Nopa achtoui carta tlen kintitlanilijkej Cristo itokilijkauaj tlen Corinto 15:1-58
-
Kema Cristo moyolkuik (1-11)
-
Titlaneltokaj pampa timotemachiaj moyolkuisej katli miktokej (12-19)
-
Timotemachiaj moyolkuisej mijkatsitsij pampa Cristo moyolkuik (20-34)
-
Inintlakayo katli itstokej ipan Tlaltipaktli uan katli itstokej ipan iluikak (35-49)
-
Tlen amo kema miki uan amo kema nempoliui (50-57)
-
“Nochipa ximotekiuijtokaj ipan iteki toTeko” (58)
15 Noikniuaj, nama niinmechilnamikilia nopa kuali tlamachtili tlen niinmechmatiltik, tlen inmojuantij inkiselijkej uan tlen amo inkitlauelkajtokej.
2 Inmojuantij nojkia inmomakixtisej tlaj nochipa inkineltokaj nopa kuali tlamachtili tlen niinmechmatiltik. Tlaj amo, uajka san tlapik intlaneltokakej.
3 Pampa kema niinmechmachtik nopa tlamantli tlen más ipati, niinmechiljuik tlen na nojkia nechiljuijkej: Cristo mijki para techmakixtis tlen totlajtlakoljuaj, kej kiijtoua iTlajkuilol Dios;
4 kitlalpachojkej* uan ipan eyi tonali moyolkuik* kej kiijtoua iTlajkuilol Dios,
5 uan monextik iixpa Cefas* uan teipa ininixpa nopa 12 apóstoles.
6 Teipa monextik ininixpa kipano 500 toikniuaj katli sansejko itstoyaj. Miakej tlen inijuantij nojua itstokej, maske se keskij ya mijkej.
7 Teipa monextik iixpa Santiago; uan teipa ininixpa nochi apóstoles.
8 Hasta teipa monextik noixpa, kejuak nieliskia se pilkonetsi katli tlakatki kema ayamo kinamikiyaya.*
9 Pampa na nieli katli más pilsiltsi* tlen nochi apóstoles uan amo kinamiki ma nechiljuikaj niapóstol, pampa nikintlaijiyouiltik katli itstokej ipan itlanechikol Dios.
10 Pero Dios* kinextijtok ueyi iyolo ika na,* yeka nijselijtok ni tekitl. Uan amo san tlapik kinextijtok ueyi iyolo ika na, pampa na nitekititok más chikauak que nochi inijuantij. Pero amo nijchijtok nopa tekitl noselti, nijchiua pampa Dios kinextia ueyi iyolo ika na.
11 Uajka, tlaj na nikamanalti o tlaj inijuantij kamanaltij, ya ni tlen nochi titepouiliaj uan ya ni tlen inkineltokatokej.
12 Uan tlaj titematiltiaj para Cristo moyolkuik, ¿kenke se keskij tlen inmojuantij kiijtouaj amo moyolkuisej mijkatsitsij?
13 Tlaj amo moyolkuisej katli miktokej, uajka Cristo nojkia amo moyolkuik.
14 Pero tlaj Cristo amo moyolkuik, uajka san tlapik tlen titematiltiaj uan nojkia san tlapik intlaneltokatokej.
15 Hasta tieliskiaj itestigos Dios katli tiistlakatij kema tikijtouaj Dios kiyolkuik Cristo, pampa amo nelia kiyolkuik tlaj amo nelia moyolkuisej katli miktokej.
16 Pampa tlaj amo moyolkuisej katli miktokej, uajka Cristo nojkia amo moyolkuik.
17 Nojkia, tlaj Cristo amo moyolkuik, san tlapik intlaneltokakej; uan ayamo inmechtlapojpoljuiaj inmotlajtlakoljuaj.*
18 Uajka, nojkia itokilijkauaj Cristo katli ya mijkej ayokmo kema sampa moyolkuisej.
19 Tlaj san ipan ni tonali kema tiitstokej techpaleuia timotemachisej ipan Cristo, uajka nelia tlauel titeikneltikej.
20 Pero Cristo moyolkuik uan elki katli achtoui moyolkuik tlen nochi katli miktokej, kej se kuatlajkayotl* tlen achtoui tlaki.
21 Sanse kej se tlakatl kichijki nochi ma timikikaj, nojkia se tlakatl kichiua ma moyolkuikaj katli miktokej.
22 Pampa sanse kej ika Adán nochi mikij, nojkia ika Cristo nochi kipiasej nemilistli.
23 Pero sejse kiselis kema kinamikis: achtoui Cristo, kej se kuatlajkayotl tlen achtoui tlaki, teipa katli iaxkauaj Cristo kema ya tlakuepilis.*
24 Teipa, ualas itlamia nochi, kema yaya kimaktilis nopa Tlanauatijkayotl iDios uan iTata; kema ya kintsontlamiltijtos nochi tlanauatianij uan nochi katli kipiaj tlanauatili uan chikaualistli.
