1. ¿Kenijkatsa techpaleuis tlaj tijueyichiuasej toTeotsij kej ya kineki?

JEHOVÁ tlauel techiknelia. Ya kineki techyakanas pampa kineki kuali ma tiitstokaj. Tlaj tijueyichiuasej kej ya kineki, tiyolpakisej uan amo tijpiasej miak kuesoli, techteochiuas uan techmokuitlauis (Isaías 48:17). Maske ipan miak religiones kiijtouaj tlamachtiaj katli melauak, amo tlamachtiaj sanse tlamantli tlen toTeotsij yon tlen kineki ma tijchiuakaj.

2. ¿Kenijkatsa uelis tijmatis kej Jehová kineki ma tijueyichiuakaj, uan tlake uelis mitspaleuis tijkuamachilis?

² ¿Kenijkatsa uelis tijmatis kej Jehová kineki ma tijueyichiuakaj? Amo moneki tijmatis uan tikitas tlake kineltokaj ipan nochi religiones. San moneki timomachtis kej Biblia kiijtoua kinamiki ma titlaueyichiuakaj. Ximoiljui, tlaj mitsiljuiskiaj xijtlapejpeni uan xijnechiko katli nelia tomij uan tlen amo nelia tomij, ¿kenijkatsa tijchiuaskia? ¿Monekiskia tijtsontekontlalis kenijkatsa nochi nopa amo nelia tomij? Amo. Tlaj kuali tijmajtos kenijkatsa nopa nelnelia tomij, mitspaleuis nima tikixmatis nopa amo nelia tomij. Ika religiones nojkia kej nopa pano. Tlaj tijmatis kenijkatsa nopa religión katli melauak, nima tijmatis tlake religiones amo melauak.

3. ¿Kenijkatsa kiijtok Jesús uelis tijueyichiuasej toTeotsij kej kipaktia?

 ³ Moneki tijueyichiuasej Jehová kej ya kineki. Maske miakej moiljuiaj kipaktia nochi religiones, Biblia amo ya nopa tlamachtia. Uan amo kinamiki san tikijtosej tijtokiliaj Jesús, pampa ya kiijtok: ‘Maske miakej nechnotsaj toTeko, amo nochi kalakisej kampa toTeotsij tlanauatia. San yasej katli kichiuaj tlen noTata kineki’. Uajka, tlaj timomachtisej tlen toTeotsij kineki uan tijchiuasej ipan tonemilis, kipaktis kema tijueyichiuasej. Uan katli amo kichiuaj tlen ya kineki, Jesús kiijtok kichiuaj ‘san tlen amo kuali’ (Mateo 7:21-23). Uajka, nopa religión katli amo melauak nojkia kej nopa tomij tlen amo nelia, pampa amo tleno ipati uan san kichiua ma titlaijiyouikaj.

4. ¿Tlake kiixnextia nopa ome ojtli tlen Jesús kiijtok?

⁴ Jehová kineki nochi ma itstokaj nochipa ipan Xochimili. Yeka, moneki tijueyichiuasej uan timonejnemiltisej kej ya kineki. Miakej amo kichiuaj nopa, yeka Jesús kiijtok: “Xikalaki ipan kaltemitl pitsaktsi; pampa tlauexka uan patlauak nopa ojtli katli teuika kampa tetsontlamiltiaj uan miakej kalakij nopaya; uan nopa kaltemitl pitsaktsi uan ojtli katli amo patlauak teuika kampa nemilistli; uan amo miakej kiasij” (Mateo 7:13, 14, TNM). Uajka, katli itstokej ipan religión tlen melauak itstosej nochipa, uan katli itstokej ipan religión katli amo melauak kintsontlamiltisej. Jehová amo aka kineki ma miki, yeka nojua kikajtok nochi ma kiixmatikaj (2 Pedro 3:9). Uajka, kej tijueyichiuaj toTeotsij uelis kichiuas ma tiitstokaj nochipa o ma timikikaj.

