TLAMACHTILI 24
¿Ajkia inijuantij elij iluikaeuanij uan tlake kichiuaj?
Jehová kineki ma tikinixmatikaj ichampoyouaj katli itstokej iluikak. Iluikaeuanij elij ichampoyouaj Jehová uan nojkia kiniljuiaj “itelpokauaj toTeko Dios” (Génesis 6:2; Job 38:7). ¿Tlake kiijtoua Biblia tlen iluikaeuanij? ¿Tlake kichiuaj iluikaeuanij? ¿Nochi iluikaeuanij elij ichampoyouaj Jehová?
1. ¿Ajkia inijuantij elij iluikaeuanij?
Jehová achtoui kinchijchijki iluikaeuanij uan teipa Tlaltipaktli. Inijuantij amo uelij tikinitaj uan itstokej iluikak sanse kej Jehová (Hebreos 1:14). Itstokej tlauel miakej iluikaeuanij uan amo sanse kej elij (Apocalipsis 5:11). Inijuantij kichiuaj nochi tlen Jehová kinnauatia (Salmo 103:20). Uejkajkia, toTeotsij kintekiuik iluikaeuanij kema tematiltik se keski tlamantli, kema kinpaleuik itekipanojkauaj uan kema kinmanauik. Ipan ni tonali, iluikaeuanij kinyakanaj toTeotsij itekipanojkauaj uan kiampa kinpantiaj maseualmej katli kinekij kiixmatisej toTeotsij.
2. ¿Ajkia eli Satanás uan amo kuali ajakamej?
Se keskij iluikaeuanij kiijixnamijkej toTeotsij. Katli achtoui tlaijixnamijki elki katli kiiljuiaj “Axkualtlakatl” “yajaya tlen kinkajkayaua nochi tlakamej tlen itstokej kampa ueli ipan Tlaltipaktli” (Apocalipsis 12:9). Satanás kinekiyaya kinnauatis sekinok, yeka kichijki Adán, Eva uan teipa sekinok iluikaeuanij ma kiijixnamikikaj Jehová. Nopa iluikaeuanij katli tlaijixnamijkej kintokaxtiaj amo kuali ajakamej. Jehová ayokmo kinkajki ma itstokaj iluikak, yeka kinkuamajkajki ipan Tlaltipaktli uan nechka kintsontlamiltis (xijpoua Apocalipsis 12:9, 12).
3. ¿Kenijkatsa tekajkayauaj Satanás uan amo kuali ajakamej?
Satanás uan amo kuali ajakamej kintekiuiaj tetlajchiuianij o sekinok tlamantli uan kiampa kinkajkayauaj miakej maseualmej, nopa kichiua ma kinnechkauikaj amo kuali ajakamej. Sekij kipouaj horóscopos, yauij kampa itstokej katli tlamatij, katli tetlajchiuiaj, katli kiitaj tlen panos teipa, katli tetonalitaj uan sekij mopajtiaj kampa curanderos. Sekij kitekiuiaj tlen tetlajchiuianij kiniljuiaj kema mopajtiaj. Uan sekij kinkajkayauaj pampa kiniljuiaj uelij monojnotsaj ininuaya katli miktokej. Maske kiampa kichiuaj, Jehová techiljuia: “Axkema xijtemokaj se tlen kinkamauia mijkatsitsij, niyon tlen tetonalita. Niyon axkema xijtemokaj se tlamatketl” (Levítico 19:31). Jehová kiampa techiljuia pampa kineki techmanauis tlen Satanás uan amo kuali ajakamej, pampa inijuantij elij ikualankaitakauaj uan kinekij techchiuilisej tlen amo kuali.
KUALI XIMOMACHTI
Ma tikitakaj tlake kuali tlamantli kichiuaj iluikaeuanij, tlake ueliskia techpanos tlaj tiasej tikinitatij o tijpiasej tlen kitekiuiaj tetlajchiuianij. Uan tlake uelis tijchiuasej tlaj amo tijnekij Satanás uan amo kuali ajakamej ma techchiuilikaj tlen amo kuali.
4. Iluikaeuanij kinpaleuiaj maseualmej ma kiixmatikaj Jehová
Maske iluikaeuanij amo kinkamanaljuiaj maseualmej, kena kinpaleuiaj toTeotsij itekipanojkauaj ma kinpantikaj maseualmej katli kinekij kiixmatisej toTeotsij. Xijpouakaj Apocalipsis 14:6, 7 uan xijnankilikaj ni tlajtlanili:
-
¿Kenke moneki ma techpaleuikaj iluikaeuanij kema titlajtolmoyauaj?
-
¿Mitsyolchikaua tijmatis iluikaeuanij uelis mitspaleuisej xikinpanti katli kinekij kimatisej tlen Biblia tlamachtia? ¿Kenke kiampa tijyolmati?
