MASKE Biblia amo kiijtoua tlake tonali tlakatki Jesús, techpaleuia ma tijmatikaj amo tlakatki ipan diciembre.

¿Kenijkatsa eliyaya tonali ipan diciembre ne Belén? Ipan calendario tlen kitekiuiyayaj judeaeuanij kipixtoya se mestli tlen itoka kislev, ni panoyaya ipan noviembre uan diciembre, kema tlaseseyayaya uan uetsiyaya atl. Teipa peuayaya mestli tebet, ni panoyaya ipan diciembre uan enero, kema tlauel tlaseseya uan tlaseuetsi. Ma tikitakaj ipan Biblia kenijkatsa eliyaya tonali ne Belén.

Ipan Esdras kiijtoua ipan mestli kislev tlauel tlaseseyayaya uan uetsiyaya atl. Kiijtoua “ipan 20 iteki nopa chiknaui mestli [kislev]”, miakej monechikojkej Jerusalén, uan “uiuipikayayaj pampa tlauel uetsiyaya atl”. Uan kiijtoua katli itstoyaj nopaya kiijtojkej: “Ama uetsi atl chikauak uan axuelis tiuejkauasej timokauasej kalteno” (Esdras 10:9, 13; Jeremías 36:22). Yeka, kema nechka eliskia diciembre, tlakamej  kinsentiliyayaj ininborregojuaj uan kintsakuayayaj, pampa ika tlayoua amo ueliskiaj mokauaskiaj kalixpa.

Biblia kiijtoua kema Jesús tlakatki, ipan nopa youali tlakamej kinmokuitlauijtoyaj ininborregojuaj kampa nemiyayaj. Yeka, ipan Lucas kiijtoua nechka Belén ika “tlayoua itstoyaj sekij tlamokuitlauianij tlen kinmokuitlauiyayaj ininborregojuaj kampa potrero” (Lucas 2:8-12). Uajka, tonaya tlatlamakayayaj uan ika tlayoua nopaya mokauayayaj. Tlaj ne Belén, ipan diciembre tlauel tlaseseyayaya uan uetsiyaya atl, ¿timoiljuia nopa tlakamej mokauaskiaj nopaya ika tlayoua? Amo. Ni kinextia Jesús amo tlakatki ipan mestli diciembre. *

Maske Biblia kiijtoua ipan tlake tonali kimiktijkej Jesús, amo kiijtoua kema tlakatki. Ni kinextia nelia tlen kiijtok Salomón: “Más ipati intla nochi mitsixmatij para se tikuali tlakatl uan axpara tijuikas nopa tlaajuiyakayotl tlen más patiyo. Más ipati nopa tonali kema timikisej uan axnopa tonali kema titlakatkej” (Eclesiastés 7:1). Biblia san kiijtoua kenijkatsa tlajtolmoyajki Jesús, kenijkatsa kimiktijkej, uan amo ipan tlake tonali tlakatki.