Nopa achtoui carta tlen kintitlanilijkej Cristo itokilijkauaj tlen Corinto 4:1-21
4 Nochi moneki techitasej kej tiitlapaleuijkauaj Cristo uan kej tlayakankatlatekipanouanij katli kinkauilijkej ma kimokuitlauikaj tlen Dios ayamo tematiltia.*
2 Pero se tlayakankatlatekipanojketl moneki kuali kichiuas iteki.
3 Na amo kenijki nikita tlaj inmojuantij o tekichiuanij innechtlajtolsenkauaj. Kena, hasta yon na amo nimotlajtolsenkaua.
4 Pampa amo nechyolkokoua notlalnamikilis, pero nopa amo kiijtosneki para nijchiua tlen xitlauak. Jehová* yaya katli nechtlajtolsenkaua.
5 Yeka, amo aka xijtlajtolsenkauakaj kema ayamo kinamiki, ximochiakaj hasta kema ualas toTeko. Ya kikixtis tlen motlatijtok* kampa tsintlayoua uan kitlalis kampa tlatlanestok uan kipannextis tlen eltok ipan ininyolo maseualmej. Uajka Dios* kiuejkapantlalis sejse maseuali ika tlen kichijtok.
6 Noikniuaj, niinmechiljuijtok ni tlamantli tlen na uan Apolos para ma inmechpaleui xijkuamachilikaj tlen nijneki niinmechiljuis. Ika tlen tijchijtokej, moneki inkiyekosej ni: “Amo xijchiuakaj se tlamantli tlen amo ijkuilijtok”. Kiampa amo inmoueyimatisej, uan amo inkipaleuisej se uan ne seyok inkikualankaitasej.
7 Pampa, ¿ajkia mitschijtok más tiueyi que sekinok? ¿Amo mitsmakatok Dios nochi tlen tijpia? Uajka, tlaj Dios mitsmakak nochi, ¿kenke timoueyimati kejuak moselti timotlanilijtoskia?
8 ¿Ya inkipixtokej nochi tlen inkinekij? ¿Ayokmo tleno inmechpoloua? ¿Ya pejkej intlanauatiaj maske tojuantij ayamo? Kuali eliskia tlaj ya inpeuaskiaj intlanauatisej, kiampa tojuantij nojkia titlanauatiskiaj inmouaya.
9 Pampa nimoiljuia tojuantij katli tielij apóstoles, Dios techualikatok para technextis ininixpa miakej, sanse kej kinnextiaj katli kinmiktisej kema tlami moyolpakiltiaj. Pampa tojuantij tielij kej se teatro* ipan Tlaltipaktli, kampa techitaj ángeles uan maseualmej.
10 Tojuantij techitaj kejuak tiuiuitikej pampa tijtokiliaj Cristo, pero inmojuantij inmechitaj kejuak intlalnamikij pampa inkitokiliaj Cristo; tojuantij amo titetikej pero inmojuantij kena; inmojuantij inmechuejkapantlaliaj pero tojuantij techkualankaitaj.
11 Hasta ipan ni tonali nojua timayantokej uan tiamiktokej,* amo tijpiaj tlen ika timoyoyontisej, techmakiliaj, amo tijpiaj tochaj
12 uan chikauak titekitij ika tomax. Kema techtlaijiljuiaj, tikiljuiaj Dios ma kinteochiua; kema techtlaijiyouiltiaj, tijnextiaj tijpiaj toyolo uan tikijiyouiaj;
13 kema techistlakauiaj, tikinnankiliaj ika yamanik tlajtoli. Hasta ipan ni tonali, maseualmej techitaj kej tlasoli uan kej se tlamantli tlen ayokmo kuali uan kitepeuaj.
14 Amo niinmechtlajkuiljuilia ni tlamantli para niinmechpinaualtis, nijchiua para niinmechtlajtolmakas kej nokoneuaj katli niinmechiknelia.
15 Pampa maske inkinpiaj 10 mil katli inmechmachtisej kenijkatsa inkitokilisej Cristo, inmojuantij amo inkinpiaj miakej inmotatauaj. Na nimochijtok kej inmotata pampa niinmechmachtijtok nopa kuali tlamachtili para inkitokilisej Cristo Jesús.
16 Uajka, niinmechtlajtlania xijchiuakaj kej na nijchiua.
17 Yeka niinmechtitlanilia Timoteo, pampa ya eli nokone katli tlauel nikiknelia uan kitekipanoua toTeko ika nochi iyolo. Ya inmechilnamikilis kenijkatsa nijchiua se keski tlamantli kema nijtekipanoua Cristo Jesús, sanse kej na ejeliuis* nikinmachtia toikniuaj ipan sejse tlanechikoli.
18 Se keskij tlen inmojuantij tlauel moueyimatij, pampa moiljuiaj amo nias niinmechpaxaloti.
19 Pero tlaj Jehová* kinekis, amo uejkauas nias niinmechpaxaloti. Nijneki nikinitas katli moueyimatij, pero amo para nijmatis tlake kiijtouaj, nijneki nikitas tlaj kipiaj ichikaualis* Dios o amo.
20 Pampa iTlanauatijkayo Dios amo monextia ika tlajtoli,* monextia ika ichikaualis Dios.
21 ¿Tlake inkinekij? ¿Inkinekij ma nia ika se kuapipitstli, o ika tlaiknelili uan ma niinmechnojnotsati ika yamanik tlajtoli?
Tlen ijkuilijtok tlatsintla
^ Xikita tlen Dios ayamo tematiltia.
^ Kanajya kiijtouaj “miyantok”.
^ Kanajya kiijtouaj “toTeotsij”.
^ O “kampa mosentiliaj para moyolpakiltisej o tlamauisosej”.
^ Kanajya kiijtouaj “tiateuaktokej”.
^ Kanajya kiijtouaj “kampa ueli”.
^ O “iespíritu”.
^ Kanajya kiijtouaj “kamanali”.
