Kema ya panotoya nopa Pascua, Jesús uan itokilijkauaj tlakuepilijkej Galilea. Kema tlakuepiliyayaj, panokej Samaria uan moketskej nechka altepetl Sicar, ipan se ameli tlen uejkajkia Jacob kichijtoya. Jesús nopaya mosiajkajki uan itokilijkauaj yajkej kikouatoj tlakualistli.

Se siuatl atlakuito, uan Jesús kiiljuik: “Xinechmaka kentsi atl”. Nopa siuatl kiiljuik: “¿Kenke tinechnojnotsa tlaj na nisamariaejketl? Judíos amo kinnojnotsaj samariaeuanij”. Jesús kiiljuik: “Tlaj tijmatiskia ajkia na, ta tinechiljuiskia ma nimitsmaka atl, uan na nimitsmakaskia atl tlen temaka yolistli”. Nopa siuatl kitlajtlanilik: “¿Tlake tikijtosneki? Amo tijpia tlen ika tijkixtis atl”. Jesús kinankilik: “Katli kiis nopa atl tlen na nitemaka, ayokmo kema amikis”. Nopa siuatl kiijtok: “Noteko, xinechmaka nopa atl”.

Teipa Jesús kiiljuik: “Xijnotsati moueue”. Uan ya kiiljuik: “Amo nijpia noueue”. Jesús kiiljuik: “Melauak tlen tikijtoua, pampa tikinpixki makuiltij moueuejuaj uan katli nama iuaya tiitstok, amo moueue”. Nopa siuatl kiijtok: “Nimoiljuia titlajtolpanextijketl. Ipan noaltepe kiijtouaj uelis tijueyichiuasej toTeotsij ipan ni tepetl, uan judíos kiijtouaj ma tijueyichuakaj ne Jerusalén. Na nimoiljuia kema asiki Mesías, ya techmachtiki kenijkatsa kinamiki tijueyichiuasej toTeotsij”. Uajka Jesús kiiljuik tlen amo aka kiiljuijtoya: “Na nieli nopa Mesías”.

Nopa siuatl nimantsi yajki ialtepe uan kiniljuito samariaeuanij: “Nimoiljuia nijpantik nopa Mesías. Kimati nochi tlen nijchijtok. Xiualakaj  nouaya uan ma tikitatij”. Nopa maseualmej yajkej iuaya kampa nopa ameli, uan kikakitoj tlen Jesús tlamachtiyaya.

Uajka, samariaeuanij kiiljuijkej Jesús ma mokaua ininuaya. Jesús mokajki ome tonali, uan kinmachtik miak tlamantli. Uan miakej tlaneltokakej ipan ya. Teipa kiiljuijkej nopa siuatl: “Nama tijkaktokej tlen ni tlakatl tlamachtia, yeka tijneltokaj yaya kinmakixtis nochi tlakamej ipan Tlaltipaktli”.