Nopa ompa carta tlen kintitlanilijkej Cristo itokilijkauaj tlen Corinto 7:1-16
7 Yeka, noikniuaj katli niinmechiknelia, pampa tijmatij ni tlamantli tlen Dios* kitenkajtok, ma timokixtilikaj nochi tlen kisokiuia totlakayo uan totlalnamikilis, kiampa timochijtiasej nojua más titlapajpaktikej* pampa tijmakasij Dios.
2 Xitechiknelikaj ika nochi* inmoyolo. Tojuantij amo aka tijchiuilijtokej tlen amo xitlauak, amo aka tijkuapolojtokej para ma kichiua tlen amo kuali yon amo aka tijkajkayajtokej para tijkuilisej se tlenijki.
3 Amo nikijtoua ni para nijnextis amo kuali tlen inkichijtokej, pampa ipa niinmechiljuijtok tiinmechpixtokej ipan toyolo, maske timikisej sansejko o maske tiitstosej sansejko.
4 Na amo tleno nechtsakuilia para niinmechiljuis tlen nimoiljuia. Tlauel nechpakilismaka tlen inkichiuaj. Tlauel nechyolchikaua uan tlauel niyolpaki maske titlaijiyouiaj.
5 Kema tiasikoj Macedonia amo uelkej timoyoltlaliaj, pampa nojua tikixnamijkej miak tlaouijkayotl: maseualmej tlauel techtlaijiyouiltiyayaj uan tojuantij timotekipachouayayaj ika tlen kinpanoyaya toikniuaj ipan tlanechikoli.
6 Pero Dios, katli kinyoltlalia* katli moyolkuesouaj, techyolchikajki kema asiko Tito.
7 Uan amo san techyolchikajki kema asiko, nojkia ika tlen inmojuantij inkiyolchikajkej. Ya techiljuik para inmojuantij tlauel inkinekiyayaj innechitasej uan para tlauel inmokuesouaj uan tlauel inmotekipachouaj ika tlen nechpano, uan nopa kichijki nojua más ma niyolpaki.
8 Yeka, amo nimoyolkokoua tlaj nijchijki ximokuesokaj ika nopa carta tlen niinmechtitlanilik. Maske achtoui kena nimoyolkokok pampa nikitak nopa carta kichijki ximokuesokaj se keski tonali,
9 nama niyolpaki pero amo pampa nijchijki ximokuesokaj, niyolpaki pampa inmokuesojkej uan nopa kichijki ximoyolpatlakaj. Inmokuesojkej kej Dios kipaktia, yeka amo tleno inkipolojkej ika tlen tiinmechiljuijkej.
10 Pampa kema se akajya mokuesoua kej Dios kipaktia, kichiua ma moyolpatla uan nopa kipaleuia ma momakixti,* uan amo aka kiyolkokoua nopa tlamantli; pero kema se akajya mokuesoua kej kichiuaj maseualmej, nopa kichiua ma miki.
11 ¡Xikitakaj kenijkatsa inmechpaleuijtok pampa inmokuesojkej kej Dios kipaktia! Kichijtok kuali ma inmechitakaj, kichijki xijkualankaitakaj tlen amo kuali, kichijki xijmakasikaj Dios, tlauel inkinejkej inmoyolpatlasej, pejkej kuali inkitekipanouaj Dios ika nochi inmoyolo uan nojkia inmechpaleuik ayokmo xijchiuakaj tlen amo kuali. Ipan ni tlamantli inkinextijtokej inelij intlapajpaktikej ika nochi tlen inkichiuaj.
12 Kema niinmechtlajkuiljuilik, amo nijchijki para katli tlajtlakolchijki yon para katli tlaijiyouik, niinmechtlajkuiljuilik para iixpa Dios xitlauak ma nesi inkichijkej kampeka inkineltokasej tlen tiinmechiljuijkej.
13 Ya nopa tlen techyolchikajtok.
Pero amo san techyolchikajki, nojkia kichijki más ma tiyolpakikaj kema tikitakej Tito yolpaktok, pampa nochi inmojuantij inkiyolchikajkej.
14 Pampa nikiljuijtok kuali tlamantli tlen inmojuantij uan amo inkichijtokej ma nipinaua. Sanse kej nelia nochi tlen tiinmechiljuijkej, nojkia nesi para nelia tlen tikiljuijkej Tito.
15 Nojkia, ya nojua más inmechiknelia kema kiilnamiki kenijkatsa nochi inmojuantij inkichiuaj tlen tiinmechiljuiaj uan pampa inkiselijkej ika miak tlatlepanitakayotl.
16 Niyolpaki pampa uelis nimotemachis ipan* inmojuantij para inkichiuasej nochi tlen xitlauak.
Tlen ijkuilijtok tlatsintla
^ Kanajya kiijtouaj “toTeotsij”.
^ O “titlatsejtseloltikej”.
^ Ika griego “Xijchiuakaj lugar para tojuantij ipan”.
^ O “kinyolchikaua”.
^ O “ma momanaui”.
^ O uelis “uelis nimoyoltlananas ika”.
