Nopa ompa carta tlen kititlanilijkej Timoteo 2:1-26
-
Nopa kuali tlamachtili moneki kinmachtisej tlakamej katli temachmej (1-7)
-
Moneki tikijiyouisej tlaouijkayotl pampa tijmoyauaj nopa kuali tlamachtili (8-13)
-
Kuali xijtekiui itlajtol Dios (14-19)
-
“Ximochololti tlen nopa tlamantli tlen kinyoltilana telpokamej” (20-22)
-
Tlen kinamiki tijchiuasej ika katli techkualankaitaj (23-26)
2 Uajka nokone, nojua ximoyolchikajto ika nopa tlateochiualistli tlen amo kinamiki tijselisej tlen eltok ipan Cristo Jesús.*
2 Uan nopa tlamantli tlen tijkajki para nikijtok uan tlen miakej testigos kiijtojkej para nelia, xikinmachti tlakamej katli elij temachmej, uan kiampa inijuantij kimatisej kenijkatsa kinmachtisej sekinok.
3 Kej se kuali isoldado Cristo Jesús, xikijiyoui nopa tlaouijkayotl tlen monekis tikixnamikis.
4 Yon se soldado mokalakia ipan sekinok tekitl para kitlanis tomij* tlaj kineki kiyolpakiltis katli kitekimakak.
5 Nojkia, kema mauiltiaj amo aka kitlaliliaj se corona tlaj amo mauiltia kej kinamiki kichiuas.
6 Se tlatojketl katli chikauak tekiti, kinamiki ya achtoui kikuas itlajka tlen kitoktok.
7 Ajachika* ximoiljui ipan tlen nikijtoua; toTeko kichiuas xijkuamachili nochi ni tlamantli.
8 Xikilnamiki para Jesucristo moyolkuik* uan eliyaya se iteipaixui David. Ya ni nopa kuali tlamachtili tlen nitematiltia,
9 yeka nitlaijiyouijtok uan nechtsaktokej kej se katli kichijtok tlen tlauel amo kuali. Pero itlajtol Dios amo ilpitok ika cadenas.
10 Yeka nojua nikijiyouijtok nochi para ma kinpaleui katli Dios* kintlapejpenijtok, kiampa inijuantij nojkia uelis momakixtisej* pampa elij itokilijkauaj Cristo Jesús uan kinuejkapantlalisej para nochipa.
11 Tlen nikijtoua eli temachtli: tlaj timikij iuaya, temachtli nojkia tiitstosej iuaya;
12 tlaj nojua tikijiyouijtosej, nojkia titlanauatisej iuaya; tlaj tikijtouaj amo tikixmatij, ya nojkia kiijtos amo techixmati;
13 tlaj amo tijchiuaj tlen ya kiijtoua, ya kena kichiuas tlen kitenkajtok pampa ya amo uelis mopatlas.
14 Nojua xikinilnamikilijto ni tlamantli uan xikinmakato ni tlanauatili iixpa Dios para amo ma moteuikaj por se tlajtoli, nopa amo tlapaleuia pampa kintlanauia katli kitlakakiliaj.
15 Xijchiua kampeka timonextis iixpa Dios kej se akajya katli yaya kuali kiita, se tekitiketl katli amo pinaua ika nopa tekitl tlen kichijtok, katli kuali kimati kenijkatsa kitekiuis itlajtol Dios.*
16 Pero amo xijtlakakili nopa tlajtoli tlen amo tepaleuia tlen kiixpano Dios, pampa nopa kichiuas más amo ma kitlepanitakaj,
17 uan ininkamanal* momoyauas kej se kokolistli tlen kichiua ma palani inakayo se akajya.* Ya nopa tlen kichijtokej Himeneo uan Fileto.
18 Ni tlakamej kitlauelkajtokej tlen melauak, pampa kiijtouaj ya moyolkuikej katli miktokej uan kichiuaj se keskij ayokmo kuali ma tlaneltokakaj.
19 Maske kiampa kichijtokej, Dios kitlalik se tlatsinpeualtili tlen tetik uan kuali ijkatok tlen kipia ni sello tlen kiijtoua: “Jehová* kinixmati katli elij iaxkauaj”, uan “Nochi katli kitekiuiaj itoka Jehová* ayokmo ma kichiuakaj tlen amo xitlauak”.
20 Ipan se ueyi kali amo san onka vasos tlen kichijchijtokej ika oro uan plata, nojkia tlen kichijchijtokej ika kuauitl uan sokitl. Sekij motekiuia kema iljuichiuaj uan sekinok san kej ueli kitekiuiaj.
21 Uajka, katli mouejkatlalia tlen nopa vasos tlen san kej ueli kitekiuiaj, elis kej se vaso tlen kitekiuisej para se tlamantli tlen kuali, se vaso tlen tlatsejtseloltik,* tlen iteko uelis kitekiuis uan tlen kuali kimatis kenijkatsa kichiuas nochi tekitl tlen kuali.
22 Yeka, ximochololti tlen nopa tlamantli tlen kinyoltilana telpokamej uan xijchiua kampeka tijchiuas tlen xitlauak, titlaneltokas, titeiknelis uan tijpias tlaseuilistli; nochi ni tlamantli xijchiua ininuaya katli tlaneltokaj ipan* toTeko ika ininyolo tlapajpaktik.
23 Nojkia, amo ximokalaki kema mokamaijixnamikij por se uiuiyotl tlen amo tepaleuia, pampa tijmati nopa san kichiua ma moteuikaj.
24 Se toTeko itlatekipanojka amo kinamiki tlateuis, moneki kinchiuilis tlen kuali* nochi maseualmej, kimatis kenijkatsa tlamachtis, monauatis* kema kichiuiliaj tlen amo kuali
25 uan kinmachtis ika yamanik tlajtoli katli amo kinekij tlakakisej. Uelis Dios kinkauas ma moyolkuepakaj para uelis kuali kimatisej nopa tlamachtili tlen melauak,
26 uan kiampa motlalnamiktisej uan mochololtisej tlen nopa tlamasiltili* tlen Diablo kintlalilijtok, pampa ya kinmasiltijtok kema nojua yoltokej para ma kichiuakaj tlen ya kineki.
Tlen ijkuilijtok tlatsintla
^ O “kema Cristo Jesús kinextia ueyi iyolo”.
^ O uelis “ipan tlamantli tlen mojmostla mochiua”.
^ Kanajya kiijtouaj “Ijiksa”.
^ Ika griego “motlananki”.
^ Kanajya kiijtouaj “toTeotsij”.
^ O “momanauisej”.
^ Ika griego “nopa tlajtoli tlen melauak”.
^ Kanajya kiijtouaj “inintlajtol”.
^ O “gangrena”.
^ O “tlen kiiyokatlalijtokej para Dios”.
^ Ika griego “kitsajtsiliaj itoka”.
^ O “kinnojnotsas ika yamanik”.
^ O “motsakuilis”, “moijiyouis”.
^ Kanajya kiijtouaj “tlaketstli”.
