Kema fariseos kichiuayayaj se tlamantli, kichiuayayaj pampa kinekiyayaj sekinok kuali ma kinitakaj. Kichiuayayaj tlen kuali pampa kinekiyayaj sekinok ma kinitakaj, kej kema momaijtouayayaj kampa itstoyaj miakej maseualmej. Kitsontekontlaliyayaj miak tlamantli tlen kiompauiyayaj kema momaijtouayayaj ojtipa uan ipan sinagogas pampa kinekiyayaj ma kinkakikaj. Yeka maseualmej kisentlachilijkej Jesús kema kiijtok: “Amo ximomaijto kej fariseos, pampa inijuantij moiljuiaj tlaj uejkauas kamanaltitosej, toTeotsij kinitas tlauel ininpatij, nopa amo nelia. Kema timomaijtoua, san iuaya Jehová timonojnotstok. Amo san xikompaui tlen tikijtos. Jehová kineki xikiljui tlen nelia tijyolmati”.

 Jesús nojua kiijtok kenijkatsa timomaijtosej: “ToTata tlen tiitstok nepa iluikak, ma kiueyichiuakaj motoka. Ma uala moTlanauatijkayo. Ma mochiua mopakilis ipan Tlaltipaktli uan ipan iluikak”. Jesús nojkia kiniljuik ma kitlajtlanikaj toTeotsij ma kinmaka tlen kikuasej mojmostla, ma kintlapojpoljui uan sekinok tlamantli tlen kinpolos.

Jesús nojkia kiijtok: “Nochipa ximomaijtokaj. Nojua xitlajtlani moTata Jehová kuajkuali tlamantli. Nochi tetajmej kinekij kinmakasej ininkoneuaj tlen kuali. Tlaj mokone mitstlajtlanis pantsi, ¿tijmakas se tetl? O tlaj mitstlajtlanis se michij, ¿tijmakas se kouatl?”.

Teipa Jesús kiijtok tlen kinekiyaya kinmachtis: “Tlaj se tetaj kinmaka tlen kuali ikoneuaj, ¡uajka achi más toTeko nojkia inmechmakas itonal! San moneki xitlajtlanikaj”. ¿Tijchiua tlen Jesús kiijtok? ¿Tlake titlajtlania Jehová kema timomaijtoua?