TLAMACHTILI 89
Pedro kiijtok amo kiixmatiyaya Jesús
Kema Jesús nojua itstoya ininuaya iapóstoles ipan nopa kali kampa tlakuajkej, kiniljuik: “Nochi inmojuantij innechtlauelkauasej ni youali”. Pedro kiiljuik: “Na amo nijchiuas. Maske sekinok mitstlauelkauasej, na amo kema nimitstlauelkauas”. Jesús kinankilik Pedro: “Kema ayamo tsajtsitos se kuapelech, ta expa tikijtojtos amo tinechixmati”.
Kema nopa soldados kiuikakej Jesús ichaj Caifás, nopa apóstoles cholojkej. San omej yajkej ininuaya nopa maseualmej. Se, eliyaya Pedro. Asito Caifás ichaj uan mokajki kalteno, uan monechkauik kampa tlipitstoyaj pampa kinekiyaya mototonilis. Nopaya se siuatl kiixtlachilik uan kiiljuik: “¡Na nimitsixmati! ¡Ta tinemiyaya iuaya Jesús!”.
Pedro kiijtok: “Amo. Nopa amo melauak. Amo nijmati tlake tikijtoua”, uan yajki kampa eltoya puerta. Uajka seyok siuatl kiitak uan kiniljuik nopa maseualmej: “¡Ni tlakatl nojkia nemiyaya iuaya Jesús!”. Pedro kiniljuik: “¡Yon kentsi amo nijmati ajkia nopa Jesús!”. Nojkia se tlakatl kiijtok: “Ta nojkia tinemiyaya ininuaya. Nima nesi pampa tikamanalti kej galileaeuanij, sanse kej Jesús”. Uan Pedro sampa kiijtok: “¡Nelia amo nikixmati!”.
Uajka se kuapelech tsajtsik. Pedro kiitak Jesús kitlachilijtoya uan kiilnamijki tlen kiiljuijtoya. Yeka kistejki uan tlauel mochokilik.
Katli itstoyaj ipan Sanedrín mosentilijtoyaj Caifás ichaj uan moiljuiyayaj kenijkatsa kitlajtolsenkauaskiaj Jesús. Mosentlalijtoyaj kimiktisej uan kitemoliyayaj kenijkatsa kichiuasej. Inijuantij amo kipantiyayaj yon se tlamantli tlen ika kiteiljuiskiaj. Teipa Caifás kitlajtlanik Jesús: “¿TiiKone toTeotsij?”. Jesús kinankilik: “Kena, na niiKone”. Uajka Caifás kiijtok: “Ayokmo moneki tijtemosej ika tlake titeiljuisej. ¡Kiixpanotok toTeotsij!”. Katli itstoyaj ipan Sanedrín nojkia kiijtojkej: “¡Ni tlakatl moneki mikis!”. Uajka kiixtlatsinijkej Jesús, kiixchajchakej, kiixtsajkej, kiuijuitejkej uan kiiljuijkej: “¡Tlaj tieli se tlajtolpanextijketl, xitechiljui ajkia mitsmakilik!”.
Kema tlaneski, kiuikakej Jesús kampa mosentilijtoyaj katli itstoyaj ipan Sanedrín uan sampa kitlajtlanijkej: “¿Ta tiiKone toTeotsij?”. Jesús kinankilik: “Kena. Inmojuantij inkiijtojtokej na niiKone”. Uajka kiijtojkej Jesús kiixpanotoya toTeotsij uan kiuikakej kampa itstoya nopa tlanauatijketl Poncio Pilato. ¿Tlake panok nopaya? Tikitasej ipan seyok tlamachtili.
“Nechka nopa hora [...] kema nochi inmosemanasej [uan] sejse kitemos kampa mochololtis. Uan innechkajteuasej noselti. Pero nelia axniitstos noselti pampa noTata itstok nouaya” (Juan 16:32).
