Nochi kali kampa timosentiliaj kipia toTeotsij itoka, yeka tikitaj se tlateochiualistli kema nochi tojuantij tijmokuitlauiaj, titlapaleuiaj kuali ma nesi uan ma amo sokiyo elto. Kej nopa nojkia tijueyichiuaj toTeotsij.

Ma titlapaleuikaj titlachpanasej uan ika sekinok tekitl kema tlami tlanechikoli. Kema tlami sejse tlanechikoli toikniuaj tlachpanaj ika pakilistli kampa mosentiliaj. Uan kemantika tlauel kuali tlachpanaj. Se ueuejtlakatl o se tlapaleuijketl kiniljuia nochi tlen moneki mochiuas; kej tlachpanasej, tlapajpakasej, tlapojpouasej, kikualtlalisej sillas, kipajpakasej baños, tlasoltepeuasej uan tlameuasej kalixpa. Uan sejse xiuitl nojkia tlauel kuali tlachpanaj uan tlapajpakaj. Tlaj konemej nojkia kinnauatisej ma kichiuakaj se keski tlamantli, uajka kinmachtisej moneki kitlepanitasej nopa kali kampa titlaueyichiuaj (Eclesiastés 5:1).

Ma titlapaleuikaj kema kikualchijchiuaj kampa timosentiliaj. Sejse xiuitl kuali kitlachiliaj nopa kali ika kalijtik uan ika kalixpa, ni kinpaleuia kuali ma elto uan ma kiitakaj tlake moneki kikualchijchiuasej, kej nopa teipa amo monekis kitekiuisej miak tomij (2 Crónicas 24:13; 34:10). Kinamiki ma tijueyichiuakaj toTeotsij ipan se kali tlen amo sokiyo uan tlen kuali eltok. Tlaj titlapaleuisej kema mokualchijchiuas kampa timosentiliaj, tijnextisej tijpatiitaj ni tekitl uan tlauel tikikneliaj Jehová (Salmo 122:1). Ni nojkia uelis kichiuas kuali ma techitakaj kampa tiitstokej (2 Corintios 6:3).

• ¿Kenke kampa timosentiliaj moneki kuali eltos uan kuali nesis?

• ¿Tlake tekitl mochiua uan kej nopa amo sokiyo eltok kampa timosentiliaj?