TLAXELOLI 2
Tlen techtekipachoua: “Kampa ueli [maseualmej] techchiuiliaj tlen axkuali”
“Maske 25 xiuitl tiitstoyaj sansejko, noueue uan na tikixpolojkej nopa amatl kampa nesiyaya timosenkajtokej, nokoneuaj ayokmo kinejkej kitekipanosej Jehová uan na pejki nimokokoua. Nijpixki se kokolistli tlen kichiuayaya ma nimoyolkoko miak tonali. Nijmatiyaya amo tleno nopati; amo tleno nijnekiyaya nijchiuas. Teipa ayokmo niajki tlanechikoli yon nitlajtolmoyajki.” (June)
MASKE tijtekipanouaj toTeotsij, nochi tijpiaj tekipacholi. Se toTeotsij itekipanojka kiijtok: “San nimoyoliljuia tlen miak kuesoli uan san ya nopa nijmati” (Salmo 94:19). Jesús kiijtok ouij tijtekipanoskiaj Jehová ipan itlamia tonali, pampa ipan tonemilis ‘timokuatotoniskiaj ika miak tlamantli’ (Lucas 21:34). ¿Mitstekipachoua pampa amo tijpia tomij, pampa timokokoua o tijpia kuesoli ika mochampoyouaj? ¿Kenijkatsa uelis mitspaleuis Jehová?
“Nopa ueyi chikaualistli tlen tijpiaj”
Moneki ma techpaleuikaj kema tijpiaj kuesoli. Maske apóstol Pablo kiijtok “techchiuiliaj tlen axkuali” uan “techkokouaj”, nojkia kiijtok maske techchiuiliaj nopa, “axtijkajtokej toteki” uan ‘axkema techkajtokej toselti’ yon “axtechtsontlamiltijtokej”. ¿Tlake techpaleuia tikijiyouisej nochi? “Nopa ueyi chikaualistli” katli Jehová techmaka (2 Corintios 4:7-9).
Ximoiljui kenijkatsa toTeotsij mitspaleuijtok ika “nopa chikaualistli”. ¿Tikilnamiki se tlamachtili tlen mitspaleuik tijmatis kenijkatsa Jehová tlauel mitsiknelia? ¿Kuali titlaneltokayaya kema tikinmachtiyaya maseualmej kenijkatsa Jehová kichiuas se xochimili? Kema timonechikouaj uan titlajtolmoyauaj techpaleuia tijpiasej tlayolseuilistli uan amo tlauel timotekipachosej, kiampa tijtekipanouaj Jehová ika pakilistli.
“Xijyejyekokaj toTeko uan inkiitasej [nelia] melauak kuali iyolo”
Maske Jehová kineki nochipa ma tijmoyauakaj iTlanauatijkayo, kemantika amo ueli tijchiuaj nopa (Mateo 6:33; Lucas 13:24). Uelis ayokmo ueli tijchiua tlen tijnekiskia pampa tijpia se kokolistli, se kuesoli ika mochampoyouaj, o pampa moteixmatkauaj o mouampoyouaj mitstlaijiljuiaj. Nojkia pampa tlauel titekiti uelis ayokmo ueli timonechikoua. Yeka nelia tlauel timotekipachoua, pampa moneki tijchiuas miak tlamantli uan amo tijpia miak tonali. Uelis timoiljuia tlen Jehová kineki xijchiua nelia tlauel ouij.
Jehová kimati tlake mitstekipachoua uan amo kema mitsiljuis xijchiua se tlenijki tlen amo tiuelis. Ya kimati kema tlauel timotekipachojtokej o tijpiaj se tlaouijkayotl, moneki ma pano se keski tonali uan kiampa sampa uelis kuali tijtekipanosej (Salmo 103:13, 14).
Ximoiljui kenijkatsa Jehová kimokuitlauik Elías. Se tonali, Elías tlauel motekipachok uan tlauel majmajki, yeka yajki kampa uaktok tlali uan nopaya motlatito. ¿Kenijkatsa kiitak Jehová? ¿Kiiljuik amo kuali tlen kichijki? ¿Kichiualtik ma mokuepa uan ma kichiua tlen kinauatijtoya? Amo. Jehová ompa kititlanki se iluikaejketl ma kiixititi uan ma kitlamakati. Maske panok 40 tonali, Elías nojua motekipachojtoya. ¿Tlake kichijki Jehová? Achtoui, kinextilik ya ueliskia kimanauis. Teipa kiyolchikajki kema kikamanaljuik “ika yamanik” tlajtoli uan amo kitsajtsilik. Nojkia kiiljuik amo itstoya iselti, pampa nojua itstoyaj miakej katli kiueyichiuayayaj Jehová. Nochi ni kipaleuik Elías sampa ma kitekipano Jehová ika miak pakilistli (1 Reyes 19:1-19). ¿Tlake techmachtia ni? Kema Elías tlauel motekipachojtoya, Jehová kiiknelik uan amo kualanki iuaya. Jehová amo moyolpatlatok, ya tlauel mitsiknelia kej kiiknelik Elías.
Amo ximoiljui kenijkatsa tijtekipanouayaya Jehová achtouia, san ximoiljui tlen uelis tijchiuas nama. Tlaj se akajya katli achtouia motlalouayaya sampa kineki motlalos maske ya panotok miak mestli o xiuitl amo kichijtok nopa, moneki kimajtos amo uelis motlalos kej achtouia. Achtoui moneki yolik motlalojtias uan miakpa kichiuas nopa, kiampa teipa uelis sampa motlalos chikauak. Tojuantij nojkia kejuak timotlalouaj, yeka moneki timosentlalisej tijchiuasej se keski tlamantli (1 Corintios 9:24-27). ¿Timoiljuijtok tlake uelis tijchiuas? Uelis timosentlalis tias ipan tlanechikoli. Xikiljui Jehová ma mitspaleui. Kema sampa kuali tijtekipanojtias Jehová, nojkia tikitstias “melauak kuali iyolo” (Salmo 34:8). Nochipa xikilnamikto ni: nochi tlen tijchiua pampa tikiknelia Jehová, ya tlauel kipatiita (Lucas 21:1-4).
Tlen Jehová kineki ma tijchiuakaj amo kema tlauel ouij
“Nopa ueyi tlanechikolistli nelia tlauel nechpaleuik”
¿Kenijkatsa Jehová kipaleuik tosiuaikni June sampa ma kitekipano? Ya kiijtoua: “Nochipa nimomaijtouayaya uan nikiljuiyaya Jehová ma nechpaleui. Se tonali, noyex nechiljuik mochiuaskia se ueyi tlanechikolistli nechka kampa niitstoya, yeka niajki san se tonali. ¡Tlauel niyolpajki pampa sampa niitstoya ininuaya toikniuaj! Ya nopa monekiyaya, nopa ueyi tlanechikolistli nelia tlauel nechpaleuik. Ipan ni tonali sampa nijtekipanoua Jehová, uan nelia tlauel niyolpaki. Nama nijmati amo kinamiki nimouejkatlalis uan moneki nikinkauas toikniuaj ma nechpaleuikaj. Tlauel kuali nijyolmati pampa sampa nijtekipanoua Jehová”.
