Jehová kiiljuik Moisés: “Xitlejko kampa niitstok ipan ni tepetl. Nimitsmakas nopa tepatlaktli kampa nikijkuilos nopa tlanauatili”. Moisés tlejkok uan mokajki nopaya 40 tonali uan 40 youali. Kema nopaya itstoya, Jehová kiijkuilok nopa Matlaktli Tlanauatili ipan ome tepatlaktli uan kimakak Moisés.

Teipa, israeleuanij moiljuijkej Moisés kintlauelkajtoya. Yeka kiiljuijkej Aarón: “¡Tijnekij se akajya ma techyakana. Xitechchiuili se teotsij!”. Aarón kinnankilik: “Xijualikakaj oro tlen inkipixtokej”. Uajka Aarón kiatilik nopa oro tlen kimakakej uan kichijchijki se becerro. Uan israeleuanij kiijtojkej: “¡Ya ni toteotsij tlen techkixtik ipan tlali Egipto!”. Kichijkej se ueyi iljuitl uan pejkej kiueyichiuaj nopa becerro. ¿Kuali tlen kichijkej? Amo, pampa israeleuanij kiijtojtoyaj san Jehová kiueyichiuaskiaj. Inijuantij amo kichijkej tlen kiijtojkej.

 Jehová kiitak tlen kichiuayayaj uan kiiljuik Moisés: “Xitemo kampa itstokej israeleuanij, pampa amo nechneltokatokej. Inijuantij kiueyichiuaj se becerro”. Moisés nimantsi temok uan kiitskijtiualayaya nopa ome tepatlaktli.

Kema Moisés monechkauijtiauiyaya kampa itstoyaj israeleuanij, kikajki uikayayaj. Kema asito, kiitak mijtotiyayaj uan kiueyichiuayayaj nopa becerro. Moisés tlauel kualanki, yeka kikuamajkajki nopa ome tepatlaktli, uan nopa tepatlaktli tlamitlatlapakak. Uan nimantsi kikuik nopa becerro uan kitlatik, teipa kitlajtlanilik Aarón: “¿Kenijkatsa ni maseualmej kichijkej xijchiua ni tlamantli tlen amo kuali?”. Aarón kinankilik: “Amo xikualani nouaya, ta kuali tikinixmati ni maseualmej. Kinekiyayaj se ininteotsij, yeka nijtlalik nopa oro ipan tlitl uan kiski ni becerro”. Aarón amo kinamikiyaya kichiuas nopa tlamantli. Teipa, Moisés sampa tlejkok ipan nopa tepetl uan miakpa kiiljuik Jehová ma kintlapojpoljui israeleuanij.

Jehová san kintlapojpoljuik katli kinekiyayaj kineltokasej. Amo kiampa kinpanotoskia tlaj kineltokatoskiaj Jehová uan Moisés.