Nopa ompa carta tlen kintitlanilijkej Cristo itokilijkauaj tlen Corinto 13:1-14
13 Ika ni ya expa nimokualchijchijtok para nias niinmechpaxaloti. “Kiampa omej o eyij testigos kiijtosej tlaj nelia nochi tlen panotok”.
2 Maske namantsi amo niitstok nopaya, kejuak ya niajtoskia ika ompa. Yeka desde nama nikiniljuia katli tlajtlakolchijtokej uan nochi nopa sekinok, tlaj uelis nitlakuepilis, temachtli kiselisej nopa tlatsakuiltili uan amo san kej nopa mokauas,
3 pampa inmojuantij inkitemouaj se tlamantli tlen kinextis para Cristo nelia nechtekiuijtok para inmechkamanaljuis. Uan tlen Cristo kichiua amo kinextia para amo tetik, amo, ya kinextia ichikaualis* ika inmojuantij.
4 Kena, ya kimiktijkej ipan kuauitl kema eliyaya se maseuali katli amo tetik, pero nama yoltok pampa itetikayo Dios* kichijki ma yolto. Uan tojuantij nojkia, maske amo titetikej sanse kej ya amo tetik eliyaya, tiitstosej iuaya pampa itetikayo Dios tekiti ipan inmojuantij.
5 Nojua kuali ximotlachilijtokaj para inkimatisej tlaj nelia intlaneltokaj. Nojua xijnextijtokaj tlen nelnelia inelij. ¿O amo inkiitstokej Jesucristo itstok inmouaya? Amo itstoskia inmouaya tlaj Dios amo kuali inmechitaskia.
6 Nelnelia nijneki xikitakaj para tojuantij Dios kuali techita.
7 Tijtlajtlaniaj Dios para amo xijchiuakaj tlen amo kuali. Amo titlajtlanij para ma nesi tojuantij Dios kuali techita, titlajtlanij para xijchiuakaj tlen kuali, maske nesiskia tojuantij Dios amo kuali techita.
8 Pampa amo uelis tijchiuasej yon se tlamantli para tikixnamikisej tlen melauak, san uelis tijchiuasej tlen ika tijpaleuisej tlen melauak.
9 Nelia tiyolpakij kema tojuantij amo titetikej uan inmojuantij kena. Uan kema timomaijtouaj* titlajtlanij para ximotlalnamiktikaj.*
10 Yeka niinmechtlajkuiljuilia kema ayamo nia kampa inmojuantij, kiampa kema niitstos inmouaya, amo monekis chikauak niinmechajuas kema nijtekiuis nopa tlanauatili tlen toTeko nechmakak, san nijtekiuis para nitlapaleuis ma moskalti inmotlaneltokilis uan amo para niteyolkokos.
11 Noikniuaj, para nijtlamiltis nijneki niinmechiljuis nojua xiyolpaktokaj, nojua ximotlalnamiktijtokaj, xijkauakaj ma inmechyoltlalikaj, xijpiakaj sanse inmotlalnamikilis uan xiitstokaj ika tlaseuilistli, uan kiampa Dios katli teiknelia uan temaka tlaseuilistli itstos inmouaya.
12 Ximotlajpalokaj se ika seyok uan ximotsoponikaj kej iniknimej.
13 Nochi katli Dios kiniyokatlalijtok* inmechontlajpalouaj.
14 ToTeko Jesucristo ma kinextijto ueyi iyolo ika nochi inmojuantij,* Dios nochipa ma inmechiknelijto uan ma inmechmakato ichikaualis* tlen ika inmechpaleuia nochi inmojuantij.
Tlen ijkuilijtok tlatsintla
^ O “itetikayo”.
^ Kanajya kiijtouaj “toTeotsij”.
^ Kanajya kiijtouaj “timotlatlajtiaj”.
^ O “xijpatlakaj inmotlalnamikilis”.
^ O “tlatsejtseloltikej”.
^ O “ma inmechmakato tlateochiualistli tlen amo kinamiki tijselisej”.
^ O “espíritu santo”.
