Nochi katli itstokej Betel kichiuaj miak tekitl uan kinpaleuiaj katli tlajtolmoyauaj ipan se o miak altepemej. Nopaya tlajtolkuepaj, kichiuaj amatlajkuiloli, kiajokuij uan teipa kititlanij ipan tlanechikoli, kichiuaj videos o grabaciones, uan sekinok tlamantli.

Se keskij toikniuaj kiyakanaj tlen mochiua Betel. Katli kinyakanaj Jehová itlajtoltemakauaj kintlaliaj ma kiyakanakaj kali Betel se eyij o kipano eyij ueuejtlakamej tlen uelij kichiuaj ni tekitl. Ni toikniuaj kinmatiltiaj Katli techyakanaj kenijkatsa momiakilijtiauij toikniuaj kampa tlajtolmoyauaj uan tlake tlaouijkayotl onka nopaya. Ni kinpaleuia ma kimatikaj tlake tlamachtili uelis kiijkuilosej teipa ipan amatlajkuiloli, tlake tlamachtili uelis mopanoltis ipan tlanechikoli uan ipan uejueyi tlanechikolistli. Kemantika Katli kinyakanaj Jehová itlajtoltemakauaj kititlanij se toikni ma kinpaxaloti katli tekitij Betel, uan ma kiniljui kenijkatsa ma kichiuakaj ininteki Katli kiyakanaj Betel (Proverbios 11:14). Kema ni toikni kinpaxaloua mochiua se ueyi tlanechikolistli tlen tlauel ipati, nopaya ni toikni kipanoltia se tlamachtili tlen ika kinyolchikaua katli itstokej ipan nopa altepemej.

Kinpaleuiaj ipan tlanechikoli. Ipan Betel kiijtouaj tlaj kena uelis kipeualtisej se yankuik tlanechikoli. Kiyakanaj nopa tekitl tlen kichiuaj precursores, misioneros uan toikniuaj katli tepaxalojtinemij ipan sejse tlanechikoli. Kiijtouaj kanke uan kema mochiuas uejueyi tlanechikolistli, kanke uan kenijkatsa mochiuas sekinok kali kampa timosentilisej uan kititlanij amatlajkuiloli ipan sejse tlanechikoli. Nochi tlen mochiua Betel techpaleuia ma titlajtolmoyauakaj kej kinamiki (1 Corintios 14:33, 40).

• Ika tlen kichiuaj Katli kiyakanaj Betel, ¿kenijkatsa kinpaleuiaj Katli kinyakanaj Jehová itlajtoltemakauaj?

• ¿Tlake tekitl kichiuaj ipan Betel?