¿Mijki se akajya katli tlauel tikiknelia? Tlaj kiampa mitspanok, uelis timotlajtlanik: “¿Tlake kinpano katli mikij? ¿Uelis sampa nikinitas katli nikiniknelia?”. Ipan ni tlamachtili uan ipan seyok tikitasej kenijkatsa Biblia kinankilia ni tlajtlanili uan nopa tlauel techyolchikauas.

1. ¿Tlake kinpano katli mikij?

Jesús kiijtok katli miktokej kejuak kochtokej. ¿Ipan tlake tlamantli eli sanse kema se akajya miki uan kema se akajya kochi? Kema se akajya kuali kochtok amo kimati tlake pano. Uan kema se akajya miki, ayokmo tleno kikokoua yon tlaijiyouia. Biblia kiijtoua katli “miktokej ayok tleno kimatij” (xijpoua Eclesiastés 9:5).

2. ¿Kenke techpaleuia kema tijmatij tlake kinpano katli mikij?

Miakej maseualmej majmauij mikisej uan nojkia kinmakasij katli miktokej. Tlaj kiampa tijyolmati, tlen Biblia tlamachtia tlauel mitsyolchikauas. Jesús kiijtok: “Tlen melauak inmechtojtomas para uelis innemisej inmajkajtokej” (Juan 8:32). Maske sekij religiones tlamachtiaj nochi tijpiaj se alma tlen amo kema miki, Biblia amo ya nopa tlamachtia. Yeka katli mikij ayokmo tlaijiyouiaj, uan amo uelis techchiuilisej tlen amo kuali pampa ayokmo tleno kimatij. Yeka, amo kinamiki tikiljuisej toTeotsij ma kinpaleui, tikinueyichiuasej o tikiniljuichiuilisej pampa amo tijnekij ma techchiuilikaj tlen amo kuali.

Maske sekij kiijtouaj uelij mokamanaljuiaj ininuaya katli miktokej, nopa amo nelia. Kej namantsi tikitakej, katli “miktokej ayok tleno kimatij”. Katli mokamanaljuiaj ininuaya katli miktokej, amo nelnelia kinnojnotsaj ininteixmatkauaj, elij amo kuali ajakamej katli moixnextiaj kej katli ya mijkej. Yeka, kema tijmatij tlake kinpano katli miktokej, techpaleuia amo ma techkajkayauakaj amo kuali ajakamej. Jehová amo kineki ma tikinnojnotsakaj katli miktokej pampa amo kineki amo kuali ajakamej ma techtlaijiyouiltikaj (xijpoua Deuteronomio 18:10-12).

3. ¿Tlake nelnelia kinpano katli mikij?

Ipan nochi Tlaltipaktli, maseualmej amo sanse tlamantli moiljuiaj tlen mikilistli. Uan miak tlamantli tlen kineltokaj amo melauak.

• Kampa ta tiitstok, ¿tlake kineltokaj maseualmej kinpano katli miktokej?

 4. Tlauel techpaleuia kema tijmatij tlake kinpano katli mikij

Kema tijmatij tlake nelnelia kinpano katli mikij, techpaleuia ayokmo ma tikinmakasikaj katli miktokej. Xijpouakaj Eclesiastés 9:10 uan xijnankilikaj ni tlajtlanili:

• ¿Uelis techchiuilisej tlen amo kuali katli miktokej?

Tlen Biblia tlamachtia techpaleuia amo ma tijchiuakaj tlamantli tlen ika maseualmej kinueyichiuaj o kiniljuichiuiliaj katli miktokej pampa amo kinekij ma kinchiuilikaj tlen amo kuali. Xijpouakaj Isaías 8:19 uan Apocalipsis 4:11 uan xijnankilikaj ni tlajtlanili:

• ¿Kenijkatsa timoiljuia kiyolmati Jehová kema se akajya kinueyichiua katli miktokej o kiniljuia ma kipaleuikaj?

5. Tlauel techyolchikaua kema tijmatij tlake kinpano katli mikij

Miakej kinmachtiaj tlaj nama kichiuaj tlen amo kuali, tlauel tlaijiyouisej kema mikisej. Yeka, techyolchikaua tijmatisej katli mikij amo tlaijiyouiaj, yon katli kichijkej miak tlamantli tlen amo kuali. Xijpouakaj Romanos 6:7, TNM uan xijnankilikaj ni tlajtlanili:

• Biblia kiijtoua kema se akajya miki, kiixtlaua itlajtlakoljuaj, yeka toTeotsij ayokmo kiilnamikilia tlen kichijki uejkajkia. Uajka, ¿timoiljuia katli miktokej tlaijiyouiaj pampa kichijkej tlen amo kuali kema yoltoyaj?

Tlaj nojua kuali tikixmajtias Jehová, mitspaleuis tikitas ya amo kema kintlaijiyouiltiskia katli miktokej. Xijpouakaj Deuteronomio 32:4 uan 1 Juan 4:8 uan xijnankilikaj ni tlajtlanili:

• Ipan ni versículos kiijtoua kenijkatsa eli toTeotsij. Uajka, ¿timoiljuia ya kintlaijiyouiltiskia katli miktokej?

• ¿Mitsyolchikaua kema tijmati tlake kinpano katli miktokej? ¿Kenke mitsyolchikaua?

 TLEN TIMOMACHTIJKEJ

Kema se akajya miki, tlami inemilis. Katli miktokej amo tlaijiyouiaj yon uelij techchiuiliaj tlen amo kuali.

¿Tlake tijyekok?

• ¿Tlake kinpano katli mikij?

• ¿Kenke techpaleuia kema tijmatij tlake kinpano katli mikij?

• ¿Kenke techyolchikaua kema tijmatij tlake kinpano katli mikij?