Ne Asiria, ipan altepetl Nínive, maseualmej kichiuayayaj tlen amo kuali. Yeka Jehová kiiljuik itlajtolpanextijka Jonás ma yaui Nínive uan ma kiniljui ma moyolkuepakaj. Jonás amo kinejki yas, uan yajki sejkanok. Tlejkok ipan se akali tlen yauiyaya Tarsis.

Kema nopa akali yauiyaya ipan ueyi atl, pejki chikauak tlaajaka uan nopa atl mokojkoxoniyaya. Katli kiuikayayaj nopa akali tlauel momajmatijkej, yeka kintsajtsilijkej ininteotsitsij uan pejkej motlajtlaniaj: “¿Kenke techpano ni tlamantli?”. Teipa, Jonás kiniljuik: “Na notlajtlakol. Nimochololtia pampa amo nijnejki nijchiuas tlen Jehová nechnauatik. Xinechmajkauakaj atitla uan kej nopa ayokmo mokojkoxonis ni atl”. Maske nopa tlakamej amo kinekiyayaj kimajkauasej, Jonás miakpa kiniljuik ma kimajkauakaj, yeka kimajkajkej ipan ueyi atl. Uan nopa atl ayokmo mokojkoxonik.

Jonás moiljuik mikiskia, yeka kema atsintlauetstiauiyaya kitsajtsilik Jehová. Uajka Jehová kichijki se ueyi michij ma kitolo. Maske kitolok, Jonás amo mijki. Yeka, kema Jonás itstoya iijtiko nopa michij, sampa momaijtok uan kiijtok: “Nama kena nochipa nimitsneltokas”. Jehová kikajki Jonás ma itsto eyi tonali iijtiko nopa michij, teipa nopa michij kiisotlak kampa tlauaktok.

Maske Jehová kimanauik Jonás, sampa kinauatik ma yaui Nínive, uan Jonás kena yajki. Kema asito, kiniljuik nochi maseualmej: “San poliui 40  tonali, uan toTeotsij kitsontlamiltis ni altepetl”. Uajka panok se tlamantli tlen amo moiljuijtoyaj tlaj panoskia; maseualmej kitlakakilijkej Jonás uan kipatlakej ininnemilis. Nopa tlanauatijketl tlen Nínive kiniljuik maseualmej: “Xikiljuikaj toTeotsij ma inmechtlapojpoljui uan ximoyolkuepakaj. Uelis kiampa amo techtsontlamiltis”. Kema Jehová kiitak moyolkueptoyaj, ayokmo kitsontlamiltik Nínive.

Jonás kualanki pampa Jehová amo kitsontlamiltik Nínive. Ximoiljui ni: maske Jehová kipixki iyolo ika Jonás uan kitlapojpoljuik, Jonás amo kinekiyaya ma kitlapojpoljui Nínive. Jonás kiski tlen nopa altepetl uan moseuito kampa kiekauiliskia imakuayo se ayojtli. Jonás tlauel ixkuajkualantoya. Teipa, nopa ayojtli imakuayo uajki, uan Jonás tlauel kualanki. Uajka Jehová kiiljuik: “Nikita tlauel tijpatiita ni ayojtli uan amo tikinpatiita katli euaj Nínive. Na nikintlapojpoljuik, yeka momanauijkej”. ¿Tlake kinekiyaya Jehová ma kikuamachili Jonás? Monekiyaya kinpatiitas maseualmej katli euayayaj Nínive uan amo se ayojtli.