TLAXELOLI 4
Kema techyolkokoua tlen tijchijkej: “¡Xinechpajpaka uan xinechkixtili ni notlajtlakol[!]”
“Pejki nitekiti kampa kuali nechtlaxtlauiyayaj, uan maske kuali niitstoya ininuaya nochampoyouaj, noteki kichijki ma nijchiua tlen Jehová kikualankaita. Pejki niiljuichiua kej maseualmej momajtokej kichiuaj, nimokalakik ipan política uan pejki nia ipan se iglesia. Amo nijtekipanok Jehová 40 xiuitl. Uan kej panotiajki tonali, nimoiljuiyaya Jehová amo kema nechtlapojpoljuiskia. Tlauel amo kuali nijyolmatiyaya, pampa maske nijmajtoya tlen Biblia tlamachtia, nijchijki tlen amo kuali.” (Martha)
NELIA tlauel amo kuali tijyolmatij kema timoyolkokouaj pampa titlajtlakolchiuaj. Kej nopa kipanok David, yeka kiijtok: “Notlajtlakoljuaj eltok keja se tlamamali [tlen] tlauel etik tlen axueli nikijiyouia” (Salmo 38:4). Sekij toikniuaj mokuesouaj miak tonali pampa moiljuiaj Jehová amo kema kintlapojpoljuis (2 Corintios 2:7). ¿Timoiljuia amo uelis tijnechkauis Jehová pampa titlajtlakolchijtok? ¿Timoiljuia tlauel amo kuali tlen tijchijtok uan yeka amo kema mitstlapojpoljuis? Amo ximotekipacho, Jehová kineki mitspaleuis.
‘Xiualakaj uan ma tijsenkauakaj tokuesoljuaj’
Jehová nochipa kintlapojpoljuia katli moyolkuepaj uan kineki kinpaleuis. Jesús kiijtok se neskayotl tlen se telpokatl katli kistejki ichaj uan tlauel amo kuali monejnemiltik, teipa nopa telpokatl sampa mokuepki ichaj. ¿Tlake panok kema mokuepki? “Kema aya onasiyaya ichaj, itata kiuejkaitak uan kitlasojtlak. Uan itata motlalojtejki, uan kikuanajnauajki uan kitsoponik.” (Lucas 15:11-20.) Ika ni neskayotl Jesús kinextik Jehová eli kej nopa tetaj katli tlauel teiknelia uan tetlasojtla. ¿Tijmati ouij sampa timonechkauis ika toTeotsij? Jehová mitschixtok uan kineki sampa xijnechkaui.
¿Timoiljuia Jehová amo kema mitstlapojpoljuis pampa tlauel titlajtlakolchijtok? Uajka ximoiljui tlen ijkuilijtok ipan Isaías 1:18: “ToTeko kiijtoua: ‘Xiualakaj nimantsi uan ma tijsenkauakaj to[kuesoljuaj]. Yonke tlauel miak inmotlajtlakoljuaj hasta nesij chichiltik, na nijchiuas ma eli chipauak keja nextli’”. Kena, Jehová nelia tetlapojpoljuia, kejuak kiixpoloua nochi totlajtlakoljuaj.
Jehová amo kineki ma mitsyolkokojto motlalnamikilis. Nelia tlauel kuali tijyolmatij kema toTeotsij techtlapojpoljuia pampa ayokmo tleno techyolkokoua. Tlaj tijneki kuali tijyolmatis, uajka xijchiua kej kichijki David. Ya kiiljuik Jehová: “Nimitspouilis nochi notlaixpanoljuaj” (Salmo 32:5). Xikilnamiki Jehová mitsiljuijtok: “Ma tijsenkauakaj to[kuesoljuaj]”. Xijchiua tlen ya mitsiljuia uan ximomaijto, kiampa uelis tijnechkauis. Xikiljui motlajtlakoljuaj uan nojkia kenijkatsa tijyolmati. David kiiljuik toTeotsij: “¡Xinechpajpaka uan xinechkixtili ni notlajtlakol[!]”. Teipa kiiljuik: “Nopa tlakatl tlen moechkapantlalia uan moyolkuepa, ta tinoTeko Dios, temachtli tijtlakakilia uan axtijuejkamajkaua” (Salmo 51:2, 17).