5. Amo xia xikinitati yon xijpia tlen kitekiuiaj tetlajchiuianij
Satanás uan amo kuali ajakamej elij ikualankaitakauaj Jehová uan nojkia elij tokualankaitakauaj. Xijpouakaj Lucas 9:38-42 uan xijnankilikaj ni tlajtlanili:
-
¿Tlake kichiuaj ma kinpano maseualmej nopa amo kuali ajakamej?
Amo tijnekij tijchiuasej o tijpiasej yon se tlamantli tlen kinpaktia amo kuali ajakamej. Xijpouakaj Deuteronomio 18:10-12 uan xijnankilikaj ni tlajtlanili:
-
¿Tlake kichiuaj amo kuali ajakamej pampa kinekij technojnotsasej uan ma tijchiuakaj tlen inijuantij kinekij? ¿Tlake tlamantli tikitstok kichiuaj maseualmej kampa ta tiitstok?
-
¿Timoiljuia kuali pampa Jehová amo kineki ma tiakaj tikinitatij o ma tijpiakaj tlen kitekiuiaj tetlajchiuianij? ¿Kenke kiampa timoiljuia?
Xikitakaj nopa VIDEO uan xijnankilikaj ni tlajtlanili:
-
¿Timoiljuia nopa amuleto tlen kipixtoya ikone Palesa nelia kinpaleuiyaya? ¿Kenke kiampa timoiljuia?
-
¿Tlake monejki kichiuas Palesa uan kiampa amo kuali ajakamej amo kichiuiliskiaj tlen amo kuali?
Katli nelnelia elij Cristo itokilijkauaj nochipa mouejkatlalijtokej tlen amo kuali ajakamej. Xijpouakaj Hechos 19:19 uan 1 Corintios 10:21 uan xijnankilikaj ni tlajtlanili:
-
¿Kenke moneki tijtsontlamiltis nochi tlamantli tlen kitekiuiaj tetlajchiuianij?
6. Xikintlani Satanás uan amo kuali ajakamej
Satanás kinyakana amo kuali ajakamej. Uan iluikaeuanij kinyakana “tlayakankailuikaejketl Miguel”, nopa eli seyok tokajyotl tlen kipia Jesús. ¿Timoiljuia Miguel kipia miak chikaualistli? Xijpouakaj Apocalipsis 12:7-9 uan xijnankilikaj ni tlajtlanili:
-
¿Ajkia inijuantij kipiaj miak chikaualistli: Miguel uan iluikaeuanij o Satanás uan amo kuali ajakamej?
-
¿Timoiljuia Cristo itokilijkauaj moneki kinmakasisej Satanás uan amo kuali ajakamej?
Ta uelis tikintlanis Satanás uan amo kuali ajakamej. Xijpouakaj Santiago 4:7 uan xijnankilikaj ni tlajtlanili:
-
¿Kenijkatsa uelis timomanauis tlen Satanás uan amo kuali ajakamej?
TLEN SEKINOK KIIJTOUAJ: “Amo kenijki tlaj timauiltisej o tijtlachilisej películas kampa nesi kitekiuiaj magia o kampa nesij katli ya miktokej. Amo tleno techpanos pampa san ika timoyolpakiltiaj”.
-
¿Kenke tlauel amo kuali tlaj kiampa timoiljuisej?
TLEN TIMOMACHTIJKEJ
Iluikaeuanij techpaleuiaj. Satanás uan amo kuali ajakamej elij ikualankaitakauaj Jehová uan kintekiuiaj tetlajchiuianij pampa kinekij techkajkayauasej.
¿Tlake tijyekok?
-
¿Tlake kichiuaj iluikaeuanij pampa kinekij maseualmej ma kiixmatikaj Jehová?
-
¿Ajkia eli Satanás uan amo kuali ajakamej?
-
¿Kenke amo kinamiki tias tikinitati tetlajchiuianij yon tijpias tlen inijuantij kitekiuiaj?
NOJKIA XIKITA NI
Xikita kenke tikijtouaj Jesús eli nopa tlayakankailuikaejketl Miguel.
“¿Ajkia eli nopa tlayakankailuikaejketl Miguel?” (Tlamachtili ipan jw.org)
Xikita kenke tikijtouaj Diablo amo san eli se tlamantli tlen kiixnextia tlen amo kuali.
Xikita tlake kichijki se siuatl uan kiampa ayokmo kimajmatijkej amo kuali ajakamej.
“Kimatki amo san tlapik tiitstokej” (Tlen Tematiltia, julio 1, 1993)
Xikita kenijkatsa Satanás kinkajkayaua maseualmej ika tlen kichiuaj tetlajchiuianij.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
