1, 2. ¿Ajkia inijuantij kinitak Jehová kej iuampoyouaj?

¿AJKIA iuaya timouampojchiuaskia? Uelis iuaya se katli tlalnamiki kej ta, kipaktia tlen ta mitspaktia, monejnemiltia kej toTeotsij kineki, se katli kuali tenojnotsa uan amo tekajkayaua.

² ToTeotsij nojkia kintlapejpenijtok se keskij iuampoyouaj. Ya kiijtok Abraham eliyaya iuampo (xijpoua Isaías 41:8 uan Santiago 2:23). Kiijtok David eliyaya ‘se tlakatl tlen tlauel kiyolpakiltiyaya’ (Hechos 13:22). Uan nojkia kiijtok ‘tlauel kiikneliyaya’ Daniel (Daniel 9:23).

3. ¿Kenke Jehová mouampojchiua san ininuaya se keskij maseualmej?

³ ¿Kenke Jehová kinitak kej iuampoyouaj Abraham, David uan Daniel? Ya kiiljuik Abraham: “Pampa tinechneltokilijtok” (Génesis 22:18). Uajka, Jehová mouampojchiua san ininuaya katli kineltokaj. Yeka kinnauatik israeleuanij: ‘Xijtlakakilikaj notlajtol uan na nielis  niinmoTeko uan inmojuantij inelisej innomaseualjuaj’ (Jeremías 7:23). Tlaj tijneltokas Jehová nojkia uelis timouampojchiuas iuaya.

4, 5. ¿Kenijkatsa kinextia Jehová ichikaualis kema kinpaleuia itekipanojkauaj?

⁴ Tlaj timouampojchiuas iuaya Jehová tlauel mitspaleuis. Biblia kiijtoua ya kineki “kinnextilis iueyichikaualis inijuantij tlen motemachiaj ipan ya ika nochi ininyolo” (2 Crónicas 16:9). ¿Kenijkatsa kinextis toTeotsij ichikaualis kema mitspaleuis? Ipan Salmo 32:8 kiijtoua: “Na [Jehová] nimitstlalnamiktis uan nimitsnextilis nopa ojtli tlen más kuali, tlen moneki ipan timonejnemiltis. Na nimitsconsejomakas uan nimitstlachilijtos”.

⁵ ¡Jehová kiijtoua kuali mitsmokuitlauis! Tlaj tijneltokas kema mitstlajtolmakas, kuali tiitstos. ToTeotsij kineki mitspaleuis xikijiyoui tlayejyekoli uan tlaouijkayotl (xijpoua Salmo 55:22). Tlaj tijtekipanos ika nochi moyolo, uelis timotemachis ipan ya kej katli kiijkuilok ni Salmo: “Nochipa nimoiljuia tlen ta, toTeko, uan pampa tiitstok nonechka, axtleno nopantis” (Salmo 16:8; 63:8). Uajka, Jehová mitspaleuis timonejnemiltis kej ya kipaktia, pampa toTeotsij ikualankaitaka kineki amo kuali ximonejnemilti.

6. ¿Kenijkatsa kinistlakauia maseualmej nopa Satanás?

⁶ Ipan tlamachtili 11 tikitakej Satanás kiijtok Jehová amo kinamiki tlanauatis, san istlakati uan amo kuali tlanauatia, pampa amo kinkajki Adán uan Eva ma kichiuakaj san tlen inijuantij kinekiyayaj. Teipa, kema ya tlajtlakolchijtoyaj, ininkoneuaj momiakilijkej. Satanás nojkia kinistlakauik nochi maseualmej kema kiijtok amo nelia kinekij kiueyichiuasej Jehová. Ya kiijtok: “Maseualmej  amo kitekipanouaj toTeotsij pampa nelnelia kiikneliaj. Tlaj nechkauaskia toTeotsij, nijchiuaskia miakej ma kiijixnamikikaj”. Tlen kipanok Job kinextia nopa. ¿Ajkia eliyaya Job, uan kenijkatsa kinextik san istlakati Satanás?

7, 8. 1) ¿Kenke Job amo eliyaya kej sekinok? 2) ¿Kenijkatsa Diablo kiistlakauik Job?

