Nopa ompa carta tlen kintitlanilijkej Cristo itokilijkauaj tlen Tesalónica 2:1-17
2 Pero noikniuaj, inmojuantij inkimatij para toTeko Jesucristo tlakuepilis* uan tojuantij timosentilisej iuaya, yeka tiinmechtlajtlaniaj
2 nochipa xijnextikaj kuali intlalnamikij uan amo nima ximomajmatikaj kema sekinok kiijtosej ya monechkauijtok nopa tonali tlen iaxka Jehová,* maske kiijtosej para nopa tlajtoli uala tlen Dios* o se akajya kiniljuik o kipojkej se carta tlen nesiskia para tojuantij tijtitlantokej.
3 Amo aka ma inmechkajkayaua ika yon se tlamantli, pampa nopa tonali asis hasta kema achtoui monextisej katli kiijixnamikij Dios* uan monextis nopa tlakatl katli tlauel kiixpano tlanauatili, katli kitsontlamiltisej.
4 Ya eli se tlaijixnamijketl uan mouejkapantlalia más que nochi tlen maseualmej kiitaj kej se dios o tlen kiueyichiuaj, yeka moseuia ipan itemplo Dios uan monextia ininixpa sekinok kej se dios.
5 ¿Inkiilnamikij niinmechiljuiyaya ni tlamantli kema nojua niitstoya inmouaya?
6 Nama inkimatij tlake kitsakuilia nopa tlakatl katli tlauel kiixpano tlanauatili, para ma monexti ipan nopa tonali kema kinamiki.
7 Maske nelia nopa tlaixpanoketl ya tekititok ichtakatsi para kichiuas tlen amo kuali, nopa tlamantli san mokauas ichtakatsi hasta kema ixpoliuis tlen nama kitsakuilia.
8 Uajka monextis nopa tlakatl katli tlauel kiixpano tlanauatili, katli toTeko Jesús kiixpolos ika nopa tlajtoli tlen kipia chikaualistli tlen kisa ipan ikamak uan kitsontlamiltis kema xitlauak nesis para ya tlakuepilik.*
9 Pero nopa tlakatl katli tlauel kiixpano tlanauatili monextia pampa Satanás kichiua ma monexti ika uejueyi tlamantli, ika tlamantli tlen tesentlachialtia* uan ika milagros* tlen amo melauak,
10 uan kitekiuia nochi tlen amo xitlauak para kinkajkayauas katli yauij ipan se ojtli kampa kintsontlamiltisej. Ya nopa eli inintlaxtlauil pampa amo kiselijkej yon kiiknelijkej nopa tlamachtili tlen melauak tlen kinpaleuia ma momakixtikaj.*
11 Yeka Dios kikaua ma kinkuapolo se tlamachtili tlen amo melauak para ma kineltokakaj se istlakatili,
12 uan kiampa nochi kintlajtolsenkauas pampa más kinpaktik tlen amo xitlauak uan amo kineltokakej tlen melauak.
13 Noikniuaj katli Jehová* inmechiknelia, tijmatij nochipa moneki tijtlaskamatisej Dios por inmojuantij, pampa desde uejkajkia Dios ipa inmechtlapejpenijtoya para inmechmakixtis pampa inmechiyokatlalik* ika ichikaualis* uan pampa intlaneltokaj ipan tlen melauak.
14 Ya inmechnotski para inmechmakixtis ika nopa kuali tlamachtili tlen titematiltiaj, uan kiampa nojkia ma techuejkapantlalikaj sanse kej toTeko Jesucristo.
15 Uajka noikniuaj, xiitstokaj intemachmej uan chikauak xijtokilikaj tlen tiinmechmachtijkej ika tlen tiinmechpouilijkej o kema inkiselijkej se carta tlen tojuantij tijtitlankej.
16 Nojkia, toTeko Jesucristo uan toTata Dios, katli techiknelik uan nochipa techyolchikaua uan kichiua ma timotemachikaj tijselisej se tlamantli tlen tlauel kuali pampa kinextia ueyi iyolo ika tojuantij,*
17 ma inmechyoltlalikaj uan ma kichiuakaj xiitstokaj intemachmej para nochipa inkichiuasej uan inkiijtosej tlen kuali.
Tlen ijkuilijtok tlatsintla
^ Xikita kema Cristo tlakuepilis.
^ Kanajya kiijtouaj “toTeotsij”.
^ O “apóstatas”.
^ Xikita kema Cristo tlakuepilis.
^ O “temajmatia”.
^ Ika griego “tlaneskayotl”.
^ O “ma momanauikaj”.
^ O “inmechchijki intlatsejtseloltikej”.
^ O “iespíritu”.
^ O “techmaka tlateochiualistli tlen amo kinamiki tijselisej”.
