Nopa achtoui carta tlen kintitlanilijkej Cristo itokilijkauaj tlen Corinto 11:1-34
11 Xijchiuakaj kej na,* sanse kej na nijchiua kej Cristo.
2 Noikniuaj uan nosiuaikniuaj, tlauel niinmechtlaskamatilia pampa innechilnamikij ipan nochi tlamantli, uan inkichiuaj nochi sanse kej na niinmechmachtik.
3 Pero nijneki xijmatikaj katli kiyakana* se tlakatl eli Cristo, katli kiyakana se siuatl eli se tlakatl uan katli kiyakana Cristo eli Dios.*
4 Kema se tlakatl momaijtoua* o tematiltia tlen Dios kiijtoua uan motsontsakua,* kipinaualtia itlayakanka,*
5 pero kema se siuatl momaijtoua o tematiltia tlen Dios kiijtoua uan amo motsontsakua, kipinaualtia itlayakanka,* pampa eliskia kejuak moxintok tsonpepestik.
6 Pampa tlaj se siuatl amo motsontsakua, uajka moneki tlauel kototsi motsonkaltekis. Pero tlaj se siuatl pinaua motsonkaltekis tlauel kototsi o moximas tsonpepestik, uajka moneki motsontsakuas.
7 Se tlakatl amo kinamiki motsontsakuas, pampa Dios kichijchijki ma eli kej ya* uan kichiua ma kiuejkapantlalikaj Dios, uan se siuatl kichiua ma kiuejkapantlalikaj se tlakatl.
8 Pampa Dios amo kichijchijki se tlakatl tlen itlakayo se siuatl, ya kichijchijki se siuatl tlen itlakayo se tlakatl.
9 Uan Dios amo kichijchijki nopa tlakatl para ma kipaleui se siuatl, kichijchijki nopa siuatl para ma kipaleui se tlakatl.
10 Yeka, se siuatl kinamiki motsontsakuas para kinextis kikauilia nopa tlakatl ma kiyakana, pampa nopa ángeles kitlachilijtokej.
11 Pero ipan itlanechikol toTeko, se siuatl amo ueliskia itstos tlaj amo itstoskia tlakatl, uan se tlakatl amo ueliskia itstos tlaj amo itstoskia siuatl.
12 Pampa sanse kej nopa siuatl kichijchijkej tlen itlakayo nopa tlakatl, nojkia se tlakatl tlakati tlen itlakayo se siuatl, pero nochi tlamantli Dios kichijchijki.
13 Inmojuantij xikijtokaj: ¿kinamiki se siuatl ma momaijto ika Dios uan amo ma motsontsakua?
14 ¿Amo inkimatij para se tlakatl amo kinamiki kipias ueueyak itsonkal pampa eli se pinaualistli para ya?
15 Pero tlaj se siuatl kipia ueueyak itsonkal, eli se tlamantli yejyektsi, pampa se siuatl kimakatokej itsonkal para motsontsakuas.
16 Tlaj se akajya moiljuia amo kuali ni tlamantli, ma kimati para yon tojuantij yon toikniuaj tlen Dios itlanechikol amo timomajtokej tijchiuasej seyok tlamantli.
17 Pero ika ni tlamantli tlen niinmechnauatijtok amo niinmechiljuia kuali tlen inkichijtokej, pampa kema inmosentiliaj san inmoyolkokouaj uan amo inmopaleuiaj.
18 Nechiljuijtokej inmoxelouaj kema inmosentiliaj ipan tlanechikoli, uan se keski tlamantli kena nijneltoka.
19 Pampa temachtli se keskij tlen inmojuantij kimoyauasej tlamachtili tlen amo melauak,* para nojkia xitlauak ma nesi ajkia tlen inmojuantij Dios kuali kiita.
20 Kema inmojuantij inmosentiliaj para inkikuasej toTeko iTlakualis, amo inkichiuaj ika tlatlepanitakayotl.
21 Pampa kema inkikuaj toTeko iTlakualis, sejse tlen inmojuantij ya intlakuajtokej, uan yeka se mayana uan seyok iuintitok.
22 ¿Amo inkipiaj inmochaj kampa uelis intlakuasej uan inkiisej* se tlenijki? ¿O amo inkitlepanitaj itlanechikol Dios uan inkinpinaualtiaj katli amo tleno kipiaj? ¿Tlake uelis niinmechiljuis? ¿Kinamiki nikijtos kuali tlen inkichiuaj? Amo kinamiki kiampa ma nikijto.
23 Pampa na niinmechiljuik tlen toTeko nechmachtik: ipan nopa youali kema toTeko Jesús kitemaktiliskiaj, kikuik se pantsi
24 uan kema ya kitlaskamatilijtoya Dios, kitlajkoitak uan kiijtok: “Ni kiixnextia notlakayo tlen nitemaktilis para inmechpaleuis. Xijchijtokaj ni para inkinextisej innechilnamikij”.
25 Kema ya tlakuajtoyaj, sanse kichijki ika nopa copa uan kiijtok: “Ni copa kiixnextia nopa yankuik tlajtolsenkauali, tlen kipia ipati ika noeso. Xijchijtokaj ni para inkinextisej innechilnamikij sejse uelta kema inkiisej ipan ni copa”.
26 Pampa nochipa kema inkikuasej ni pantsi uan inkiisej tlen ni copa, intematiltijtosej imikilis toTeko hasta kema ya ualas.
27 Yeka, katli kikuas nopa pantsi o kiis tlen icopa toTeko maske amo kinamiki kichiuas, kipias tlajtlakoli pampa amo kitlepanita itlakayo yon ieso toTeko.
28 Achtoui kuali ma motlachili uan ma kiita tlaj kinamiki kichiuas. Kema kiampa kichijtos, uajka kena uelis kikuas nopa pantsi uan kiis tlen nopa copa.
29 Pampa katli tlakua uan kii pero amo kikuamachilia tlen kiixnextia itlakayo toTeko, ya iselti kichiua Dios ma kitlatsakuilti.
30 Yeka miakej tlen inmojuantij amo tetikej uan mokokouaj,* uan miakej ya miktokej.*
31 Pero tlaj kuali tijtlachiliskiaj kenijkatsa tielij, uajka Dios amo techtlajtolsenkauaskia.
32 Pero kema Jehová* techtlajtolsenkaua, techtlakaualtia para amo ma techtlatsakuilti ininuaya katli itstokej ipan Tlaltipaktli.
33 Yeka noikniuaj, kema inmosentilisej para inkikuasej nopa tlakualistli, ximochiakaj hasta kema nochi asitosej.
34 Tlaj se akajya mayana, ma tlakuajteua ichaj, kiampa kema inmosentilisej amo inmechtlatsakuiltisej. Uan nopa sekinok tlamantli nijsenkauas kema niasiti nopaya.
Tlen ijkuilijtok tlatsintla
^ O “Xinechixkopinakaj”.
^ Ika griego “itsonteko”.
^ Kanajya kiijtouaj “toTeotsij”.
^ Kanajya kiijtouaj “motlatlajtia”.
^ O “motlalilia se tlenijki ipan itsonteko”.
^ Ika griego “itsonteko”.
^ Ika griego “itsonteko”.
^ O “kej itlachialis”.
^ O “kichiuasej ma onka sectas”.
^ Kanajya kiijtouaj “inkiijisej”.
^ Kanajya kiijtouaj “kokoyaj”.
^ Ni amo kiijtosneki nelia miktokej, kiijtosneki ayokmo mouikaj iuaya Jehová.