⁷ Job itstoya kipia se 3,600 xiuitl. Ya kipixtoya kuali iyolo, yeka Jehová kiijtok: “Axaka seyok keja ya. Axaka ueli kiteiljuis ika niyon se tlamantli tlen axkuali. Kichiua nochi tlen xitlauak. Yajaya nechimakasi uan nechtlepanita uan mouejkatlalia tlen nochi tlamantli tlen axkuali” (Job 1:8). Jehová tlauel kipaktik tlen Job kichijki.

⁸ Diablo kiijtok Job amo kiueyichiuayaya toTeotsij ika nochi iyolo. Yeka kiiljuik Jehová: “Yajaya san mitstlepanita pampa nochipa tijmokuitlauijtok iyolis, ifamilia uan nochi tlen kipia. [...] Tijchijtok ma kisa kuali [...] tlen kichiua uan tlauel tijricojchijtok. Yeka mitsueyimati. Pero xijkixtili nochi tlen yajaya kipia uan tikitas intla axmitstelchiuas moixpa” (Job 1:10, 11).

9. ¿Tlake kichijki Jehová kema Satanás kiistlakauik Job, uan kenke kej nopa kichijki?

⁹ Satanás kiijtok Job kitekipanouayaya toTeotsij san pampa kitlamajmakayaya, uan kiijtok tlaj kiyejyekoskiaj kiijixnamikiskia Jehová. Uajka, ¿tlake kichijki kema Diablo kiijtok nopa? Kikajki Satanás ma kiyejyeko, uan kej nopa Job kinextiskia tlaj nelnelia kiikneliyaya toTeotsij.

10. ¿Kenijkatsa kiyejyekojkej Job, uan tlake kichijki?

¹⁰ Satanás nimantsi kiyejyekok Job. Kichijki ma kiichtekilikaj itlapialjuaj, katli mokajtoyaj mijkej, uan nechka kintlamimiktiliaj itekipanojkauaj. Yeka ayokmo kipixki  tomij. Teipa, kema chikauak tlaajakak kimiktilik nopa matlaktli ikoneuaj. Maske ya nopa kipanok, “Job axkichijki niyon se tlajtlakoli niyon axkiteiljuik toTeko” (Job 1:22).

11. 1) ¿Tlake nojua kinejki kinextis Satanás, uan tlake kichijki Jehová? 2) ¿Tlake kichijki Job kema kipixki se amo kuali kokolistli?

¹¹ Satanás sampa kiyejyekok Job kema kiitak amo kiixpanok toTeotsij maske kipolok nochi, mijkej itekipanojkauaj uan ikoneuaj. Uajka Satanás moiljuik tlaj Job kipiaskia se kokolistli, kena kiixpanoskia Jehová. Yeka, kikokolismakak ika tlen tlauel kitlaijiyouiltiskia. Maske Diablo kichiuilik nopa, Job nochipa kineltokak toTeotsij. Yeka Biblia kiijtoua: “Job axtlajtlakolchijki, niyon axkitelchijki toTeko” (Job 2:10).

12. ¿Kenijkatsa kinextik Job nopa Diablo san kiistlakauijtoya?

¹² Job amo kimatiyaya ajkia kichiuilik nochi nopa amo kuali tlamantli. Amo kimatiyaya tlaj Diablo kiistlakauik Jehová uan kiijtok amo kinamiki tlanauatis, uan uelis moiljuik toTeotsij kitlaijiyouiltijtoya (Job 6:4; 16:11-14). Maske Job amo kimatiyaya nopa, amo kema kitlauelkajki Jehová. Uan ika tlen kichijki, kinextik Satanás san kiistlakauiyaya kema kiijtok amo kitekipanoyaya toTeotsij ika nochi iyolo.

13. ¿Tlake panok kema Job amo kitlauelkajki toTeotsij?

¹³ Jehová kinextik Satanás san istlakati kema Job amo kitlauelkajki. Uan Job kuali mouampojchijtoya iuaya Jehová, yeka toTeotsij kiteochijki (Job 42:12-17).

