TLAMACHTILI 14
Xijpankixti tlen tlauel ipati
Hebreos 8:1
TLEN MONEKI TIJCHIUAS: Xikinpaleui katli mitstlakakiliaj kuali ma tlakaktokaj kema tikixtomas motlamachtil, uan xikijto kenijkatsa sejse tlamantli tlen tikixtomas mouika ika nopa tlamachtili uan ika tlen tijneki tikinmachtis.
¿KENIJKATSA TIJCHIUAS?
-
Ximoiljui kenke tikixtomas nopa tlamachtili. Achtoui ximoiljui kenijkatsa tijneki tijpanoltis motlamachtil: tikinyolmelauas se tlamantli, tikinpaleuis ma tlaneltokakaj o tikinyololinis ma kichiuakaj tlen tikinmachtis, uan kema timokualchijchiuas xikilnamikto nopa tlamantli. Xijchiua kampeka nochi tlen tikixtomas ma mitspaleui tijpanoltis motlamachtil kej timoiljuijtok.
-
Xijpankixti tlen tlauel ipati ipan motlamachtil. Kema tikixtontos motlamachtil, xikompaui nopa tlajtoli tlen tlauel pankisa ipan nopa tlamachtili.
-
Xijchiua kampeka amo ouij tikixtomas tlen tlauel pankisa ipan motlamachtil. Xijtlapejpeni tlake tlamachtili tlen tlauel pankisa kinpaleuis ma kikuamachilikaj nopa tlamachtili, san xijtlapejpeni tlen uelis tikixtomas ipan nopa minutos tlen kinamiki. Xijtlapejpeni san se keski tlamachtili tlen tlauel pankisa uan kuali xikixtoma. Kema tikixtontias sejse tlamachtili tlen tlauel pankisa, amo nimantsi xikixtoma se uan teipa seyok.
