ToTeotsij Jehová katli techmachtia miak kuali tlamantli, tlauel yolpaki uan kineki ma tipakikaj ininuaya tochampoyouaj (1 Timoteo 1:11, TNM). Jehová kichijki ma monamikti se siuatl iuaya se tlakatl. Tlaj mosenkauasej iniixpa tlanauatianij, kuali itstosej inijuantij uan nojkia kuali kiniskaltisej ininkoneuaj, uan kej nopa nochi yolpakisej.Yeka Cristo itokilijkauaj moneki ma kineltokakaj kema tekichiuanij tlanauatiaj ma moamasenkauakaj. (Xijpoua Lucas 2:1, 4 uan 5).

ToTeotsij kineki nochipa ma itstokaj sansejko se tlakatl uan se siuatl katli mosenkajtokej. Jehová amo kineki se tlakatl ma kikajkayaua isiua o se siuatl ma kikajkayaua iueue (Hebreos 13:4). Jehová tlauel kualani kema mokauaj uan kiixpolouaj nopa amatl kampa nesi mosenkajtokej (Malaquías 2:16). Maske Jehová kikualankaita nopa, kena kikaua ma kiixpolokaj nopa amatl uan sampa ma mosiuajtikaj o monamiktikaj tlaj se tlen inijuantij momekatik. (Xijpoua Mateo 19:3-6 uan 9).

Jehová kinchijki ma mopaleuikaj tlakatl uan siuatl kema sansejko itstoskiaj (Génesis 2:18). Nopa tlakatl katli kinyakana ichampoyouaj, moneki ma kinmaka isiua uan ikoneuaj tlen kinpoloua, uan ma kinmachti ichampoyouaj tlen toTeotsij iTlajtol. Nojkia pampa tlauel kiiknelia isiua, ayokmo kichiua sekij tlamantli tlen momajtoya kichiua ipan inemilis. Nojkia moneki ma moiknelikaj uan ma motlepanitakaj. Uan pampa tlajtlakolejkej moneki motlapojpoljuisej uan kiampa uelis yolpakisej. (Xijpoua Efesios 4:31, 32; 5:22-25, 33 uan 1 Pedro 3:7).

Tlaj se tlakatl kipia kuesoli iuaya isiua, moneki ma kichiuakaj kampeka kuali mouikasej uan moiknelisej (1 Corintios 13:4, 5).Kema katli mosiuajtijtokej o monamiktijtokej kipiaj se keski kuesoli, toTeotsij iTlajtol amo kiijtoua ma mokauakaj. (Xijpoua 1 Corintios 7:10-13).

Jehová kineki ma yolpakikaj konemej. Yeka kinmachtia kenijkatsa uelis yolpakisej kema motelpokachiuasej. Jehová kineki ma kinpaleui tlen inintatauaj kimatij uan tlen kiixmajtokej ipan ininnemilis (Colosenses 3:20). Nojkia kineki ma kimatikaj kenijkatsa tlauel yolpakisej tlaj kitekipanosej ya uan iKone. (Xijpoua Eclesiastés 11:9–12:1; Mateo 19:13-15; 21:15 uan 16).

Tetajmej moneki tekitisej uan kej nopa uelis kinmakasej ininkoneuaj tlen kikuasej, tlen mokentisej uan kampa itstosej (1 Timoteo 5:8). Uan amo san ya ni moneki, nojkia moneki kinmachtisej ma kiiknelikaj toTeotsij uan ma kichiuakaj kej toTeotsij (Efesios 6:4). Kema tetajmej kiikneliaj toTeotsij, kichiua ininkoneuaj nojkia ma kiiknelikaj. Uan kema kiniskaltiaj ika toTeotsij iTlajtol, kichiua ma kipiakaj kuali inintlalnamikilis. (Xijpoua Deuteronomio 6:4-7 uan Proverbios 22:6).

Kema konemej kichiuaj tlen kuali moneki ma kinyolchikauakaj uan ma kiniljuikaj kualtitok tlen kichiuaj. Kemantika nojkia moneki ma kintlakaualtikaj uan ma kintlalnamiktikaj, pampa kej nopa amo kichiuasej tlamantli tlen uelis kintlaijiyouiltis (Proverbios 22:15). Tlaj kintlakaualtisej, moneki amo ma kintlaijiyouiltikaj. (Xijpoua Colosenses 3:21).

Jehová itlajtoltemakauaj kichijtokej miak amochtli tlen kinpaleuia tetajmej uan konemej. Uan nochi mokixtijtok ipan Biblia. (Xijpoua Salmo 19:7 uan 11).