Nopa ompa carta tlen kititlanilijkej Timoteo 1:1-18
1 Na niPablo, se iapóstol Cristo Jesús pampa Dios* kiampa nechtekimakak, para ma nitematilti yaya kitenkajtok kinmakas nemilistli katli itstokej iuaya Cristo Jesús,
2 nimitstlajkuiljuilia ta Timoteo, nokone katli nimitsiknelia:
ToTata Dios uan toTeko Cristo Jesús ma kinextikaj ueyi ininyolo ika ta,* ma mitstlasojtlakaj uan ma mitsmakakaj tlaseuilistli.
3 Nijtlaskamatilia Dios, katli nijtekipanoua kej kichijkej notatauaj katli uejkajkia itstoyaj uan nijchiua ika notlalnamikilis tlapajpaktik, uan nochipa nimitsilnamiki kema chikauak nimomaijtoua* tonaya uan youali.
4 Kema nikilnamiki kenijkatsa timochokiliyaya, nijnekiskia nimitsitas para sampa tlauel niyolpakis.
5 Pampa nikilnamiki nelnelia kuali titlaneltoka uan amo san titlachiua, sanse kej achtouia tlaneltokayayaj moueyinana* Loida uan monana Eunice, uan temachtli nijmati ta nojkia kiampa titlaneltoka.
6 Yeka, nimitsilnamikilia para sanse kej tijchiuaskia más ma lemeni se tlitl, nojkia xijchiua ma momiakili nopa yajatili* tlen Dios mitsmakak kema nimitstlalilik nomax mopani.
7 Pampa Dios amo techmakak se chikaualistli* para timajmauisej, techmakak se chikaualistli para tijpiasej tetikayotl, titeiknelisej uan tijnextisej kuali titlalnamikij.
8 Uajka amo xipinaua titematiltis tlen toTeko yon xipinaua tikijtos tinechixmati na, katli nitsaktok pampa nijtekipanoua. Más kuali xijseli nopa tlaouijkayotl tlen moneki tikijiyouis pampa titematiltia nopa kuali tlamachtili uan ximotemachi ipan itetikayo Dios.
9 Ya techmakixtik* uan technotski para tielisej titlatsejtseloltikej,* pero amo pampa timotlanilijkej, kichijki nopa pampa kiampa mosentlalijtok kichiuas uan pampa kinextia ueyi iyolo.* Uejkajkia kitekiuik Cristo Jesús para kinextis ueyi iyolo ika tojuantij,
10 pero nama xitlauak nesi kema monextia toTlamakixtijka Cristo Jesús. Ya kichijtok mikilistli ayokmo tleno ma ueli kichiua uan ika nopa kuali tlamachtili technextilijtok kenijkatsa tijselisej nemilistli uan tijpiasej se totlakayo tlen amo kema nempoliuis.*
11 Na nechtekimakakej para ma nitlajtolmoyaua, ma nieli apóstol uan tlamachtijketl tlen nopa kuali tlamachtili.
12 Yeka nojkia nikijiyouia nochi ni tlamantli, pero amo nipinaua. Pampa nikixmati Dios katli ipan nitlaneltoka, uan nimotemachia ya uelis kiajokuis* tlen nijkajtok imako hasta ipan nopa tonali.
13 Nojua ximotlatskilijto ipan nopa tlajtoli tlen tepaleuia tlen na nimitspouilik uan nojua xijnextijto titlaneltoka uan titeiknelia kej se katli itstok iuaya Cristo Jesús.
14 Xijkaua ichikaualis Dios tlen eltok ipan tojuantij ma mitspaleui xijmokuitlaui ni tlamantli tlen tlauel ipati tlen mitsmakatokej.
15 Ya tijmati para nochi tlakamej katli euaj tlali Asia nechtlauelkajtokej, hasta Figelo uan Hermógenes nojkia kiampa kichijtokej.
16 ToTeko ma kintlasojtla katli itstokej ichaj Onesíforo, pampa ya miakpa nechyolchikajki uan amo pinajki kema nitsaktoya uan niilpitoya ika cadenas.
17 Uan kema itstoya Roma, nechtemojtinenki hasta kema nechpantik.
18 ToTeko Jehová* ma kitlasojtla ipan nopa tonali. Nama kuali tijmati nochi tlen kichijki para nechpaleuis ipan Éfeso.
Tlen ijkuilijtok tlatsintla
^ Kanajya kiijtouaj “toTeotsij”.
^ O “ma mitsmakakaj tlateochiualistli tlen amo kinamiki tijselisej”.
^ Kanajya kiijtouaj “nimotlatlajtia”.
^ Kanajya kiijtouaj “mosisnana”.
^ O “regalo”, “tekitl”.
^ O “espíritu”.
^ O “techmanauik”.
^ O “para techiyokatlalis para ya”.
^ O “temaka tlateochiualistli tlen amo kinamiki tijselisej”.
^ O “palanis”.
^ Kanajya kiijtouaj “kinayantis”.
