“Kinamiki ya ineliskiaj intlamachtianij” (Heb. 5:12). San Jehová eli se kuali Tlamachtijketl, uan techtlaneui ma tikinmachtikaj sekinok tlen ya. Tikinmachtiaj tlen melauak tochampoyouaj, toikniuaj ipan tlanechikoli uan maseualmej ipan tlajtolmoyaualistli. Maske eli se ueyi tlateochiualistli, nojkia eli se ueyi tekitl. ¿Tlake techpaleuis nojua kuali titlamachtisej?

Uelis techpaleuis tlen apóstol Pablo kitlajkuiljuilik Timoteo: “Xijpoua iTlajtol toTeko para nochi kikakisej. Xikinmachti tlen kiijtosneki. Uan xikinyolchikaua tlaneltokanij ma kichiuakaj tlen kiijtoua”. Nojkia kiniljuik: “Intla kej ni tijchiuas, toTeko mitsmakixtis ta uan inijuantij tlen mitstlakakilisej” (1 Tim. 4:13, 16). Nopa tlamachtili tlen tijmoyauaj uelis kinmanauis maseualmej. Yeka tlauel moneki kuali titlapouasej uan titlamachtisej. Ni pilamochtsi mitspaleuis ya nopa xijchiua. Ma tikitakaj kenijkatsa kichijchijtokej ni pilamochtsi:

Jehová “inmoTlamachtijka” (Is. 30:20). Maske ni pilamochtsi mitspaleuis nojua kuali titlapouas uan kuali titlamachtis, xikilnamiki tijmoyauaj Jehová itlamachtil uan ya kinyoltilana maseualmej ma kinechkauikaj (Juan 6:44). Yeka xijtlajtlani ma mitsmaka itonal. Nochipa xijtekiui toTeotsij iTlajtol. Xijchiua kampeka katli mitstlakakiliaj ma kiixmatikaj Jehová uan amo ma mosentlalikaj ipan ta. Xikinpaleui tlauel ma kiiknelikaj Jehová.

ToTeotsij mitsmakatok se tekitl tlen tlauel ipati: tijmoyaua se tlamachtili tlen amo kema momoyajtoya ipan Tlaltipaktli. Tijmatij tlaj timotemachis ipan “nopa chikaualistli tlen toTeko” techmaka, uelis tijchiuas nopa tekitl (1 Ped. 4:11).

Inmoikniuaj katli inmouaya titlatekipanouaj,

Katli kinyakanaj Jehová itlajtoltemakauaj