5. ¿Kenijkatsa uelis tijmatisej ajkia inijuantij itstokej ipan religión katli melauak?

⁵ ¿Kenijkatsa uelis tijpantis “nopa ojtli [tlen] teuika kampa nemilistli”? Jesús kiijtok tlaj tikinitasej kenijkatsa  monejnemiltiaj katli itstokej ipan religión katli melauak. Yeka Jesús kiijtok: “Inkinixmatisej ajkeya yajuantij intla inkitlachilisej tlen kichiuasej” pampa “nochi kuali kuatinij kipiaj inintlajka tlen kuali” (Mateo 7:16, 17). Uajka, ika tlen kichiuaj uan ika tlen kineltokaj nesi ajkia inijuantij itstokej ipan religión katli melauak. Maske tlajtlakolejkej uan mokuapolouaj, kichiuaj kampeka itstosej kej toTeotsij kineki. Ma tikitakaj chikuasej tlamantli tlen techpaleuis tijmatisej ajkia inijuantij.

6, 7. ¿Kenijkatsa kiitaj Biblia toTeotsij itekipanojkauaj, uan ni kenijkatsa kinextik Jesús?

⁶ Tlamachtiaj tlen uala ipan Biblia. Biblia kiijtoua: “ToTeko temakak nochi nopa tlatsejtseloltik Tlajkuiloli, uan kipia iteki para techmachtia tlen melauak uan techtlakaualtia kema tijchiuaj tlen axmoneki. Uan iTlajtol techtlalnamiktia uan technextilia kejatsa ma timonejnemiltikaj xitlauak. Kena, toTeko techmakatok iTlajtol para techkualtlalis nochi tojuantij tlen tiiaxkauaj para uelis tijchiuasej nochi tlen kuali” (2 Timoteo 3:16, 17). Uan apóstol Pablo kiijtok: “Inkiselijkej iTlajtol toTeko ika pakilistli. Axinkiselijkej san keja itlajtol tlakamej. Inkiselijkej keja iTlajtol toTeko pampa inkimachilijkej para ya nopa tlen melauak elki” (1 Tesalonicenses 2:13). Uajka, ipan religión katli melauak amo kichiuaj uan amo tenextiliaj tlen maseualmej tlamachtiaj o momajtokej kichiuaj. Tlen tlamachtiaj kikixtiaj ipan Biblia.

⁷ Jesús nojkia tlamachtik tlen kiijtoua Biblia. Yeka, kiiljuik iTata: “Motlajtol [...] nelia melauak” (Juan 17:17). Jesús kineltokayaya Biblia nelnelia toTeotsij iTlajtol, yeka tlamachtiyaya san tlen nopaya kiijtoua. Kema kiijtouayaya: “Ijkuilijtok”, teipa kinpouiliyaya tlen uala ipan Biblia (Mateo 4:4, 7, 10). Ipan ni tonali, toTeotsij itekipanojkauaj amo tlamachtiaj san tlen inijuantij moiljuiaj. Nochi tlen  tlamachtiaj kikixtiaj ipan Biblia pampa kineltokaj nelnelia toTeotsij iTlajtol.

8. ¿Kenijkatsa kiueyichiuaj Jehová nopa itekipanojkauaj?

⁸ San Jehová kiueyichiuaj uan temachtiaj itoka. Jesús kiijtok: “San toTeko Dios [Jehová] xijueyichiua uan san ya xijtlepanita” (Mateo 4:10). Yeka, itekipanojkauaj san Jehová kiueyichiuaj, temachtiaj tlake itoka uan nojkia tlake kuajkuali tlamantli kinextia. Ipan Traducción del Nuevo Mundo, Salmo 83:18 kiijtoua: “Ta motoka Jehová, san ta tlauel tiUeyi ipan nochi Tlaltipaktli”. Kema titemachtiaj toTeotsij itoka, tijchiuaj kej Jesús kichijki. Yaya kiiljuik iTata: “Nikinpannextilik ajkeya ta [“nikinmachtik motoka”, TNM] ika ni tlakamej tlen tinechmakatok” (Juan 17:6). Ipan ni tonali, toTeotsij itekipanojkauaj nojkia kinmachtiaj maseualmej toTeotsij itoka, tlen mosentlalijtok kichiuas uan tlake kuajkuali tlamantli kinextia.

