TLAMACHTILI 25
¿Kenijkatsa kineki toTeotsij ma tiitstokaj?
Biblia kiijtoua “axuejkaua iyolis niyon se tlakatl. Temitok sejse tonali tlen iyolis ika tlaijiyouilistli” (Job 14:1). ¿Kiampa kineki toTeotsij ma tiitstokaj? Uan tlaj amo, ¿kenijkatsa kineki ma tiitstokaj? ¿Nelnelia kiampa tiitstosej? Xikita kenijkatsa Biblia tlauel techyolchikaua.
1. ¿Kenijkatsa kineki toTeotsij ma itstokaj maseualmej?
Jehová kineki kuali ma itstokaj maseualmej. Kema kinchijchijki Adán uan Eva, kintlalik ipan yejyektsi xochimili Edén. Nopaya “kinteochijki uan kiniljuik: ‘Xikinpiakaj miak inmokoneuaj para inijuantij itstosej kampa ueli ipan nochi Tlaltipaktli para ma tlanauatikaj’” (Génesis 1:28). Jehová kinekiyaya ma kinpiakaj ininkoneuaj, ma kichiuakaj ni Tlaltipaktli se xochimili uan ma kinmokuitlauikaj tlapialmej. Kinekiyaya maseualmej nochipa ma itstokaj uan amo kema ma mokokokaj.
Maske ipan ni tonali amo kiampa tiitstokej, a toTeotsij nojua kineki ma tiitstokaj kej achtouia kinekiyaya (Isaías 46:10, 11). Ya nojua kineki maseualmej katli kineltokaj ma kipiakaj nemilistli tlen axkema tlamis uan kuali ma itstokaj (xijpoua Apocalipsis 21:3, 4).
2. ¿Tlake techpaleuis ma tiyolpakikaj ipan ni tonali?
Jehová kichijki ma tijnekikaj tikixmatisej uan tijueyichiuasej (xijpoua Mateo 5:3, TNM; 5:4-6). ToTeotsij kineki kuali ma timouampojchiuakaj iuaya, “ma tijtokilikaj iojui”, “ma tikiknelikaj uan ma tijtekipanokaj ika nochi toyolo” (Deuteronomio 10:12; Salmo 25:14). Tlaj kiampa tijchiuasej, techpaleuis ma tiyolpakikaj maske tijpiasej kuesoli. Kema tijueyichiuaj Jehová tijmatij amo san tlapik tiitstokej uan tlauel tiyolpakij.
KUALI XIMOMACHTI
Ma tikitakaj kenijkatsa Jehová kinextik tlauel techiknelia kema kichijchijki Tlaltipaktli uan kenijkatsa ipan iTlajtol techiljuia amo san tlapik tiitstokej.
3. Jehová kineki kuali ma tiitstokaj
Xikitakaj nopa VIDEO uan xijnankilikaj ni tlajtlanili:
-
¿Kenke toTeotsij tlauel kuali kichijchijki Tlaltipaktli?
Xijpouakaj Eclesiastés 3:11 uan xijnankilikaj ni tlajtlanili:
-
¿Tlake mitsmachtia tlen Jehová tlen namantsi tijpojkej?
4. Jehová amo kipatlatok tlen mosentlalijtok kichiuas
Xijpouakaj Salmo 37:11, 29 uan Isaías 55:11 uan xijnankilikaj ni tlajtlanili:
-
¿Kenke tijmatij Jehová nojua kineki ma tiitstokaj kej achtouia kinekiyaya?
Se kali tlen amo kuali eltok, uelis sampa kikualchijchiuasej. Nojkia kiampa panos ika Tlaltipaktli, pampa maske maseualmej kinempolojtokej, toTeotsij kikualchijchiuas uan nopaya itstosej maseualmej katli kiikneliaj.
5. Kema tijueyichiuaj Jehová tikitaj amo san tlapik tiitstokej
Kema tijmatij kenke tiitstokej, techpaleuia ma tiyolpakikaj. Xikitakaj nopa VIDEO uan xijnankilikaj ni tlajtlanili:
-
¿Tlake kipaleuik Terumi nelnelia ma yolpaki?
Xijpouakaj Eclesiastés 12:13 uan xijnankilikaj ni tlajtlanili:
-
¿Kenijkatsa uelis tijnextis tijtlaskamatiliaj Jehová pampa kinextijtok tlauel techiknelia?
TLEN SEKINOK KINEKIJ KIMATISEJ: “¿Kenke tiitstokej?”.
-
¿Ta tlake tikijtoskia?
TLEN TIMOMACHTIJKEJ
Jehová kineki nochipa ma tiitstokaj ipan Tlaltipaktli uan ma tiyolpakikaj. Ipan ni tonali nojkia uelis tiyolpakisej tlaj tijueyichiuasej Jehová ika nochi toyolo.
¿Tlake tijyekok?
-
¿Kenijkatsa kinekiyaya Jehová ma itstokaj Adán uan Eva?
-
¿Kenke tijmatij Jehová nojua kineki ma tiitstokaj kej achtouia kinekiyaya?
-
¿Tlake moneki tijchiuas tlaj tijneki nelnelia tiyolpakis?
NOJKIA XIKITA NI
Xikita kenke uelis timotemachisej nelnelia eltoya nopa xochimili Edén.
“Xochimili Edén, ¿nelnelia eltoya o san se istlakatili?” (Tlen Tematiltia, enero 1, 2011)
Xikita kenke uelis timotemachisej Tlaltipaktli amo kema kitsontlamiltisej.
“¿Kitsontlamiltisej Tlaltipaktli?” (Tlamachtili ipan jw.org)
Xikita kenke Biblia kiijtoua amo san tlapik tiitstokej.
“¿Kenke techchijchijki toTeotsij?” (Tlamachtili ipan jw.org)
Xikita kenke maske se tlakatl kipixtoya miak tlamantli, kiitak nopa amo kichiuayaya ma yolpaki.
a Ipan nopa seyok tlamachtili tikitasej kenke amo tiitstokej kej achtouia toTeotsij kinekiyaya.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
