Nopa carta tlen kintitlanilijkej Cristo itokilijkauaj tlen Éfeso 3:1-21
3 Yeka, na niPablo, katli nechtsaktokej pampa niiaxka Cristo Jesús uan pampa nijneki niinmechpaleuis inmojuantij katli amo inelij judíos...
2 Temachtli ya inkimatij na nijselik nopa tekitl para niinmechpaleuis xijselikaj nopa tlateochiualistli tlen Dios* temaka tlen amo kinamiki tijselisej.*
3 Kena, Dios nechmatiltik tlen ayamo tematiltijtoya;* sanse kej achtouia ya niinmechtlajkuiljuilijtoya se kentsi tlen nopa tlamantli.
4 Uajka kema inkipouasej ni, inkiitasej para kuali nijkuamachilia tlen Dios ayamo tematiltia tlen Cristo.
5 Uejkajkia maseualmej amo kimatiyayaj ni tlamantli tlen Dios ayamo tematiltijtoya, kej nama kinmatiltijtok ika ichikaualis* iapóstoles katli kintlapejpenijtok uan teokamanalouanij:*
6 amo kimatiyayaj para nopa maseualmej katli amo elij judíos nama itstokej iuaya Cristo Jesús uan kinmatiltijtokej nopa kuali tlamachtili, uan yeka kiselisej tlen Cristo kiselis, itstosej sansejko kejuak san ipan setsi itlakayo uan nojkia kiselisej touaya tlen Dios kitenkajtok techmakas.
7 Dios kinextik ueyi iyolo ika na,* uan yeka nechtekimakak kej se tlatekipanojketl para niinmechpaleuis xijkuamachilikaj nopa tlamantli tlen ayamo tematiltijtoya. Ya nechmakak nopa regalo tlen amo nimotlanilijtoya para kinextis itetikayo.
8 Maske nieli más nipilsiltsi* que nochi nopa sekinok tlatsejtseloltikej,* Dios kinextik ueyi iyolo ika na* para ma nikinmatilti katli amo elij judíos nopa kuali tlamachtili tlen kiijtoua tlauel miak nopa tlateochiualistli tlen Cristo temaka hasta amo ueli tijpouaj
9 uan para nijchiuas nochi maseualmej ma kiitakaj kenijkatsa Dios, katli kichijchijki nochi tlamantli, kipannextijtok tlen ayamo tematiltijtoya uan kitlatijtoya* tlauel miak xiuitl.
10 Ni panok para nama nochi tlanauatianij uan tekichiuanij katli itstokej iluikak ma kimatikaj ika tlanechikoli para Dios tlauel tlalnamiki, uan nopa nesi ipan miak tlamantli.
11 Ni tlamantli mouika ika tlen Dios mosentlalijtok kichiuas uan uejkauas para nochipa, tlen kichiuas ika Cristo, toTeko Jesús.
12 Ya kichiua amo ma timajmauikaj tikamanaltisej, uan timotemachiaj uelis timonechkauisej iuaya Dios uan amo tleno techtsakuilis pampa titlaneltokaj ipan Cristo.
13 Yeka niinmechiljuia, amo ximokuesokaj ika nopa tlaouijkayotl tlen nikixnamiki kema niinmechpaleuia, pampa nopa tlaouijkayotl kichiuas ma inmechuejkapantlalikaj.
14 Yeka, nimotlankuaketsa iixpa toTata,
15 katli kichiua ma itstokaj nochi familias ipan iluikaktli uan Tlaltipaktli.
16 Nimomaijtoua* ipan Dios, katli tlauel ueyi, para ma kitekiui nopa tetikayotl tlen temaka ika ichikaualis uan kiampa inmechyolchikauas uan kitetilis inmotlalnamikilis,
17 uan para Cristo ma itsto ipan inmoyolo ika tlaiknelili pampa intlaneltokaj. Nojkia nimomaijtoua para kuali intlatskitosej uan initstosej intemachmej ipan nopa tlatsinpeualtili,
18 uan kiampa inmojuantij ininuaya nochi katli Dios kiniyokatlalijtok uelis senkistok inkikuamachilisej kenijkatsa ipatlajka, iuexka, iuejkapanka uan iuejkatlanka
19 uan inkimatisej kenijkatsa eli iteiknelijkayo Cristo tlen kipia más ipati que nochi tlen uelis tijmatisej, para kejuak intemitosej ika nochi tlamantli tlen kuali tlen Dios temaka.
20 Dios, katli tekiti ipan tojuantij ika itetikayo, nelnelia uelis kichiuas más miak tlamantli que nochi tlen tijtlajtlaniaj o tlen timoiljuiaj,
21 uan ya kinamiki ma kiuejkapantlalikaj ika tlanechikoli uan nojkia ika Cristo Jesús, para nochipa uan amo kema ma tlami. Amén.*
Tlen ijkuilijtok tlatsintla
^ Kanajya kiijtouaj “toTeotsij”.
^ O “Dios ma kinexti ueyi iyolo ika inmojuantij”.
^ Xikita tlen Dios ayamo tematiltia.
^ O “iespíritu”.
^ O “profetas”.
^ O “nechmakak tlateochiualistli tlen amo kinamiki nijselis”.
^ Kanajya kiijtouaj “tsikitetsi”.
^ O “katli Dios kiniyokatlalijtok”.
^ O “nechmakak tlateochiualistli tlen amo kinamiki nijselis”.
^ Kanajya kiijtouaj “kiiyantoya”.
^ Kanajya kiijtouaj “Nimotlatlajtia”.
^ O “kiampa ma eli”.
