Maske nopa se keski tlamachtili katli tikitakej ipan Biblia uelis mitspaleuijtok tikiknelis Jehová, moneki tijchiuas sekinok tlamantli uan kiampa nojua tlauel tikiknelis (1 Pedro 2:2). Tlaj nochipa timomachtis Biblia, mitspaleuis tiitstos Jehová inechka uan nojkia timotemachis tiitstos nochipa. (Xijpoua Juan 17:3 uan Judas 21).

Kej tijmajtias sekinok tlamachtili tlen toTeotsij, kuali titlaneltokas, uan kej nopa uelis tijchiuas ma yolpaki toTeotsij (Hebreos 11:1, 6). Kema kuali titlaneltokaj kichiua ma timoyolkuepakaj uan ma tijpatlakaj kej timonejnemiltiyayaj. (Xijpoua Hechos 3:19).

Nochi techpaktia titematiltisej se kuali tlamantli. Yeka, uelis nojkia tijneki tikinpouilis sekinok tlen timomachtijtok. Kej tijmajtias miak tlamachtili, tijmatis kenijkatsa kuali tijtekiuis toTeotsij iTlajtol uan kej nopa tikinpouilis sekinok tlen Jehová uan nopa kuali tlamachtili katli kineki ma kimatikaj maseualmej. (Xijpoua Romanos 10:13-15, TNM).

Achtoui ueliskia tikinpouilis mochampoyouaj uan mouampoyouaj. San moneki tikinnojnotsas ika kuali uan tijnextis tikintlepanita. Xikiniljui tlen toTeotsij mosentlalijtok kichiuas uan amo xikiniljui amo xitlauak tlen inijuantij kineltokaj. Nojkia xikilnamiki tlaj kuali timonejnemiltis, ya nopa tlauel kinpaleuis, uan amo tlen tikiniljuis. (Xijpoua 2 Timoteo 2:24 uan 25).

Tlaj timomachtis Biblia kichiuas kuali titlaneltokas uan nojkia mitspaleuis timouampojchiuas iuaya Jehová. Ta nojkia uelis timochiuas kej se tlen toTeotsij ichampoyouaj. (Xijpoua 2 Corintios 6:18).

Amo xijkaua ximomachti toTeotsij iTlajtol (Hebreos 5:13, 14). Xikiljui se tlen Jehová itlajtoltemakauaj ma mitsmachti tlen uala ipan Biblia ika nopa amochtli ¿Tlake nelnelia tlamachtia Biblia? Tlaj nojua timomachtijtias miak tlamantli, tlauel tiyolpakis ipan monemilis. (Xijpoua Salmo 1:1-3; 73:27 uan 28).

Xikilnamiki, nopa kuali tlamachtili tlen uala ipan Biblia technextilia Jehová katli tlauel yolpaki, uan ta uelis tijnechkauis toTeotsij tlaj timonechikos ininuaya itekipanojkauaj (Hebreos 10:24, 25). Tlaj timosentlalis tijchiuas tlen Jehová kineki uelis tiitstos nochipa. Yeka, nelia tlauel kuali tijchiua tlaj nama timonechkauia ika toTeotsij. (Xijpoua 1 Timoteo 1:11 uan 6:19).