Nopa achtoui carta tlen kintitlanilijkej Cristo itokilijkauaj tlen Corinto 3:1-23
-
Katli euaj Corinto nojua moyakanaj ika tlen maseualmej moiljuiaj (1-4)
-
Dios kichiua ma moskalti (5-9)
-
“Titekitij sansejko iuaya Dios” (9)
-
-
Ma tikalchiuakaj ika tlamantli tlen amo tlatla (10-15)
-
“Inmojuantij kejuak inelij itemplo Dios” (16, 17)
-
Dios kiita kej uiuiyotl nopa tlalnamikilistli tlen ni Tlaltipaktli (18-23)
3 Yeka noikniuaj, amo uelki niinmechkamanaljuia kej maseualmej katli moyakanaj ika ichikaualis Dios.* Niinmechkamanaljuik kej katli moyakanaj ika tlen maseualmej moiljuiaj, kej konemej katli amo kimatij iojui Cristo.
2 Niinmechtlamakak ika leche, amo ika tlakualistli tlen tetik pampa ayamo inmoskaltijtoyaj.* Uan nama nojua ayamo inmoskaltijtokej,
3 pampa nojua inmoyakanaj ika tlen maseualmej moiljuiaj. Inmokokoliaj* uan inmoteuiaj, nopa kinextia nojua inmoyakanaj ika tlen maseualmej moiljuiaj uan inmonejnemiltiaj kej inijuantij kichiuaj.
4 Kema se tlen inmojuantij kiijtoua “Na niitokilijka Pablo”, uan seyok kiijtoua “Na niitokilijka Apolos”, ¿amo kinextia nopa para inkichiuaj kej sekinok maseualmej?
5 ¿Ajkia eli Apolos? ¿Ajkia eli Pablo? San tielij Dios itekipanojkauaj katli titlapaleuijkej para xitlaneltokakaj. San tijchijkej tlen toTeko technauatik ma tijchiuakaj.
6 Na nitlatojtojki, Apolos kiatekik tlen nijtojki, pero Dios kichijki ma moskalti,
7 uajka amo ipati ajkia tlatojtoka yon ajkia kiatekia nopa tlatoktli, pampa eli Dios katli kichiua ma moskalti.
8 Katli tlatojtoka uan katli kiatekia nopa tlatoktli sansejko tekitij,* pero sejse maseuali kiselis itlaxtlauil ika tlen tekititok.
9 Pampa tojuantij titekitij sansejko iuaya Dios. Inmojuantij kejuak ineliskiaj imil Dios kampa yaya tlatojtoktok, kejuak se ueyi kali tlen Dios kichijchijtok.
10 Dios kinextik ueyi iyolo ika na,* yeka na nijtsinpeualtik nopa kali kej se kalchijketl katli kuali kimati kenijkatsa tekitis, pero seyok tekiti kampa na nijtsinpeualtik. Sejse ma kitlachili kenijkatsa tekiti kampa nijtsinpeualtik.
11 Pampa amo aka uelis kitlalis seyok tlatsinpeualtili para kipatlas tlen ipa eltok, pampa Jesucristo eli nopa tlatsinpeualtili.
12 Se akajya uelis kalchiuas kampa kitsinpeualtijtokej nopa kali ika oro, plata o piltetsitsij tlen yejyektsitsij uan pajpatiyo, o ika kuauitl, xiuitl uan sakatl.
13 Pero asis se tonali kema nesis kenijkatsa eltok ininteki sejse maseuali, pampa ipan nopa tonali, nopa tlitl kinextis tlaj kuali eltok iteki o amo.
14 Tlaj amo tleno kipanos nopa tekitl tlen kichijchijtok se akajya kampa kitsinpeualtijkej nopa kali, uajka nopa maseuali kiselis se tlateochiualistli.
15 Tlaj iteki se akajya tlatla, nopa maseuali kipolos nochi, pero momakixtis;* maske elis kej se katli mochololtia kema tlalemeni.
16 ¿Amo inkimatij para inmojuantij kejuak inelij itemplo Dios uan ichikaualis Dios mokaua ipan inmojuantij?
17 Tlaj se akajya kixoleua* Dios itemplo, Dios kitsontlamiltis nopa maseuali, pampa Dios itemplo eli tlatsejtseloltik* uan inmojuantij inelij itemplo.
18 Amo aka ma mokajkayaua: tlaj se akajya moiljuia ixtlamati ipan ni tonali,* ma mochiua kejuak amo tleno kimati para uelis mochiuas ixtlamatketl.
19 Pampa Dios kiita kej se uiuiyotl nopa tlalnamikilistli tlen onka ipan ni Tlaltipaktli, pampa ijkuilijtok: “Ya kinmasiltia ixtlamatinij ika nopa amo kuali tlamantli tlen inijuantij moiljuiaj”.
20 Nojkia ijkuilijtok: “Jehová* kimati para inintlalnamikilis ixtlamatinij eli san tlapik”.
21 Yeka, amo aka ma moueyimati ika tlen maseualmej uelij kichiuaj, pampa nochi tlamantli inmoaxka:
22 maske elis Pablo, Apolos, Cefas,* Tlaltipaktli, nemilistli, mikilistli, tlamantli tlen nama onka o tlen teipa onkas. Nochi eli inmoaxka.
23 Uan inmojuantij inelij iaxkauaj Cristo, uan Cristo eli iaxka Dios.
Tlen ijkuilijtok tlatsintla
^ O “espíritu santo”.
^ O “ayamo kuali intlaneltokayayaj”.
^ O “Inmokualankaitaj”.
^ O “moiljuiaj kichiuasej sanse tlamantli”.
^ O “nechmakak tlateochiualistli tlen amo kinamiki nijselis”.
^ O “momanauis”.
^ O “kisosoloua”.
^ O “kiiyokatlalijtok para ya”.
^ Nojkia kitokaxtiyayaj Pedro.
