TLAMACHTILI 5
¿Tlake kineki toTeotsij ma mochiua ipan Tlaltipaktli?
1. ¿Kenke toTeotsij kichijki Tlaltipaktli?
Jehová kichijki Tlaltipaktli pampa kinejki nopaya ma itstokaj maseualmej. Nopa achtoui maseualmej tlen motokaxtijkej Adán uan Eva, amo kinchijkej ma itstokaj ne iluikak, pampa toTeotsij ya kinchijtoya iluikaeuanij katli itstoyaj ne iluikak (Job 38:4, 7). Jehová kichijki nopa achtoui tlakatl ma itsto ipan se yejyektsi xochimili tlen kitokaxtik Edén (Génesis 2:15-17). ToTeotsij nojkia kinekiyaya Adán uan ikoneuaj nochipa ma itstokaj ipan Tlaltipaktli. (Xijpoua Salmo 37:29 uan 115:16).
ToTeotsij kichijki nopa Xochimili Edén san ipan se achi tlali. Uajka Adán uan Eva monekiyaya kinpiaskiaj ininkoneuaj uan kiampa momiakiliskiaj, uan ika yolik nochi Tlaltipaktli kichiuaskiaj se xochimili (Génesis 1:28). Tlaltipaktli amo kema kitsontlamiltisej, yeka maseualmej nochipa mochantijtosej nopaya. (Xijpoua Salmo 104:5).
Xikita nopa video ¿Kenke toTeotsij kichijchijki Tlaltipaktli?
2. ¿Kenke nama Tlaltipaktli amo se xochimili?
Adán uan Eva kinkixtijkej ipan Xochimili pampa amo kineltokakej toTeotsij, yeka nopa Xochimili polijki. Yon se maseuali amo ueltok sampa kichiua se xochimili, pampa Tlaltipaktli moaxkatijtokej maseualmej katli kichiuaj tlen amo kuali (Job 9:24). (Xijpoua Génesis 3:23 uan 24).
¿Timoiljuia Jehová ayokmo kiaxitis tlen kineki ma mochiua ipan Tlaltipaktli? ¡Kena kichiuas ma moaxiti! Pampa ya kipia nochi chikaualistli uan nochi tlen kichiua kisa kuali (Isaías 45:18). Teipa toTeotsij kichiuas maseualmej ma itstokaj kej achtouia mosentlalijtoya. (Xijpoua Salmo 37:11 uan 34).
3. ¿Kenijkatsa sampa mochiuas nopa Xochimili?
Jesús, katli tekichiuas ipan toTeotsij iTlanauatijkayo, kichiuas nochi Tlaltipaktli se xochimili, uan ininuaya iluikaeuanij kintsontlamiltisej nochi toTeotsij ikualankaitakauaj ipan nopa ueyi tlauilankayotl tlen itoka Armagedón. Uajka Jesús kitsakuas Satanás mil xiuitl. Uan toTeotsij itekipanojkauaj momanauisej, pampa Jesús kinyakanas uan kinmanauis, uan teipa nochipa itstosej ipan Xochimili. (Xijpoua Apocalipsis (Revelación) 20:1-3; 21:3 uan 4).
4. ¿Kema tlamis tlaijiyouilistli?
¿Kema kitlamiltis toTeotsij tlen amo kuali? Jesús kiijtok panoskia se “tlaneskayotl” kema nechka tlamiskia nochi tlamantli. Nopa amo kuali tlamantli katli ipan ni tonali kintlaijiyouiltijtok maseualmej, kinextia nechka “tlamis ni tonali”. (Xijpoua Mateo 24:3, 7-14, 21 uan 22).
Ipan nopa mil xiuitl, kema Jesús kitekimakasej ne iluikak uan tlanauatis ipan Tlaltipaktli, kitlamiltijtias tlen techtlaijiyouiltia (Isaías 9:6, 7; 11:9). Uan nojkia kinkixtilis inintlajtlakoljuaj katli kiikneliaj toTeotsij. Uajka toTeotsij kichiuas Jesús ma kitlamilti kokolistli, ma ayokmo aka ueuejtia uan amo aka ma miki. (Xijpoua Isaías 25:8 uan 33:24).
5. ¿Ajkia inijuantij itstosej ipan Xochimili?
Ipan nopa Kali kampa mosentiliaj Jehová iTlajtoltemakauaj tikinixmatis katli kiikneliaj toTeotsij uan kinekij kichiuasej tlen toTeotsij tlanauatia
Katli kineltokasej toTeotsij itstosej ipan Xochimili (1 Juan 2:17). Jesús kintitlanki itokilijkauaj ma kintemotij tlen kipixtoyaj kuali ininyolo uan ma kinmachtikaj kenijkatsa kuali itstosej iixpa toTeotsij. Ipan ni tonali, Jehová kinmachtia miakej maseualmej pampa kineki ma itstokaj ipan Xochimili (Sofonías 2:3). Ipan nopa Kali kampa mosentiliaj Jehová iTlajtoltemakauaj, maseualmej kiyekouaj kenijkatsa kuali mouikasej ininuaya ininsiua o ininueue uan kenijkatsa kuali kiniskaltisej ininkoneuaj. Nojkia kiueyichiuaj sansejko toTeotsij uan kinmachtiaj kenijkatsa uelis kinpaleuis tlen tlamachtia Biblia. (Xijpoua Miqueas 4:1-4).