14, 15. ¿Kenke tikijtouaj Satanás kiistlakauik Job uan nochi maseualmej?

¹⁴ Kema Satanás kiistlakauik Job, tojuantij nojkia techistlakauik. Ni tijmatij pampa ipan Proverbios 27:11  kiijtoua: “Xieli titlalnamiki, tinotelpoka, uan techmakas miak pakilistli. Intla tielis se tlalnamijketl, uelis nikinnankilis tlen nechtlaijiljuiaj”. Ni tlajtoli tlen moijkuilok kema ya panotoya miak xiuitl kema miktoya Job, kinextia Satanás nojua kiijixnamiktok toTeotsij uan kinyejyekojtok itekipanojkauaj. Kema timonejnemiltiaj kej Jehová kineki, tijchiuaj ma yolpaki uan tijnextiaj Satanás san istlakati. ¿Mitspaktiskia nojkia tijnextis Diablo san istlakati maske monekis tijpatlas kej timonejnemiltia?

¹⁵ Satanás kiijtok: “Se tlakatl kichiuas miak tlamantli para kimanauis iyolis” (Job 2:4). Kema kiijtok “se tlakatl”, kinextik kiistlakauik Job uan nochi maseualmej. Ni moneki tijmajtos, pampa Diablo kiijtoua ta amo tijtekipanoua toTeotsij ika nochi moyolo. Ya kipaktiskia amo xijneltoka toTeotsij uan amo ximonejnemilti kej kinamiki kema tijpias tlaouijkayotl. ¿Ika tlake ueliskia techkajkayauas Satanás?

16. 1) ¿Tlake tlamantli kitekiuia Satanás tlen ika kitemolia ma tijtlauelkauakaj toTeotsij? 2) ¿Kenijkatsa ueliskia kitekiuis nopa pampa kineki xijtlauelkaua toTeotsij?

¹⁶ Ipan tlamachtili matlaktli tikitakej Satanás kitekiuia miak tlamantli pampa kineki ma tijtlauelkauakaj toTeotsij. Kemantika kichiua “kej se tekuani tlen kitemojtinemi ajkia uelis kitsontlamiltis” (1 Pedro 5:8). Yeka mouampoyouaj, mochampoyouaj o sekinok maseualmej kualanisej pampa timomachtia Biblia o pampa timonejnemiltia kej toTeotsij kineki (Juan 15:19, 20). * Satanás nojkia “moixpatla uan mochiua keja se iluikaejketl” (2 Corintios 11:14). Uajka, Diablo nochipa kitemolis mitskajkayauas uan amo kuali ximonejnemilti. Uelis kichiuas  ximoiljui amo kema tiuelis tijchiuas tlen toTeotsij kipaktia uan ximoyolkoko (Proverbios 24:10). Nopa Satanás katli tlachiua “kej se tekuani” o “mochiua keja se iluikaejketl”, kiijtoua tijtlauelkauas toTeotsij tlaj tijpias tlaouijkayotl. ¿Kenijkatsa uelis tijnextis Satanás san istlakati uan amo kema tijtlauelkauas toTeotsij kej kichijki Job?

17. ¿Kenke tijneltokaj Jehová itlanauatiljuaj?

¹⁷ Tlaj kuali timonejnemiltis tijnextis Satanás san istlakati. ¿Kenijkatsa uelis tijchiuas? Biblia kiijtoua: “Xikiknelikaj toTeko Dios ika nochi inmoyolo, uan ika nochi inmoalma, uan ika nochi inmochikaualis” (Deuteronomio 6:5). Tlaj tlauel tikiknelis toTeotsij tijnekis tijchiuas tlen ya mitsnauatis. Nopa apóstol Juan kiijkuilok: “Uajka para tikikneliaj toTeko kineki kiijtos tikintokiliaj itlanauatiljuaj”. Tlaj tikiknelis Jehová ika nochi moyolo, “itlanauatiljuaj axouij” tijneltokas (1 Juan 5:3).

18, 19. 1) Xikijto tlen Jehová amo kineki ma tijchiuakaj (Xikita nopa recuadro tlen itoka “ Tlen Jehová amo kipaktia”. 2) ¿Kenke Jehová amo technauatiskia ma tijchiuakaj tlen amo tiueliskiaj?

