Kema apóstol Juan tsaktoya ne Patmos, Jesús kejuak ipan se temiktli o visión kinextilik 16 imiakpa se keski tlamantli tlen panoskia teipa. Juan kiitak kenijkatsa Jehová kiueyichiuas itoka, kenijkatsa peuaskia tekichiuas iTlanauatijkayo uan kenijkatsa mochiuas ipakilis ipan Tlaltipaktli uan ipan iluikak.

Juan kiitak kenijkatsa Jehová moseuijtok ipan se yejyektsi trono nepa iluikak. Uan itstokej 24 ueuejtlakamej katli kiyaualojtokej nopa trono. Ininyoyo eli chipauak uan kipixtokej se corona tlen oro. Nopa trono tlauijtok kejuak tlapetlanilotl uan kakistitok kejuak tlatomonilotl. Nopa 24 ueuejtlakamej motlankuaketstokej iixpa Jehová uan kiueyichiuaj. Juan kiitak seyok tlamantli; kinitak miakej maseualmej kiueyichiuaj Jehová, katli euaj tlen nochi altepemej, pilaltepetsitsij uan kamanaltij miak tlajtoli. Uan kinyakantok Jesús, nopa Pilborregojtsi, uan kinuika kampa onka atl tlen temaka nemilistli. Teipa, Juan nojkia kiitak kema Jesús peua tekichiua kej Tlanauatijketl ne iluikak ininuaya nopa 24 ueuejtlakamej. Teipa, Juan kiitak kenijkatsa Jesús moteuia iuaya Satanás, nopa Dragón, uan iajakauaj. Jesús kinkixtia tlen iluikak uan kinkuamajkaua ipan Tlaltipaktli.

 Teipa, Juan kiitak nopa Pilborregojtsi uan nopa 144,000 itstokej ipan nopa tepetl Sión. Nojkia kiitak se iluikaejketl katli patlantinemi ipan nochi Tlaltipaktli uan kiijtojtinemi: “Xijueyichiuakaj toTeotsij uan xijueyimatikaj”.

Juan nojkia kiitak nopa ueyi tlauilankayotl Armagedón. Ipan nopa tlauilankayotl, Jesús uan itlateuijkauaj kitsontlamiltiaj nochi tlen Satanás kinauatia. Teipa, Juan kiitak ipan iluikak uan ipan Tlaltipaktli nochi kuali mouikaj, itstokej sansejko uan ika tlaseuilistli. Jehová kitsontlamiltia Satanás uan nochi katli kitokiliaj. Nochi katli itstokej ipan iluikak uan ipan Tlaltipaktli, kitlepanitaj Jehová itoka uan san ya kiueyichiuaj.