TLAMACHTILI 35
¿Tlake techpaleuis kuali ma tijtlapejpenikaj tlen tijchiuasej?
Nochi moneki tijtlapejpenisej tlake tijchiuasej. Se keski tlamantli tlen tijtlapejpeniaj uelis kichiuas kuali ma tiitstokaj o amo, uan nojkia uelis techpaleuis ma timouampojchiuakaj iuaya Jehová. Ma timoiljuikaj ipan ni tlamantli: nochi moneki tijtlapejpenisej kanke tiitstosej, kanke titekitisej uan tlaj timosenkauasej o amo. Tlaj kuali tijtlapejpenisej tlen tijchiuasej, tiyolpakisej uan nojkia tijyolpakiltisej Jehová.
1. ¿Kenijkatsa Biblia uelis mitspaleuis kuali xijtlapejpeni tlen tijchiuas?
Kema tijtlapejpenis tijchiuas se tlamantli, achtoui xikiljui Jehová ma mitspaleui. Xijchiua kampeka tikitas ipan Biblia tlake moiljuia Jehová tlen nopa tlamantli (xijpoua Proverbios 2:3-6). Kemantika tikitas Jehová xitlauak kiijtoua tlake moneki tijchiuas, uan tlaj tijchiuas tlen kiijtoua, tlauel mitspaleuis.
Uan, ¿tlake tijchiuaskia tlaj ipan Biblia amo kiijtoua tlake moneki tijchiuas? Jehová mitsyakanas “ipan nopa ojtli tlen kinamiki” tijtokilis (Isaías 48:17). ¿Kenijkatsa mitsyakanas? Ika tlen Biblia tetlajtolmaka. Nopa eli se keski textos tlen techpaleuis ma tijmatikaj tlake moiljuia uan tlake kiyolmati Jehová. Uan kema tijpouaj se tlapoualistli tlen uala ipan Biblia, kichiua ma tijkuamachilikaj nopa. Kema tikitaj kenijkatsa kiita Jehová se keski tlamantli, techpaleuia ma tijchiuakaj tlen ya kipaktia.
2. ¿Tlake moneki tikilnamikis kema tijtlapejpenis tijchiuas se tlamantli?
Biblia kiijtoua “se tlakatl tlen tlalnamiki moiljuia intla kuali para kichiuas se tlamantli o axtle” (Proverbios 14:15). Ni kiijtosneki achtoui moneki kuali timoiljuis nochi tlamantli tlen ueliskia tijchiuas, uan teipa tijtlapejpenis tlen tijchiuas. Uan kema timoiljuis ipan sejse tlen nopa tlamantli, ximotlatsintoki: “¿Tlake textos uelis nechpaleuis? ¿Tlake tlamantli tlen nijtlapejpenis kichiuas kuali ma nijyolmati? ¿Kenijkatsa kiitasej sekinok tlen nijchiuas? ¿Nijyolpakiltis Jehová ika tlen nijtlapejpenis nijchiuas?” (Deuteronomio 32:29).
ToTeotsij kinamiki techiljuis tlake kuali uan tlake amo kuali. Tlaj tijnekij tijpiasej kuali totlalnamikilis moneki tijmatisej tlake moiljuia Jehová uan tlake tlanauatili techmakatok uan tijchiuasej tlen techiljuia. Totlalnamikilis techpaleuia ma tijmatikaj tlake tlamantli kuali uan tlake amo (Romanos 2:14, 15). Tlaj totlalnamikilis kuali techyakana, techpaleuis kuali ma tijtlapejpenikaj tlen tijchiuasej.
KUALI XIMOMACHTI
Ma tikitakaj kenijkatsa totlalnamikilis uan tlen Biblia kiijtoua, techpaleuia kuali ma tijtlapejpenikaj tlen tijchiuasej.
3. Xijkaua Biblia ma mitsyakana
¿Kenijkatsa techpaleuia tlen Biblia tetlajtolmaka kema tijtlapejpeniaj tlake tijchiuasej? Xikitakaj nopa VIDEO uan xijnankilikaj ni tlajtlanili:
-
¿Tlake techkaua Jehová ma tijchiuakaj?
-
¿Kenke Jehová techkaua toselti ma tijtlapejpenikaj tlen tijchiuasej?
-
¿Tlake techmakatok Jehová uan kiampa kuali tijtlapejpenisej tlen tijchiuasej?
Tlaj inkinekij inkiitasej kenijkatsa techpaleuia tlen Biblia tetlajtolmaka, xijpouakaj Efesios 5:15, 16. Teipa ximoiljui kenijkatsa kuali tijtekiuis tonali uan kiampa uelis...
-
... tijpouas Biblia mojmostla.
-
... kuali tiitstos iuaya mosiua o moueue, tielis se kuali tetaj o tenaj o se kuali konetl.
-
... tias tlanechikoli.
4. ¿Tlake uelis tijchiuas tlaj tijneki kuali ma mitsyakana motlalnamikilis?
Kema ipan Biblia uala se tlanauatili, amo ouij tijmatij tijtlapejpenisej tlen tijchiuasej. Uan, ¿tlaj amo onka se tlanauatili? Xikitakaj nopa VIDEO uan xijnankilikaj ni tlajtlanili:
-
Kej tikitakej ipan video, ¿tlake kichijki nopa tosiuaikni pampa kinekiyaya kuali ma kiyakana itlalnamikilis uan kiampa kitlapejpenik tlen Jehová kipaktia?