¹⁸ Jehová techiljuia kenijkatsa amo kineki ma timonejnemiltikaj. Xikita nopa recuadro tlen itoka “ Tlen Jehová amo kipaktia”. Nopaya nesi tlen Biblia kiijtoua amo ma tijchiuakaj. Maske timoiljuiskia amo kenijki tlaj tijchiuaskia, kema tijpouas Biblia uan timoyoliljuis kenijkatsa mitspaleuia, tikitas nelia kuali tlen tetlajtolmaka Biblia. Maske ouij tijmatis, uelis monekis ayokmo tiitstos kej achtouia. Katli monejnemiltiaj kej toTeotsij kipaktia tlauel kuali itstokej uan yolpakij (Isaías 48:17, 18). Ta nojkia uelis kej nopa tiitstos. ¿Kenke kej nopa tikijtouaj?

¹⁹ Jehová amo kema technauatiskia ma tijchiuakaj tlen  amo tiueliskiaj (xijpoua Deuteronomio 30:11-14). Ya kuali kimati tlake uelis uan tlake amo uelis tijchiuasej, uan tojuantij amo tijmatij (Salmo 103:14). Ya techpaleuis uan kej nopa uelis tijneltokasej, yeka apóstol Pablo kiijtok: “ToTeko, yajaya temachtli, uan axkikauilis ma inmechyoltilana se tlajtlakoli hasta kampa ayok uelis inkixikosej. Nochipa ipan nopa tlalochtli inmechnextilis kejatsa uelis incholosej para axintlajtlakolchiuasej” (1 Corintios 10:13). Jehová techmakas “ueyi chikaualistli” pampa kineki techpaleuis ma tikijiyouikaj nochi (2 Corintios 4:7).

20. ¿Tlake kuajkuali tlamantli moneki tijnextis ipan monemilis, uan kenke tlauel ipati?

²⁰ Tlaj tijnekij ma yolpaki Jehová moneki tijchiuasej san tlen kipaktia (Romanos 12:9). ¿Tiyolpaki kema tiitstok ininuaya katli tlalnamikij kej ta uan kuali monejnemiltiaj? Jehová nojkia yolpaki kema tijchiua tlen kipaktia. Salmo 15 kiijtoua tlen Jehová kipaktia, uan ajkia inijuantij kinita kej iuampoyouaj (xijpoua Salmo 15:1-5). Inijuantij  kikauaj ma kinpaleui toTeotsij itonal kinextisej kuajkuali tlamantli. Yeka: ‘Teikneliaj, pakij, kipiaj tlaseuilistli, kipiaj ininyolo ininuaya sekinok, kinchiuiliaj sekinok tlen kuali, itstokej temachmej, amo moueyimatij uan monauatiaj kuali’ (Gálatas 5:22, 23).

21. ¿Tlake mitspaleuis tijnextis kuajkuali tlamantli?

²¹ Tlaj nochipa timomachtis Biblia mitspaleuis tijnextis kuajkuali tlamantli. Uan kej timomachtijtias tlen Jehová kineki, nojkia titlalnamikis kej ya (Isaías 30:20, 21). Tlaj tlauel tikiknelis Jehová, tlauel tijnekis timonejnemiltis kej ya kipaktia.

22. ¿Tlake panos tlaj timonejnemiltis kej toTeotsij kipaktia?

²² Moneki tijchiuasej kampeka timonejnemiltisej kej Jehová kipaktia. Biblia kiijtoua kema ayokmo tijchiuaj tlen amo kuali, kejuak timokixtiliaj toyoyo tlen amo kuali uan timokentiaj se yankuik (Colosenses 3:9, 10). Katli kiijkuilok Salmo kiijtok: “Tlen kitokilia itlanauatil toTeko kitlanis miak” (Salmo 19:11). Tlaj timonejnemiltis kej toTeotsij kipaktia tijselis miak tlateochiualistli, tijnextis Satanás san istlakati uan tijchiuas ma yolpaki Jehová.