Nopa achtoui carta tlen kintitlanilijkej Cristo itokilijkauaj tlen Corinto 13:1-13
-
Tlaiknelili eli se ojtli tlen más kuali (1-13)
13 Tlaj nikamanalti inintlajtol maseualmej uan inintlajtol ángeles pero amo niteiknelia, nieliskia kej se tepostli tlen chikauak chalani uan chikauak tsilini.
2 Tlaj nijpia yajatili* para nitematiltis tlen Dios kiijtoua uan nijkuamachilia nochi tlen Dios ayamo tematiltia,* tlaj nochi nijmati uan kuali nitlaneltoka hasta ueliskia nikinolinis tepemej, pero amo niteiknelia, amo tleno nopati.*
3 Tlaj nitemaka nochi tlen nijpia para nikintlamakas sekinok o tlaj nitemaktilia notlakayo para uelis nimoueyimatis, pero amo niteiknelia, san tlapik eliskia.
4 Se katli teiknelia kipia iyolo* uan yolkuali. Se katli teiknelia amo tekokolia.* Amo motlepanita, amo moueyimati,
5 amo tepinaualtia, amo san kichiua tlen ya kipaleuia, amo nima kualani. Amo kipojtia keski ueltas kiyolkokouaj.
6 Yolpaki ika tlen melauak, pero amo yolpaki kema mochiua tlen amo xitlauak.
7 Nochi kiijiyouia, nochi kineltoka, nochi kichia, uan itstok temachtli* maske tlen ueli kipano.
8 Tlaiknelili amo kema tlami. Pero asis se tonali kema ayokmo aka kipias yajatili para tematiltis tlen Dios* kiijtoua, ayokmo aka uelis kamanaltis ipan miak tlajtoli,* ayokmo aka uelis kiijtos tlen sekinok amo kimatij.
9 Pampa amo nochi tijmatij uan amo titematiltiaj nochi tlen Dios kiijtoua;
10 pero kema asis tlen senkistok,* tlen amo senkistok tlamis.
11 Kema nieliyaya okichpil nikamanaltiyaya kej se okichpil, nimoiljuiyaya kej se okichpil uan nitlalnamikiyaya kej se okichpil. Pero nama ya niueyixki, yeka ayokmo nijchiua kej se okichpil.
12 Pampa nama tikitaj tlamantli ixmiktok ipan se espejo* tlen tepostli, pero teipa kuali timoixtlachilisej. Ipan ni tonali amo nochi nijmati, pero teipa nochi kuali nijmatis, sanse kej na kuali nechixmatij.
13 Pero san mokauas ni eyi tlamantli: titlaneltokasej, tijchiasej para Dios ma techpaleui uan titeiknelisej. Pero titeiknelisej ya nopa tlen más ipati.
Tlen ijkuilijtok tlatsintla
^ O “nopa regalo”, “nopa tekitl”.
^ Xikita tlen Dios ayamo tematiltia.
^ Kanajya kiijtouaj “amo niipa”.
^ O “kipia paciencia”.
^ O “amo tetlasojmati (tetlasmati)”.
^ O “amo tleno kitlauisoua”.
^ Kanajya kiijtouaj “toTeotsij”.
^ Kiijtosneki ayokmo aka uelis kamanaltis se tlajtoli por se milagro.
^ O “tlen asitok”, “nejmaxtik”.
^ Kanajya kiijtouaj “teskatl”.
