Jehová kineki nochi ma mochiua kej kinamiki uan amo san kej ueli (1 Corintios 14:33). Yeka itekipanojkauaj nojkia kichiuaj se tlamantli kej kinamiki. ¿Kenijkatsa Jehová kiyakana itlanechikol? ¿Tlake uelis tijchiuasej uan kiampa nochi mochiuas kej kinamiki?

1. ¿Ajkia kinyakana Cristo itokilijkauaj?

“Cristo kipia tlanauatili ika iteopa [o itlanechikol], kineki kiijtos nochi tojuantij tlen tijneltokaj” (Efesios 5:23). Maske Jesús itstok iluikak, ya kiyakana nochi tlen kichiuaj Jehová itekipanojkauaj. Kitekimakak “nopa tlalnamijkatlatekipanojketl tlen nelia temachtli”. Inijuantij elij se keskij ueuejtlakamej katli kuali tlaneltokaj uan nojkia kiniljuiaj Katli kinyakanaj Jehová itlajtoltemakauaj (xijpoua Mateo 24:45-47). Ipan achtoui siglo, apóstoles uan ueuejtlakamej tlen Jerusalén kinyakanayayaj Cristo itokilijkauaj, uan ipan ni tonali Katli kinyakanaj Jehová itlajtoltemakauaj nojkia kiyakanaj toTeotsij itlanechikol ipan nochi Tlaltipaktli (Hechos 15:2). Ni amo kiijtosneki mochiua tlen inijuantij kinekij pampa inijuantij momachtiaj Biblia uan kiampa kimatij tlake kineki Jehová ma kichiuakaj, uan nojkia kikauaj Jesús ma kinyakana.

2. ¿Ajkia elij ueuejtlakamej uan tlake kichiuaj?

Ueuejtlakamej elij toikniuaj katli miak xiuitl kuali kitekipanojtokej Jehová, tlamachtiaj ika Biblia, tlapaleuiaj uan teyolchikauaj ipan tlanechikoli. Inijuantij amo kichiuaj ininteki pampa kinekij ma kintlaxtlauikaj, kichiuaj pampa kinekij kitekipanosej toTeotsij (1 Pedro 5:1, 2). Tlapaleuianij elij toikniuaj katli kinpaleuiaj ueuejtlakamej, teipa inijuantij nojkia uelis tlatekipanosej kej ueuejtlakamej tlaj kichiuasej tlen Biblia kiijtoua kema se akajya kineki tlatekipanos kej ueuejtlakatl.

Katli kinyakanaj Jehová itlajtoltemakauaj kintlapejpeniaj se keskij ueuejtlakamej ma kipaxalokaj tlanechikoli chijchikuasej metstli, ni toikniuaj kinyakanaj uan kinyolchikauaj toikniuaj tlen se keski tlanechikoli. Nojkia, kiitaj tlen Biblia kiijtoua uan kiampa kitlapejpeniaj ajkia uelis tlatekipanos kej ueuejtlakatl o tlapaleuijketl (1 Timoteo 3:1-10, 12; Tito 1:5-9).

3. ¿Tlake moneki kichiuas se Jehová itekipanojka?

Nochi toikniuaj kiueyichiuaj Jehová itoka ipan tlanechikoli kema tlanankiliaj, tlamachtiaj uan kema uikaj. Nojkia kiueyichiuaj kema tlajtolmoyauaj, uan sejse itekipanojka kichiua kampeka tlajtolmoyauas tlen ya ueli (xijpoua Salmo 148:12, 13).

 KUALI XIMOMACHTI

4. Jesús techyakana ika tlaiknelili

Jesús kineki techyakanas. Xijpouakaj Mateo 11:28-30 uan xijnankilikaj ni tlajtlanili:

• ¿Kenijkatsa techyakana Jesús? ¿Kenijkatsa kineki ma tijyolmatikaj?

5. Ueuejtlakamej kichiuaj tlen kiijtouaj

1. A. Ueuejtlakamej kichiuaj kampeka kuali mouampojchijtosej iuaya Jehová uan kinpaleuiaj ininchampoyouaj nojkia kiampa ma kichiuakaj.

2. E. Ueuejtlakamej kintekipachoua tlen kinpano nochi toikniuaj.

3.  I. Ueuejtlakamej kichiuaj kampeka tlajtolmoyauasej.

4. J. Ueuejtlakamej amo san tlamachtiaj, inijuantij nojkia tlapojpouaj uan tlapaleuiaj ipan sekinok tlamantli.

6. Ma timopaleuikaj ininuaya ueuejtlakamej

Biblia techiljuia kenke moneki timopaleuisej ininuaya ueuejtlakamej. Xijpouakaj Hebreos 13:17 uan xijnankilikaj ni tlajtlanili:

• ¿Kenke kiijtoua Biblia moneki tijchiuasej ika pakilistli tlen techiljuiaj katli techyakanaj? ¿Timoiljuia kinamiki kiampa tijchiuasej? ¿Kenke kiampa timoiljuia?

Xijpouakaj Lucas 16:10 uan xijnankilikaj ni tlajtlanili:

• ¿Kenke moneki tijchiuasej tlen kiijtouaj ueuejtlakamej maske timoiljuisej amo tlauel ipati tlen techiljuiaj?

 TLEN TIMOMACHTIJKEJ

Jesús kiyakana itlanechikol. Ueuejtlakamej kikauaj Jesús ma kinyakana, uan tojuantij tijchiuaj ika pakilistli tlen inijuantij techiljuiaj pampa techmokuitlauiaj uan techmachtiaj ika tlen kichiuaj.

¿Tlake tijyekok?

• ¿Ajkia kiyakana toTeotsij itlanechikol?

• ¿Kenijkatsa ueuejtlakamej kinpaleuiaj toikniuaj tlen tlanechikoli?

• ¿Tlake tekitl kichiua sejse Jehová itekipanojka?