9, 10. ¿Kenijkatsa kinextiaj nelnelia moikneliaj toTeotsij itekipanojkauaj?

⁹ Nelnelia moikneliaj. Jesús kiijtok: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:35). Nopa toTeotsij itekipanojkauaj kej nopa moikneliyayaj, yeka nama itstokej sansejko uan amo mokualankaitaj maske sekij chipaktikej, tlatominpiaj o maske euaj ipan sekinok altepemej (xijpoua Colosenses 3:14). Katli itstokej ipan religiones tlen amo melauak amo moikneliaj. Tlaj moikneliskiaj amo kinmiktiskiaj katli euaj ipan seyok altepetl o pampa chipaktikej. ToTeotsij itekipanojkauaj amo yauij kampa onka tlauilankayotl pampa amo kinekij kinmiktisej ininikniuaj yon sekinok maseualmej. Biblia kiijtoua: “Uelis tikinitasej ajkeya yajuantij ikoneuaj toTeko uan ajkeya yajuantij ikoneuaj Axkualtlakatl. Yajaya tlen axkichiua tlen kuali uan axkiniknelia iikniuaj ipan Cristo, yajaya axiaxka toTeko. [...] Moneki timoiknelisej se ika seyok. Ma axtijchiuakaj keja  Caín tlen eltoya iaxka Axkualtlakatl [o Satanás] uan kimiktik iikni” (1 Juan 3:10-12; 4:20, 21).

¹⁰ Cristo itokilijkauaj amo temiktiaj pampa nelnelia teikneliaj. Yeka kitekiuiaj tonali, ininchikaualis uan tlen kipiaj ika mopaleuiaj uan moyolchikauaj (Hebreos 10:24, 25). Mopaleuiaj kema kipiaj kuesoli, amo mokajkayauaj uan kineltokaj kema Biblia kiijtoua ma kinchiuilikaj “tlen kuali nochi tlakamej” (Gálatas 6:10).

11. ¿Kenke tlauel moneki ma tijneltokakaj toTeotsij techmakixtia ika Jesucristo?

¹¹ Kineltokaj toTeotsij techmanauia ika Jesucristo. Biblia kiijtoua: “Axaka seyok tlen uelis techmakixtis tlen totlajtlakoljuaj, pampa toTeko Dios axkitlalijtok seyok tlen kipia tekiuejkayotl ipan ni Tlaltipaktli para techmakixtis” (Hechos 4:12). Ipan tlamachtili makuili tikitakej Jesús kinmakixtik katli tlaneltokaj kema temaktilik inemilis (Mateo 20:28). Jehová kitekitlalik kej Tlanauatijketl uan tekichiuas ipan Tlaltipaktli. Yeka, toTeotsij kineki ma tijneltokakaj Jesús uan ma tijchiuakaj tlen tlamachtik uan kiampa uelis tiitstosej nochipa. Yeka Biblia kiijtoua: “Tlaj se tlakatl kineltoka iKone toTeko, yajaya kipia yolistli para nochipa. Pero tlaj se axkineltoka iKone toTeko, axkipias nopa yolistli” (Juan 3:36).

12. ¿Kenke toTeotsij itekipanojkauaj amo monejnemiltiaj kej sekinok maseualmej?