25 Pampa ya moneki tlanauatijtos hasta kema Dios kintlalis iikxitla nochi ikualankaitakauaj.
26 Uan nopa mikilistli, ikualankaitaka tlen san iyojtsi mokauas, nojkia kitsontlamiltis.
27 Pampa Dios “kitlalik nochi tlamantli iikxitla para ma kinauati”. Pero kema ya kiijtoua kinauatis nochi, amo kiijtosneki nojkia kinauatis Dios, katli kikauilik ma kinauati nochi.
28 Uan kema iKone Dios ya kinauatijtos nochi, uajka ya nojkia kikauas ma kiyakana Dios, katli kikauilik ma kinauati nochi tlamantli, kiampa Dios kipias nochi tlanauatili ika nochi tlen onka.
29 Tlaj amo kiampa eliskia, ¿tlake kichiuasej katli moatsonpoliuiltiaj para teipa mikisej? Tlaj katli miktokej amo moyolkuisej, ¿kenke inijuantij nojkia moatsonpoliuiltiaj para teipa mikisej?
30 ¿Uan kenke nojkia nochipa tiitstokej kampa mauilili?
31 Mojmostla ueliskia nimikis. Nopa nelia noikniuaj, sanse kej nojkia tlauel niyolpaki ika inmojuantij pampa inelij itokilijkauaj toTeko Cristo Jesús.
32 Tlaj na, sanse kej sekinok tlakamej,* nimoteuijtok ika kuatitlantlapialmej tlen mosisiniaj ipan Éfeso, ¿kenijkatsa nechpaleuia nopa? Tlaj katli miktokej amo nelia moyolkuisej, uajka “ma titlakuakaj uan ma tikikaj* se tlenijki, pampa mostla timikisej”.
33 Amo xijkauakaj ma inmechkajkayauakaj. Tlaj se akajya mouika iuaya se katli amo kuali monejnemiltia, ayokmo kichiuas nopa kuali tlamantli tlen momajtoya kichiua.
34 Ximotlalnamiktikaj, uan xijchiuakaj tlen xitlauak uan amo xitlajtlakolchiuakaj, pampa sekij amo kiixmatij Dios. Niinmechiljuia ni tlamantli para xipinauakaj.
35 Pero se akajya uelis kiijtos: “¿Kenijkatsa moyolkuisej katli miktokej? Kena, ¿kenijkatsa elis inintlakayo kema moyolkuisej?”.
36 ¡Tiuiuitik!* Tlen tijtoka amo uelis ixuas tlaj achtoui amo pati.*
37 Uan amo tijtoka se tlenijki tlen ya ixuatok, tijtoka se xinachtli, uelis trigo ixinach o seyok tlamantli xinachtli,
38 pero Dios kichiua ma ixua kej ya kineki, uan kichiua sejse xinachtli ma ixua uan amo ma eli sanse kej sekinok.
39 Amo tijpiaj sanse totlakayo: maseualmej tijpiaj se tlamantli totlakayo, uan tlapialmej, totomej uan michimej sejse kipiaj seyok tlamantli inintlakayo.
40 Katli itstokej ipan iluikak kipiaj se tlamantli inintlakayo, uan katli itstokej ipan Tlaltipaktli nojkia kipiaj seyok tlamantli inintlakayo, pero katli itstokej ipan iluikak amo kipiaj sanse ininyejyejka kej katli itstokej ipan Tlaltipaktli.
41 Tonati se tlamantli tlauia, metstli seyok tlamantli tlauia, uan nojkia sitlalimej seyok tlamantli tlauiaj; uan hasta sejse sitlali amo petlani sanse kej sekinok.
42 Nojkia kiampa pano kema moyolkuisej katli miktokej. Itlakayo se mijkatsi tlen kitlalpachouaj nempoliui,* pero kema moyolkui, itlakayo ayokmo uelis nempoliuis.
43 Itlakayo se mijkatsi tlen kitlalpachouaj, amo kuali kiitaj,* pero kema moyolkui kiuejkapantlaliaj. Itlakayo se mijkatsi tlen kitlalpachouaj amo tetik, pero kema moyolkui kipia tetikayotl.*
44 Katli kitlalpachouaj, kipia itlakayo kej katli itstokej ipan Tlaltipaktli, pero kema moyolkui kipia itlakayo kej katli itstokej ipan iluikak. Tlaj kipia itlakayo kej katli itstokej ipan Tlaltipaktli, nojkia kipias se itlakayo kej katli itstokej ipan iluikak.
