Nopa achtoui carta tlen kintitlanilijkej Cristo itokilijkauaj tlen Corinto 5:1-13
5 Nechiljuijtokej para inmouaya itstok se tlakatl katli auilnemi.* Kichijtok se ueyi tlajtlakoli tlen tlauel fiero, tlen hasta katli amo tlaneltokaj amo kiampa kichiuaj. Nopa tlakatl mokuilijtok itata isiua.*
2 ¿Uan inyolpakij pampa mochiua nopa tlajtlakoli? ¿Amo kinamikiskia tlauel inmokuesosej? Uan, ¿amo monekiskia inkikixtisej kampa inmojuantij nopa tlakatl katli tlajtlakolchijtok?
3 Maske amo niitstok nopaya, ika notlalnamikilis* kejuak niitstok inmouaya, uan ya nijtlajtolsenkajki nopa tlakatl katli kichijki nopa tlamantli kejuak nelia niitstoskia nopaya.
4 Kema inmosentilisej ipan itoka toTeko Jesús, xikilnamikikaj notlalnamikilis uan itetikayo toTeko Jesús eltok kampa inmojuantij,
5 uajka xijmaktilikaj Satanás nopa tlakatl para ma ixpoliui nopa tlajtlakoli tlen kikalakik ipan tlanechikoli,* kiampa inintlalnamikilis toikniuaj amo tleno kipanos ipan nopa tonali tlen iaxka toTeko.
6 Amo kinamiki inmoueyimatisej. ¿Amo inkimatij se kentsi levadura* kisoneua nochi harina?
7 Xijkixtikaj nopa levadura tlen ipa eltok, kiampa uelis inelisej kejuak se yankuik harina, pampa inmojuantij inelij kejuak se harina tlen amo kipia levadura. Pampa Cristo kimiktijkej uan kiampa mochijki toborregojtsi tlen titemaktiliaj ipan Pascua.
8 Yeka, amo ma tiiljuichiuakaj ika levadura tlen ipa eltok yon ika levadura tlen kiixnextia tlajtlakoli uan tlen tlauel amo kuali, ma tiiljuichiuakaj ika nopa pantsi tlen amo kipia levadura, tlen kiixnextia tlen kuali uan tlen melauak.
9 Niinmechtlajkuiljuilik para ayokmo ximouikakaj ininuaya maseualmej katli auilnemij.*
10 Ika nopa amo nijnejki nikijtos senkistok ximouejkatlalikaj ininuaya maseualmej tlen ni Tlaltipaktli, katli auilnemij,* kiixtokaj tlen sekinok ininaxka, tlakajkayauaj para tlachtekisej o kinueyichiuaj sekinok dioses. Tlaj kiampa eliskia, uajka monekiskia inkisasej tlen ni Tlaltipaktli.
11 Pero nama niinmechtlajkuiljuilia para ayokmo ximouikakaj iuaya se katli kiijtoua eli toikni pero auilnemi, kiixtoka tlen sekinok ininaxka, kinueyichiua sekinok dioses, tetlaijiljuia ika fiero tlajtoli,* moiuintia o tlakajkayaua para tlachtekis. Yon amo xitlakuakaj iuaya.
12 Pampa, ¿kenke monekis na nikintlajtolsenkauas katli amo itstokej ipan tlanechikoli? Inmojuantij moneki inkintlajtolsenkauasej katli itstokej ipan tlanechikoli
13 uan Dios* kintlajtolsenkauas katli itstokej ipan Tlaltipaktli. “Xijkixtikaj nopa maseuali katli kichiua tlen tlauel amo kuali katli itstok kampa inmojuantij”.
Tlen ijkuilijtok tlatsintla
^ Ika griego pornéia. Xikita auilnemilistli.
^ O “itepotsnana”.
^ Ika griego “nochikaualis (noespíritu)”.
^ Ika griego “para ma ixpoliui itlakayo”.
^ Kanajya kiijtouaj “tlasonejkayotl”.
^ Xikita auilnemilistli.
^ Xikita auilnemilistli.
^ Kanajya kiijtouaj “kamanali”.
^ Kanajya kiijtouaj “toTeotsij”.
