Biblia kiijtok teipa kema mikiskia Cristo, sekij tlamachtiskiaj tlen amo uala ipan Biblia (Hechos 20:29, 30). Uan ya nopa panok. Kimanelojkej tlen tlamachtik Jesús ika tlen temachtiyayaj ipan sekinok religiones (2 Timoteo 4:3, 4). Uajka, ¿kenke tijmatij tlen tijkuamachilijtokej nelnelia tlamachtia Biblia?

Jehová kichijki ma kikuamachilikaj tlen melauak. Uejkajkia toTeotsij kiijtok ipan itlamia ni tonali ‘momiakiliskia tlamatilistli’ (Daniel 12:4). Ipan xiuitl 1870, katli kinekiyayaj kimatisej tlen nelnelia tlamachtia Biblia, kiitakej tlen tlamachtiyayaj ipan miak religiones amo kikixtiyayaj ipan Biblia. Inoj kichijki ma kitemokaj tlen nelia tlamachtia toTeotsij iTlajtol, uan Jehová kinpaleuik ma kikuamachilikaj.

Tlakamej katli kuali ininyolo kuali momachtijkej Biblia. Katli achtoui momachtijkej Biblia ika nochi ininyolo, nojkia momachtijkej kej nama tojuantij tikixtomaj sejse tlamachtili. Kema kiitayayaj ouij se tlamachtili, kitemouayayaj sekinok textos tlen kinpaleuiyaya ma kikuamachilikaj uan kema nochi sanse kikuamachiliyayaj kenijkatsa kinamiki tlen kiijtoua ipan sekinok textos, kiijkuilouayayaj. Uajka kikajkej Biblia iselti ma kiixtoma tlamachtili tlen melauak; kej toTeotsij itoka, iTlanauatijkayo, tlen toTeotsij mosentlalijtok temakas, tlen kichiuas ipan Tlaltipaktli, tlake kinpano katli mikij uan kenijkatsa moyolkuisej. Tlen momachtijkej kichijki ayokmo ma kineltokakaj uan ayokmo ma kichiuakaj tlen amo xitlauak (Juan 8:31, 32).

Ipan xiuitl 1879 kikuamachilijkej moaxitijtoya nopa tonali kema monekiskia momoyauas toTeotsij iTlajtol kampa ueli. Ipan nopa xiuitl nojkia pejki mochiua Tlen Tematiltia tlen Jehová iTlanauatijkayo, uan nama ni pilamochtsi nojua mochiua. Ipan ni tonali titlajtolmoyauaj ipan 240 altepemej uan ipan kipano 750 tlajtoli. ¡Amo kema kej nopa titlajtolmoyajtoyaj!

• ¿Tlake kichijkej ika nopa tlamachtili katli nelnelia uala ipan Biblia teipa kema mijki Cristo?

• ¿Kenijkatsa sampa kipantijkej tlen nelnelia tlamachtia toTeotsij iTlajtol?