¹² Amo monejnemiltiaj kej sekinok maseualmej. Kema Pilato kitlajtolsenkauayaya Jesús, Jesús kiiljuik: “Notlanauatilis kampa na nitlanauatia axmokaua ipan ni Tlaltipaktli” (Juan 18:36). Yeka Cristo itokilijkauaj tlen kampa ueli euaj kikauaj ma kinnauati toTeotsij iTlanauatijkayo. Amo mokalakiaj ipan política yon kema maseualmej mokualaniaj. Uan tlaj maseualmej kinekij kinpaleuisej partidos políticos, kinekij mochiuasej tlanauatianij o kitlapejpenisej inintlanauatijka, toTeotsij itekipanojkauaj  amo tleno kiniljuiaj. Maske amo mokalakiaj ipan política, kinneltokaj tlanauatianij, pampa Biblia kinnauatia ma ‘kinneltokakaj tekiuejmej tlen gobierno’ o tlanauatianij (Romanos 13:1). Uan tlaj se tekichijketl technauatiskia ma tijchiuakaj tlen kiixpanoskia toTeotsij, tikijtoskiaj kej nopa apóstoles: “Moneki tijneltokilisej toTeko Dios achtoui uan axtlakamej” (Hechos 5:29; Marcos 12:17).

13. ¿Tlake kineltokaj Jesús itokilijkauaj tlen toTeotsij iTlanauatijkayo, uan tlake kichiuaj?

 ¹³ Tlamachtiaj san toTeotsij iTlanauatijkayo kichiuas kuali ma tiitstokaj. Jesús kiijtok: “Uan tlakamej [o maseualmej] tlakamauitij ni kuali tlamachtili [...] ipan ni Tlaltipaktli para nochi tlakamej ma kimatikaj. Uan teipa ualas itlamia nochi tlen onka” (Mateo 24:14). Jesús itokilijkauaj amo teiljuiaj tlanauatianij uelis kisenkauasej kuesoli, teiljuiaj san toTeotsij iTlanauatijkayo uelis kichiuas (Salmo 146:3). Jesús kiijtok kema timomaijtosej ma tikiljuikaj toTeotsij: “Xitlanauatiki nikaj. Ma kichiuakaj mopakilis nochi ipan ni Tlaltipaktli keja mochijtok nepa iluikak” (Mateo 6:10). Biblia kiijtoua toTeotsij iTlanauatijkayo “kintlamiltis nochi sekinok tlanauatianij uan inintlanauatijkayo [...]. Nopa tlanauatilistli uan nopa Tlanauatijketl tlen toTeko kitlalijtos uejkauas para nochipa” (Daniel 2:44; Apocalipsis 16:14; 19:19-21).

14. ¿Ajkia inijuantij kichijtokej tlen kinamiki kichiuasej ipan religión katli melauak?

¹⁴ Nama ximotlajtlani: “¿Ipan tlake religión tlamachtiaj toTeotsij itoka Jehová uan tlen uala ipan Biblia? ¿Ipan tlake religión nelnelia moikneliaj, tlaneltokaj ipan Jesús, amo monejnemiltiaj kej sekinok maseualmej uan tlamachtiaj san toTeotsij iTlanauatijkayo kichiuas kuali ma tiitstokaj? ¿Ipan tlake religión kichiuaj ni?”. San Jehová itlajtoltemakauaj (xijpoua Isaías 43:10-12).

15. ¿Kenke amo san moneki tijneltokasej kena itstok toTeotsij, uan tlake moneki ma tijchiuakaj?

¹⁵ Tlaj tijneki ma yolpaki toTeotsij amo san moneki tijneltokas itstok pampa amo kuali ajakamej nojkia kineltokaj nopa (Santiago 2:19). Inijuantij amo kichiuaj tlen Jehová kineki, yeka amo kipaktia tlen kichiuaj. ToTeotsij yolpakis tlaj tijneltokasej kena itstok, tijchiuasej tlen ya  kineki, tikisasej ipan religión katli amo melauak uan tiitstosej ipan religión katli melauak.

16. ¿Tlake moneki tijchiuasej tlaj amo tijnekij tiitstosej ipan religión tlen amo melauak?

