Nopa ompa carta tlen kintitlanilijkej Cristo itokilijkauaj tlen Corinto 4:1-18
4 Uajka, pampa Dios* techtlasojtlak uan techmakak nopa tekitl, amo tijkaxaniliaj* toteki.
2 Tojuantij ayokmo tijchiuaj tlamantli tlen tepinajti tlen mochiua ichtakatsi uan amo timoiljuiaj kenijkatsa titlakajkayauasej yon tijpatlaj itlajtol Dios. Amo, tojuantij titematiltiaj tlen melauak, uan kiampa iixpa Dios tijnextiaj tijchiuaj tlen kuali, para sejse maseuali ika itlalnamikilis ma kiita tlen tijchiuaj.
3 Tlaj nopa kuali tlamachtili tlen titematiltiaj kejuak motlatijtok* ika se yoyomitl,* kintlatilijtokej katli kintsontlamiltisej,
4 katli amo tlaneltokaj, inijuantij katli idios ni Tlaltipaktli* kintsakuilijtok inintlalnamikilis para amo ma tlaui ipan inijuantij nopa tlauili tlen nopa kuali tlamachtili tlen Cristo, katli kinextia kenijkatsa eli Dios.*
5 Pampa amo titematiltiaj san tlen tojuantij tijchiuaj, titematiltiaj para Jesucristo eli toTeko uan para tojuantij tiinmechtekipanouaj uan kiampa uelis tijuejkapantlalisej Jesús.
6 Pampa Dios yaya katli kiijtok: “Ma petlani nopa tlauili kampa tsintlayoua”. Uan ya petlantok ipan toyolo para techtlauilis ika ixayak Cristo, uan kiampa ika nopa tlauili uelis tikixmatisej Dios.
7 Pero tijpiaj ni tlamantli tlen tlauel patiyo maske tielij kej sokichachapali, kiampa xitlauak nesi para tijpiaj nopa tetikayotl tlen amo aka ueli kipia, nopa tetikayotl uala tlen Dios uan amo tlen tojuantij.
8 Ika miak tlamantli techtetsopaj, pero amo kejuak techilpitokej hasta ayokmo tiuelij timoliniaj; amo tijmatij tlake tijchiuasej, pero nochipa tijpantiaj kenijkatsa tikisasej;*
9 techtlaijiyouiltiaj, pero amo tiitstokej toselti; techtlauisouaj,* pero amo techtsontlamiltiaj.
10 Kampa ueli tiauij tikixnamikij mikilistli sanse kej Jesús, kiampa maseualmej uelij kiitaj para titlaijiyouiaj sanse kej ya.
11 Maske nojua tiitstokej, ajachika* kinekij techmiktisej pampa tielij itokilijkauaj Jesús, nopa kichiua maseualmej ma kiitakaj para titlaijiyouiaj sanse kej ya.
12 Uajka, maske tojuantij uelis timikisej, inmojuantij uelis inmechpaleuis para inkipiasej nemilistli.
13 Pero tojuantij titlaneltokaj sanse kej ijkuilijtok: “Nitlaneltokak uan yeka nikamanaltik”. Uajka, tojuantij nojkia titlaneltokaj uan yeka tikamanaltij,
14 pampa tijmatij katli kiyolkuik* Jesús, nojkia techyolkuis tojuantij para tiitstosej iuaya Jesús uan technextiti inmouaya.
15 Pampa nochi ni tlamantli eli para inmechpaleuis, kiampa Dios nojua más kinextis ueyi iyolo ika nochi maseualmej* pampa itstokej nojua más miakej katli kitlaskamatiliaj Dios para ma nesi iueyitilis.
16 Yeka, amo tijkaxaniliaj toteki. Maske totlakayo tlantia, toyolo uan totlalnamikilis mojmostla moyankuilijtia.
17 Pampa maske nopa tlaouijkayotl amo uejkaua* uan amo tlauel ouij, kichiua ma tijpiakaj se toueyitilis tlen mochijtia más ueyi uan tlen uejkauas para nochipa,
18 uan nojkia timoseniljuijtokej ipan tlamantli tlen amo ueli tikitaj uan amo ipan tlen kena tikitaj. Pampa tlen tikitaj amo uejkaua, pero tlen amo tikitaj, uejkaua para nochipa.
Tlen ijkuilijtok tlatsintla
^ Kanajya kiijtouaj “toTeotsij”.
^ O “tijkauaj”.
^ Kanajya kiijtouaj “miyantok”.
^ Kanajya kiijtouaj “peseli”.
^ O “katli kiyakana tlen mochijtok ipan ni tonali”. Xikita tonali; tlen mochijtok ipan Tlaltipaktli.
^ O “katli eli itlachialis Dios”.
^ O uelis “amo timotsontlapantokej”.
^ Kanajya kiijtouaj “techkuamajkauaj”.
^ Kanajya kiijtouaj “ijiksa”.
^ Ika griego “kitlananki”.
^ O “nojua más ma temaka tlateochiualistli tlen amo kinamiki tijselisej”.
^ O “san tlalochpano”.
