Jesús ueliyaya kinchikaua uan kinyolkui maseualmej. Nojkia, ueliyaya kitlakaualtia ajakatl uan atl. Kema tlanki momaijtoua ipan nopa tepetl, ontlachixki ipan ueyi atl Galilea uan kiitak chikauak tlaajakayaya. Maske iapóstoles kichiuayayaj kampeka kiuikasej ne seyok nali nopa akali, nopa ajakatl amo kinkauayaya. Yeka Jesús temok uan pejki nejnemi aixko uan yajki kampa itstoyaj. Kema kiitakej se akajya nejnentiauiyaya, tlauel momajmatijkej. Uan Jesús kiniljuik: “Na ni Jesús. Amo ximomajmatikaj”.

Pedro kiijtok: “ToTeko, tlaj ta tiJesús, xinechiljui ma nia kampa tiitstok”. Uan Jesús kiiljuik: “¡Xiuala!”. Yeka Pedro temok tlen nopa akali uan nejnentiajki aixko kampa itstoya Jesús maske chikauak tlaajakayaya. Uan kema Pedro kinechkauijtiauiyaya Jesús, kiitak tlauel tlaajakayaya uan momajmatik. Kema pejki atsonpoliui, chikauak kiijtok: “¡NoTeko, xinechpaleui!”. Jesús kimaitskik uan kiiljuik: “¿Kenke timomajmatik? ¿Amo kuali tinechneltoka?”.

Jesús uan Pedro tlejkokej ipan nopa akali, uan ayokmo tlaajakak. ¿Kenijkatsa timoiljuia kiyolmatkej nopa apóstoles? Kiijtojkej: “Ta nelia tieli toTeotsij iKone”.

Amo san ipan nopa tonali Jesús kitlakaualtik ajakatl. Ipan seyok tonali, kema Jesús uan iapóstoles yauiyayaj ipan ueyi atl, Jesús kochki ipan nopa akali. Kema kochtoya, chikauak pejki tlaajaka. Nopa atl chikauak mokojkoxoniyaya uan kiojoliniyaya nopa akali, uan nopa atl pejki kalaki ipan nopa akali. Nopa apóstoles kiixitijkej Jesús uan chikauak kiiljuijkej: “¡ToTeko, timikisej! ¡Xitechpaleui!”. Jesús mejki uan kiiljuik nopa ueyi atl: “¡Amo ximolini! ¡San xielto!”. Uan ayokmo tlaajakak uan nopa ueyi atl ayokmo mojmolinik. Teipa Jesús kintlajtlanik iapóstoles: “¿Amo intlaneltokaj?”. Uan inijuantij kiijtojkej: “¡Kinauatia ajakatl uan ueyi atl!”. Nopa apóstoles kikuamachilijkej tlaj nelia motemachiyayaj ipan Jesús, amo monekiyaya majmauisej.