Nojkia David kikajki nopa tlajtolpanextijketl Natán ma kipaleui (2 Samuel 12:13). Ipan ni tonali Jehová kintlalijtok ueuejtlakamej ipan tlanechikoli. Inijuantij kuali kinmachtijtokej kenijkatsa uelis kinpaleuisej katli tlajtlakolchiuaj uan moyolkuepaj pampa kinekij sampa kuali mouikasej iuaya Jehová. Kema tikamanaltis ininuaya ueuejtlakamej, inijuantij mitspouilisej Biblia uan momaijtosej mouaya, kiampa mitsyolchikauasej uan mitspaleuisej ayokmo tlauel ximotekipacho yon ximoyolkoko, kej nopa sampa kuali titlaneltokas (Santiago 5:14-16).
Jehová amo kineki ma mitsyolkokojto motlalnamikilis
“Paki nopa tlakatl tlen toTeko kitlapojpoljuijtok itlajtlakoljuaj uan kiixpolojtok nochi itlaixpanoljuaj”
Uelis timoiljuia tlauel ouij tikiljuis Jehová titlajtlakolchijtok uan teipa tias tikiniljuiti ueuejtlakamej. David nojkia kej nopa moiljuiyaya. Ya amo aka ‘kipouilijtoya’ itlajtlakoljuaj (Salmo 32:3). Teipa, David kiijtok tlauel kuali kiyolmatki pampa kiijtok tlen kichijtoya uan sampa kuali monejnemiltik.
David sampa itstoya ika pakilistli, yeka kiijtok: “Nelia paki nopa tlakatl tlen toTeko kitlapojpoljuijtok itlajtlakoljuaj uan kiixpolojtok nochi itlaixpanoljuaj” (Salmo 32:1). Nojkia kiiljuik Jehová: “ToTeko, xijchiua para sampa ma niuika, uan nitepouilis nochi tlen tinechchiuilijtok uan na nimitspakilismakas” (Salmo 51:15). David tlauel kuali kiyolmatki uan kitlaskamatilik Jehová, yeka kiueyichijki ininixpa miakej maseualmej.
Jehová amo kineki ma mitsyolkokojto motlalnamikilis. Ya kineki kema tikiniljuis maseualmej tlen mosentlalijtok kichiuas, xikiniljui ika pakilistli, ika nochi moyolo uan ika kuali motlalnamikilis (Salmo 65:1-4). Biblia kiijtoua: “Ximoyolpatlakaj uan ximokuepakaj ika toTeko [Jehová]. Uan yajaya inmechtlapojpoljuis inmotlajtlakoljuaj uan tlen nepa iixtla inmechtitlanilis yankuik tonali tlen kipias miak pakilistli” (Hechos 3:19).
Tosiuaikni Martha kiijtoua: “Nokone nochipa nechtitlaniliyaya pilamochtsitsij Tlen Tematiltia uan ¡Xitlachixtokaj! Yolik sampa pejki nimouampojchiua iuaya Jehová. Maske achtoui tlauel ouij nijmatiyaya, na nimomaijtok uan nikiljuik ma nechtlapojpoljui. ¡Panok 40 xiuitl uan nama sampa nijtekipanoua Jehová! Tlen nechpanok kinextia maske tijtlauelkauaj Jehová miak xiuitl, ya kineki sampa ma tiitstokaj ipan tlanechikoli uan ma tikitakaj kenijkatsa tlauel techiknelia”.
Tlen nojkia mitspaktis tikitas
VIDEOS
Katli kitlauelkajtoya toTeotsij uan sampa mokuepki
Ipan ni tonali miakej telpokamej kitlauelkauaj toTeotsij maske inintatauaj kinmachtijkej kema nojua eliyayaj pilkonetsitsij. Ni película kinextia tlake uelis kichiuas amo kuali ma monejnemiltikaj telpokamej.
