Kema Pablo ika expa tlajtolmoyauato uejka, asito Jerusalén. Nopaya kitsajkej. Se youali kema tsaktoya, Jesús kiiljuik kejuak ipan se temiktli: “Tias Roma uan titlajtolmoyauas ipan nopa altepetl”. Uajka Pablo kikixtijkej tlen Jerusalén uan kiuikakej Cesarea. Nopaya tsaktoya ome xiuitl. Se tonali, kema Festo kitlajtolsenkauayaya, Pablo kiiljuik: “Nijneki César ma nechtlajtolsenkaua ne Roma”. Festo kinankilik: “Tlaj tijneki César ma mitstlajtolsenkaua, uajka nimitstitlanis kampa itstok César”. Uajka Pablo kiuikakej ipan se akali tlen yauiyaya Roma. Lucas uan Aristarco yajkej iuaya.

Kema itstoyaj ipan ueyi atl, pejki chikauak tlaajaka uan uejkajki miak tonali. Nochi moiljuiyayaj mikiskiaj. Yeka Pablo kiniljuik: “Ipan se temiktli se iluikaejketl nechiljuik: ‘Amo ximajmaui. Tiasiti Roma, uan nochi tlen itstokej ipan ni akali momanauisej’. Yeka, ¡amo ximajmauikaj! Amo timikisej”.

Kema kiuikayaya 14 tonali tlauel tlaajakatoya, kiitakej itstoyaj nechka atenteno. Eliyaya nopa isla Malta. Nopa akali kuatakanito uan tlamixolejki, uan nopa 276 katli nopaya yauiyayaj, momanauijkej. Sekij ajkitiajkej uan sekinok kitekiuijkej uapali tlen nopa akali uan kiampa asitoj atenteno. Maltaeuanij kinmokuitlauijkej, nojkia tlipitskej, kiampa ueliskiaj mototonilisej.

Kema ya panotoya eyi metstli, nopa soldados kiuikakej Pablo ne Roma ipan seyok akali. Toikniuaj kiselitoj kema asito. Kema Pablo kinitak, kitlaskamatilik toTeotsij uan tlauel moyolchikajki. Maske Pablo tsaktoya, kikajkej ma mokaua ipan se kali kampa se soldado kimokuitlauiyaya. Nopaya mokajki ome xiuitl. Maseualmej kipaxalouayayaj, uan ya kinkamanaljuiyaya tlen toTeotsij iTlanauatijkayo uan kinmachtiyaya tlen Jesús. Pablo nojkia kintlajkuiljuilik tlanechikoli tlen onkayaya ipan Asia Menor uan Judea. Jehová kitekiuik Pablo uan kiampa momoyajki nopa kuali tlamachtili ipan uejueyi altepemej.