¹⁶ Apóstol Pablo kiijtok amo ma tiitstokaj ipan religión tlen amo melauak. Yeka kiijkuilok: “ToTeko Dios kiijtoua: ‘Xikintlalkauikaj tlakamej tlen axkineltokaj toTeko. Ximoiyokatlalikaj. Amo xijnechkauikaj tlen axkuali tlen inijuantij kichiuaj. Uan na niinmechselis ika kuali’” (2 Corintios 6:17; Isaías 52:11). Uajka, Cristo itokilijkauaj amo kichiuaj kej sekinok religiones.

17, 18. ¿Tlake kiijtosneki “Ueyi Babilonia”, uan kenke moneki nimantsi ma ‘tikisakaj ipan ya’?

¹⁷ Biblia kitokaxtia “Ueyi Babilonia” nochi religiones tlen amo melauak (Apocalipsis [Revelación] 17:5). * Ipan altepetl Babilonia, pejki onka religiones tlen amo melauak. Ni panok teipa kema itstoya Noé uan ya uetstoya tlauel miak atl. Miak tlamachtili uan tlen momajtokej kichiuaj, pejki mochiua ne Babilonia. Nopaya kiueyichiuayayaj nopa Trinidad. Ipan ni tonali ya nopa tlamachtiaj ipan miak religiones. Uan Biblia kiijtoua san Jehová yaya toTeotsij katli melauak uan Jesucristo iKone (Juan 17:3). Ne Babilonia nojkia kineltokayayaj mijkatsitsij nojua itstoya ininalma uan ueliskiaj tlaijiyouisej kampa tetlaijiyouiltiaj. Nama, ipan miak religiones nojkia ya nopa tlamachtiaj.

¹⁸ Nopa religión katli pejki ne Babilonia momoyajtok ipan ni tonali ipan nochi Tlaltipaktli. Yeka, tikijtouaj nopa Ueyi Babilonia kinixnextia nochi religiones tlen amo melauak katli onka ipan Tlaltipaktli. ToTeotsij nechka kintsontlamiltis religiones tlen amo melauak. ¿Tikita kenke tlauel moneki tikisas ipan religión tlen amo melauak?  Jehová kineki nimantsi ‘xikisa ipan ya’, pampa nojua onka tonali (xijpoua Apocalipsis 18:4 uan 8).

19. ¿Tlake ueliskia tijpias tlaj tijtekipanos Jehová?

¹⁹ Tlaj tikisas ipan religión tlen amo melauak, uelis sekij ayokmo kinekisej mitsnojnotsasej. Uan tlaj tijueyichiuas Jehová ininuaya itekipanojkauaj, tikinpias tlauel miakej mouampoyouaj. Ta nojkia mitspanos kej nopa achtoui Jesús itokilijkauaj katli kikajkej miak tlamantli. Tikinpias miakej moikniuaj, uan kejuak tikinpias tlauel miakej mochampoyouaj katli nelnelia mitsiknelisej uan uelis timotemachis tiitstos nochipa “ipan nopa Tlaltipaktli tlen uala” (xijpoua Marcos 10:28-30). Katli mitstlauelkauasej pampa timomachtia, se tonali uelis nojkia momachtisej Biblia uan nojkia kitekipanosej Jehová.

20. ¿Kenijkatsa itstosej katli kiueyichiuaj toTeotsij ipan religión tlen melauak?

²⁰ ToTeotsij nechka kitlamiltis tlen amo kuali uan kema tekichiuas iTlanauatijkayo itstosej kuali maseualmej (2 Pedro 3:9, 13). ¡Tlauel yejyektsi mochiuas ni Tlaltipaktli! Nopaya onkas san setsi religión kampa kiueyichiuasej toTeotsij kej kinamiki. ¿Mitspaktiskia tijchiuas tlen moneki uan tijtekipanos toTeotsij ininuaya itekipanojkauaj?