¿Kenke amo kinamiki tikiljuisej se akajya ma techiljui tlake moneki tijchiuasej? Xijpouakaj Hebreos 5:14 uan xijnankilikaj ni tlajtlanili:
-
Maske ueliskia tikiljuisej se akajya ma techiljui tlake tijchiuasej, ¿kenke sejse tlen tojuantij moneki kimatis tlake kuali uan tlake amo kuali?
-
¿Tlake uelis tijchiuas tlaj tijneki kuali ma mitsyakana motlalnamikilis uan kiampa kuali tijtlapejpenis tlen tijchiuas?
Totlalnamikilis eli kejuak se mapa tlen techpaleuia ma tijmatikaj tlake tijchiuasej ipan tonemilis.
5. Amo xijchiua tlen uelis kinyolkokos inintlalnamikilis sekinok
Amo nochi sanse timoiljuiaj yeka amo tijtlapejpeniaj sanse tlamantli . Uajka, ¿kenijkatsa uelis tijnextisej tijtlepanitaj inintlalnamikilis sekinok? Ma tikitakaj ome tlamantli:
Achtoui tlamantli: Ximoiljui se tosiuaikni kipaktia kitekiuis maquillaje uan yaui ipan se tlanechikoli kampa miakej tosiuaikniuaj amo kuali kiitaj kema se akajya kitekiuia maquillaje.
Xijpouakaj Romanos 15:1 uan 1 Corintios 10:23, 24 uan xijnankilikaj ni tlajtlanili:
-
¿Kenijkatsa ni textos uelis kipaleuis nopa tosiuaikni kuali ma kitlapejpeni tlen kichiuas? Uan ta, ¿tlake tijchiuaskia tlaj tiitstoskia iuaya se akajya katli amo kipaktia kichiuas se tlamantli pampa itlalnamikilis kiyolkokoua maske ta amo kenijki tikita kiampa tijchiuas?
Ompa tlamantli: Maske se toikni kimati Biblia kiijtoua kena uelis tikisej se kentsi tlaili, ya amo kineki kiijis yon se kentsi. Se tonali, kitlaneuij ma monechiko ininuaya sekinok toikniuaj uan kinita inijuantij kiijij se kentsi tlaili.
Xijpouakaj Eclesiastés 7:16 uan Romanos 14:1, 10 uan xijnankilikaj ni tlajtlanili:
-
¿Kenijkatsa ni textos uelis kipaleuis nopa toikni katli amo kineki kiijis tlaili? Uan ta, ¿tlake tijchiuaskia tlaj tikitas se akajya kichiua se tlamantli tlen ta amo tijneki tijchiuas?
¿Tlake mitspaleuis kuali tijtlapejpenis tlen tijchiuas?
1. Xikiljui Jehová ma mitspaleui kuali tijtlapejpenis tlen tijchiuas (Santiago 1:5).
2. Xikita tlake kiijtoua Biblia uan se keski amatlajkuiloli tlen mitspaleuis tijmatis kenijkatsa kiita Jehová nopa tlamantli. Nojkia, uelis tikiniljuis ma mitspaleuikaj toikniuaj katli kuali tlaneltokaj.
3. Ximoiljui kenijkatsa tijyolmatis kema ya tijchijtos tlen tijtlapejpenik uan kenijkatsa kiitasej sekinok.
TLEN SEKINOK KIIJTOUAJ: “Ta uelis tijchiuas tlen tijnekis, maske sekinok amo kinpaktis”.
-
¿Kenke moneki timoiljuisej kenijkatsa kiyolmati toTeotsij uan sekinok kema tijchiuaj se tlamantli?
TLEN TIMOMACHTIJKEJ
Kema timoiljuiaj kenijkatsa kiita toTeotsij se keski tlamantli uan kenijkatsa kiyolmatisej sekinok kema kiitasej tlen tijchiuaj, techpaleuis kuali ma tijtlapejpenikaj tlen tijchiuasej.
¿Tlake tijyekok?
-
¿Tlake mitspaleuis tijtlapejpenis tlen Jehová kipaktia?
-
¿Tlake uelis tijchiuas tlaj tijneki kuali ma mitsyakana motlalnamikilis?
-
¿Kenijkatsa uelis tijnextis tijtlepanita inintlalnamikilis sekinok?
NOJKIA XIKITA NI
¿Tlake tlamantli tlen tijtlapejpenis tijchiuas mitspaleuis nojua kuali timouampojchiuas iuaya toTeotsij?
“Ma tijtlapejpenikaj tlen kiueyichiuas toTeotsij” (Tlen Tematiltia, abril 15, 2011)
Xikita tlake kichiua Jehová kema techiljuia ma tijchiuakaj se keski tlamantli.
Xikita tlake kipaleuik se tlakatl kuali ma kitlapejpeni tlen kichiuas maske ouij kimatki.
Xikita kenijkatsa uelis tijyolpakiltisej Jehová maske ipan Biblia amo uala se tlanauatili kampa kiijtoua tlake moneki tijchiuasej.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
