Nopa achtoui carta tlen kintitlanilijkej Cristo itokilijkauaj tlen Corinto 2:1-16
2 Yeka noikniuaj, kema niajki kampa inmojuantij, amo niinmechiljuito tlen Dios ayamo tematiltia* ika tlajtoli tlen kichiuaskia xinechsentlachilikaj o ika tlen kinextiskia para tlauel niixtlamati.
2 Pampa kema niitstoya inmouaya, nimosentlalik san niinmechkamanaljuis tlen Jesucristo, uan nojkia kema kimiktijkej ipan se kuauitl.
3 Kema niajki kampa inmojuantij nijmatiyaya amo nitetik, nimajmauiyaya uan niuiuipikayaya.
4 Uan kema niinmechpouilik nopa kuali tlamachtili, amo niinmechkamanaljuik ika tlajtoli tlen kitekiuiaj ixtlamatinij para teyoltilanasej, niinmechkamanaljuik ika tlajtoli tlen kinextia itetikayo uan ichikaualis* Dios
5 para xitlaneltokakaj ipan itetikayo Dios uan amo ipan inintlalnamikilis maseualmej.
6 Tojuantij tikinkamanaljuiaj tlen nopa tlalnamikilistli san katli kuali tlaneltokaj, pero amo tikinkamanaljuiaj tlen nopa tlalnamikilistli tlen onka ipan ni tonali yon tlen inintlalnamikilis nopa tekichiuanij katli itstokej ipan ni tonali* uan ixpoliuisej.
7 Tojuantij tikamanaltij tlen itlalnamikilis Dios tlen monextia ipan tlen ayamo tematiltia,* nopa tlalnamikilistli tlen nojua motlatijtok.* Dios ipa mosentlalijtoya kichiuas nopa kema ipan Tlaltipaktli ayamo mochiuayaya tlen amo kuali, para ma techuejkapantlalikaj.
8 Ya ni eli nopa tlalnamikilistli tlen yon se tlen nopa tekichiuanij katli itstokej ipan ni tonali amo kiixmatkej, pampa tlaj kiixmajtoskiaj amo kimiktijtoskiaj* toTeko Jesús katli kipia iueyitilis.
9 Pero pano sanse kej ijkuilijtok: “Amo aka kiitstok yon amo aka kikaktok uan yon se maseuali moiljuijtok ipan nopa tlamantli tlen Dios kikualchijchijtok para katli kiikneliaj”.
10 Pero tielij tojuantij katli Dios ika ichikaualis* techmatiltijtok nopa tlamantli, pampa ichikaualis technextilia nochi, hasta itlalnamikilis Dios tlen amo kema uelis tijkuamachilisej.
11 Pampa ¿ajkia uelis kimatis tlen moiljuia seyok maseuali? Sejse maseuali kimati san tlen eltok ipan iyolo. Nojkia, amo aka kimati tlen Dios moiljuia, san ichikaualis Dios kimati.
12 Pero tojuantij amo timoyakanaj ika tlen moiljuiaj katli itstokej ipan ni Tlaltipaktli, timoyakanaj ika ichikaualis Dios para tijmatisej nopa tlamantli tlen Dios techmakatok ika nochi iyolo.
13 Tojuantij nojkia tikamanaltij tlen ni tlamantli, pero amo tijtekiuiaj tlajtoli tlen techmachtijtok inintlalnamikilis maseualmej, tijtekiuiaj tlen tlamachtia ichikaualis Dios. Yeka, tikixtomaj tlamachtili tlen Dios ika tlajtoli tlen uala ika ichikaualis Dios.
14 Pero se akajya katli moyakana ika tlen maseualmej moiljuiaj, amo kiselia tlen ichikaualis Dios kinextia, pampa kiita kej se uiuiyotl. Ya amo uelis kikuamachilis nopa tlamantli, pampa se maseuali moneki kipias ichikaualis Dios para kuali kitlachilis uan kikuamachilis.
15 Pero nopa tlakatl katli moyakana ika ichikaualis Dios, kuali kitlachilia uan kikuamachilia nochi tlamantli, pero amo aka uelis kiiljuis tlaj kuali tlen kichiua o amo.
16 Pampa pano kej ijkuilijtok: “¿Ajkia kiixmajtok itlalnamikilis Jehová* para uelis kimachtis?”. Pero tojuantij kena tijpiaj itlalnamikilis Cristo.
Tlen ijkuilijtok tlatsintla
^ Xikita tlen Dios ayamo tematiltia.
^ O “iespíritu”.
^ Xikita tlen Dios ayamo tematiltia.
^ Kanajya kiijtouaj “miyantok”.
^ O “kimiktijtoskiaj ipan se kuauitl”.
^ O “iespíritu”.
