Nopa carta tlen kintitlanilijkej Cristo itokilijkauaj tlen Galacia 3:1-29
-
Katli motemachiaj ipan nopa tlanauatili uan katli tlaneltokaj (1-14)
-
“Katli kichiua tlen xitlauak itstos pampa tlaneltoka” (11)
-
-
Tlen Dios kitenkauilik Abrahán amo motlatskilia ipan nopa Tlanauatili (15-18)
-
Abrahán iteipaixui eli Cristo (16)
-
-
Kenijkatsa techmakakej nopa Tlanauatili uan kenijkatsa tlapaleuia (19-25)
-
“Inelij ikoneuaj Dios pampa intlaneltokaj” (26-29)
-
“Tlaj inelij iaxkauaj Cristo, uajka inelij iteipaixuiuaj Abrahán” (29)
-
3 ¡Nelia inuiuitikej ingalaciaeuanij! ¿Ajkia inmechkajkayajtok? Pampa achtouia inmojuantij xitlauak inmechixtomilijkej kenijkatsa Jesucristo mijki ipan nopa kuauitl.
2 San nijneki niinmechtlatsintokis ni: ¿inkiselijkej ichikaualis Dios* pampa inkichijkej tlen kiijtoua nopa tlanauatili? ¿O inkiselijkej pampa intlaneltokakej ipan tlen inkikajkej?
3 ¿Nelia tlauel inuiuitikej? Achtouia, inmojuantij pejkej inmotemachiaj ipan ichikaualis Dios, ¿uan nama ya inmotemachiaj ipan tlen kinyoltilana maseualmej?
4 ¿Inmoiljuiaj san tlapik intlaijiyouijtokej? Kuali nijmati para amo san tlapik.
5 Uajka, katli inmechmaka ichikaualis Dios uan kichiua milagros kampa inmojuantij, ¿kichiua nopa pampa inkineltokaj nopa tlanauatili, o pampa intlaneltokaj ipan tlen inkikajkej?
6 Ya nopa panok ika Abrahán: “tlaneltokak ipan Jehová* uan ya kiitak eliyaya xitlauak”.
7 Inmojuantij temachtli inkimatij katli tlauel tlaneltokaj elij ikoneuaj Abrahán.
8 Uan uejkajkia, Dios* ipan iTlajkuilol kiijtok kinitaskia xitlauakej maseualmej tlen nochi altepemej pampa tlaneltokaj, yeka ipa kimatiltik Abrahán nopa kuali tlamachtili kema kiiljuik: “Nochi altepemej nikinteochiuas ika ta”.
9 Yeka katli tlauel tlaneltokaj, kinteochiuaj iuaya Abrahán, katli tlaneltokak.
10 Nochi katli motemachiaj ipan tlen kiijtoua nopa tlanauatili, kinamiki ma kintlatsakuiltikaj, pampa ijkuilijtok: “Ma kintlatsakuiltikaj nochi katli amo kichiuaj kampeka kineltokasej nochi tlen kiijtoua nopa amamimili kampa ijkuilijtok nopa Tlanauatili”.
11 Nojkia, nima nesi amo aka eli xitlauak iixpa Dios san pampa kineltoka nopa tlanauatili, pampa ijkuilijtok: “katli kichiua tlen xitlauak itstos pampa tlaneltoka”.
12 Nopa Tlanauatili amo kiijtoua para se akajya moneki tlaneltokas, san kiijtoua: “Katli kichiuas ni tlamantli, kipaleuis ma itsto”.
13 Cristo techkojki uan techmakixtik para amo ma techtlatsakuiltikaj kej kiijtoua nopa Tlanauatili uan kiselik nopa tlatsakuiltili tlen tojuantij kinamikiyaya tijselisej, pampa ijkuilijtok: “Katli kikuapilosej ipan se kuauitl, eli se pinaualistli”.
14 Ni panok para nopa tlateochiualistli tlen Abrahán kiseliskia nojkia ma kiselikaj nochi altepemej ika Cristo Jesús, uan kiampa kema titlaneltokasej tijselisej ichikaualis Dios tlen yaya techtenkauilik.
