitlachixtokaj!, mayo 2013)
a Ipan tlamachtili 26 uan 27 moixtoma kenke monejki ma techmakixtikaj uan kenijkatsa Jesús techmakixtia.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