45 Kej nopa ijkuilijtok: “Nopa achtoui tlakatl, Adán, mochijki se maseuali* katli yoltok”. Nopa seyok Adán, mochijki kej katli itstokej ipan iluikak uan temaka nemilistli.
46 Pero se akajya amo kipia achtoui itlakayo kej katli itstokej ipan iluikak. Achtoui kipia itlakayo kej katli itstokej ipan Tlaltipaktli uan teipa kipia itlakayo kej katli itstokej ipan iluikak.
47 Nopa achtoui tlakatl eua ipan Tlaltipaktli, kichijchijkej ika tlaltejpoktli;* nopa ompa tlakatl eua ipan iluikaktli.
48 Katli kinchijchijkej ika tlaltejpoktli, elij kej nopa achtoui tlakatl katli kichijchijkej ika tlaltejpoktli; katli euaj ipan iluikaktli, elij kej katli eua ipan iluikaktli.
49 Uan sanse kej tielij kej katli kichijchijkej ika tlaltejpoktli, nojkia tielisej kej katli eua ipan iluikaktli.
50 Pero noikniuaj, niinmechiljuia ni: tonakayo uan toeso amo uelis kalakis ipan iTlanauatijkayo Dios, uan nojkia se tlamantli tlen nempoliui amo uelis mokuepas se tlenijki tlen amo nempoliuis.
51 ¡Xikitakaj! Niinmechiljuis se tlamantli tlen Dios ayamo tematiltia:* amo nochi timikisej, pero Dios nochi techpatlas
52 san ipan se tlalochtli,* kej kema tiijkopij uan nimantsi titlachixteuaj, ni panos kema kipitsasej nopa iyojtsi trompeta tlen mokauas. Pampa kipitsasej nopa trompeta uan katli miktokej moyolkuisej ika inintlakayo tlen ayokmo nempoliuis, uan tojuantij Dios techpatlas.
53 Pampa ni totlakayo tlen nempoliui moneki mopatlas ika se totlakayo tlen amo nempoliuis, uan ni totlakayo tlen ueli miki, moneki mopatlas ika se tlen amo kema mikis.
54 Pero kema tlen nempoliui mopatlas ika tlen amo nempoliui, uan kema tlen uelis mikis mopatlas ika tlen amo kema mikis, uajka moaxitis tlen ijkuilijtok: “Nopa mikilistli kitsontlamiltiaj para nochipa”.
55 “Mikilistli, ¿kanke eltok mochikaualis? Mikilistli, ¿kanke eltok mouijtso?”.*
56 Nopa uitstli tlen kichiua ma timikikaj eli nopa tlajtlakoli, uan nopa Tlanauatili kichiua tlajtlakoli ma kipia chikaualistli.
57 ¡Pero tijtlaskamatiliaj Dios pampa techpaleuia ma titlatlanikaj ika toTeko Jesucristo!
58 Uajka, noikniuaj katli niinmechiknelia, xiitstokaj intemachmej, amo tleno ma inmecholini uan nochipa ximotekiuijtokaj ipan iteki toTeko, pampa inkimatij amo san tlapik nochi tlen inkichiuaj para inkitekipanosej toTeko.
Tlen ijkuilijtok tlatsintla
^ Kanajya kiijtouaj “kitojkej”.
^ Ika griego “motlananki”, nikaj uan nochi kampa nesi ipan ni capítulo.
^ Nojkia kitokaxtiyayaj Pedro.
^ O “kema ayamo asiyaya ihora”.
^ Kanajya kiijtouaj “tsikitetsi”.
^ Kanajya kiijtouaj “toTeotsij”.
^ O “nechmakatok tlateochiualistli tlen amo kinamiki nijselis”.
^ O “nojua initstokej ipan inmotlajtlakoljuaj”.
^ O “se kuauitl itlajka”.
^ Xikita kema Cristo tlakuepilis.
^ O uelis “kej maseualmej moiljuiaj”.
^ Kanajya kiijtouaj “ma tikijikaj”.
^ O “¡Axtitlalnamiki!”.
^ O “ixpoliui”. Ika griego “miki”.
^ O “palani”.
^ O “kiitaj tepinajti”.
^ O “chikaualistli”.
^ O “se alma”.
^ Kanajya kiijtouaj “tlalpopoxtli”, “tlalkuanextli”.
^ Xikita tlen Dios ayamo tematiltia.
^ Kanajya kiijtouaj “tlatoktsi”.
^ O “tlen ika titechajkoua”, “motenkokoka”.