15 Noikniuaj, niinmechixtomilis nopa tlamantli ika ni neskayotl: kema kichiuaj se tlajtolsenkauali,* maske san setsi tlakatl kichiua, amo aka uelis kiijtos ayokmo kipia ipati yon uelis kipiuilis se tlenijki.
16 Nojkia, Dios kitenkajki kinteochiuaskia Abrahán uan iteipaixui. Amo kiijtoua “uan moteipaixuiuaj”, kejuak eliskiaj miakej. San kiijtoua “uan moteipaixui”, nopa kiijtosneki san setsi tlakatl: Cristo.
17 Nojkia niinmechiljuia ni tlamantli: nopa Tlanauatili tlen techmakakej 430 xiuitl teipa, amo kichiua ayokmo ma kipia ipati nopa tlajtolsenkauali tlen Dios ipa kichijtoya, yeka nojkia amo kiixpoloua tlen Dios kitenkajki.
18 Pampa tlaj nopa tlamantli tlen techaxkatisej tijselisej pampa tijchiuaj tlen kiijtoua nopa tlanauatili, uajka ayokmo techmakaj pampa techtenkauilijkej. Pero Dios ika nochi iyolo kimakak Abrahán ika tlen kitenkauilik.
19 Uajka, ¿kenke techmakakej nopa Tlanauatili? Techmakakej para kinextis nopa amo kuali tlamantli tlen maseualmej kichijkej hasta kema asiskia iteipaixui Abrahán, katli Dios kitenkauilijtoya kiteochiuaskia. Uan Dios kintekiuik ángeles para ma kimatiltikaj Moisés nopa Tlanauatili uan ya motlajkoketski* para kinmakas maseualmej.
20 Pero amo aka motlajkoketsa kema san setsi maseuali kitenkaua kichiuas se tlenijki. Nojkia kiampa pano ika Dios, san ya iselti kitenkajki kichiuas nopa tlamantli.
21 Uajka, ¿nopa Tlanauatili kiijixnamiki tlen Dios kitenkajtok? ¡Amo! Pampa tlaj temakatoskiaj se tlanauatili tlen ueliskia temakas nemilistli, uajka maseualmej eliskiaj xitlauakej pampa kineltokaj nopa tlanauatili.
22 Pero iTlajkuilol Dios kinextik para nochi ilpitokej ipan tlajtlakoli uan kiampa katli tlaneltokaj kiselisej tlen Dios kintenkauilijtok katli tlaneltokasej ipan Jesucristo.
23 Pero kema ayamo titlaneltokayayaj technauatiyaya nopa tlanauatili, techilpitoya uan tojuantij tijchiayayaj nopa tlaneltokilistli tlen Dios nechka kinextiskia.
24 Uajka nopa Tlanauatili elki kej se katli techyakana* uan techyakanki hasta Cristo, para uelis tielisej tixitlauakej pampa titlaneltokaj.
25 Pero nama pampa nopa tlaneltokili ya asiko, ayokmo moneki tijpiasej se katli techyakanas.
26 Pero nochi inmojuantij inelij ikoneuaj Dios pampa intlaneltokaj ipan Cristo Jesús.
27 Pampa nochi inmojuantij katli inmoatsonpoliuiltijkej ipan Cristo, ya inmochijtokej kej Cristo.
28 Amo itstok judío yon griego, amo itstok katli tlatekipanoua yon katli majkajtok, amo itstok tlakatl yon siuatl, pampa nochi inmojuantij kejuak ineliskiaj san setsi* iuaya Cristo Jesús.
29 Nojkia, tlaj inelij iaxkauaj Cristo, uajka inelij iteipaixuiuaj Abrahán uan inkiselisej tlen Dios kitenkajtok.
Tlen ijkuilijtok tlatsintla
^ O “espíritu santo”.
^ Kanajya kiijtouaj “toTeotsij”.
^ O “kisenkauaj se kamanali”.
^ O “moketski tlatlajko”.
^ O “se tlamokuitlauijketl”, “tutor”.
^ O “initstokej sansejko”.
