Nopa ompa carta tlen kintitlanilijkej Cristo itokilijkauaj tlen Tesalónica 3:1-18
3 Noikniuaj, para nitlamis niinmechiljuia nojua ximomaijtojtokaj* por tojuantij para itlajtol Jehová* nimantsi ma momoyaua uan ma kiuejkapantlalikaj, sanse kej inmojuantij ya inkichijtiualauij,
2 uan para Dios* ma techmakixti* tlen maseualmej katli amo kualmej uan katli tlauel fiero kichiuaj, pampa amo nochi tlaneltokaj.
3 Pero toTeko eli temachtli uan inmechyolchikauas uan inmechmanauis tlen Axkualtlakatl.
4 Nojkia, tojuantij timotemachiaj ipan toTeko para inmojuantij inkichiuaj uan nojua inkichijtosej tlen tiinmechnauatiaj.
5 ToTeko nojua kuali ma kiyakanto inmoyolo para inkiiknelisej Dios uan inkiijiyouisej nochi para inkitekipanosej Cristo.
6 Nama noikniuaj, ipan itoka toTeko Jesucristo tiinmechnauatiaj ximouejkatlalikaj tlen nochi toikniuaj katli amo monejnemiltiaj kej kinamiki uan amo kitokiliaj nopa tlamachtili tlen tiinmechmachtijkej.*
7 Inmojuantij inkimatij kenijkatsa moneki inkichiuasej kej tojuantij, pampa kema tiitstoyaj inmouaya, tojuantij timonejnemiltijkej kej kinamiki
8 uan amo aka tijkualilijkej itlakualis san tlapik. Amo, tojuantij titekitikej tonaya uan youali uan amo timosiajketskej, uan tijchijkej kampeka para amo aka tijtlajtlanisej tomij.
9 Uan nopa amo kiijtosneki amo tijpiaj tlanauatili para tiinmechtlajtlanisej se tlenijki, kiampa tijchijkej pampa tijnekiyayaj tiinmechnextilisej kenijkatsa inkichiuasej kej tojuantij.
10 Kena, kema tiitstoyaj inmouaya, tiinmechnauatiyayaj ni tlamantli: “Tlaj se akajya amo kineki tekitis, nojkia amo ma tlakua”.
11 Pampa tijkaktokej se keskij tlen inmojuantij amo monejnemiltiaj kej kinamiki pampa amo tekitij uan mokalakiaj kampa amo inincuenta.
12 Tikinnauatiaj nopa maseualmej uan tikintlajtlaniaj ika itoka toTeko Jesucristo kuali ma tekitikaj uan ma kikuakaj nopa tlakualistli tlen inijuantij motlaniliaj.
13 Uan inmojuantij noikniuaj, nochipa xijchiuakaj tlen kuali.
14 Pero tlaj se akajya amo kineltoka tlen tiinmechiljuiaj ipan ni carta, kuali xijtlachilikaj ajkia kichiua nopa uan ayokmo ximouikakaj iuaya para ma pinaua.
15 Pero amo xikitakaj kej se inmokualankaitaka, más kuali nojua xijtlalnamiktikaj kej se inmoikni.
16 ToTeko katli temaka tlaseuilistli ma inmechmaka tlaseuilistli ipan nochi tlamantli. ToTeko ma itsto ika nochi inmojuantij.
17 Na, Pablo, nikijkuiloua ika nomax ni tlajtoli tlen ika niinmechtlajpaloua, nochipa kiampa nikijkuiloua nocartas para xijmatikaj na nikijkuilok.
18 ToTeko Jesucristo ma kinexti ueyi iyolo ika nochi inmojuantij.*
Tlen ijkuilijtok tlatsintla
^ Kanajya kiijtouaj “ximotlatlajtijtokaj”.
^ Kanajya kiijtouaj “toTeotsij”.
^ O “ma techmanaui”.
^ O uelis “tikinmachtijkej”.
^ O “ma inmechmaka tlateochiualistli tlen amo kinamiki tijselisej”.
